Proverb 7 - Nouvo Testaman Kreol Morisien Harmonisation NTPS KM

Lasazes pou protez twa kont ladilter

¹ Mo zanfan, pa bliye mo parol; gard mo bann komannman dan fon to leker.

² Si to gard mo bann komannman, to pou viv lontan; gard mo bann lansegnman kouma to pli gran trezor.

³ Gard zot touletan, kouma enn bag dan to ledwa; grav zot lor lardwaz to leker.

⁴ Pran lasazes kouma to prop ser; konsider disernman kouma to meyer kamarad.

⁵ Lasazes ek disernman pou protez twa kont bann fam ki amenn move lavi. Fam adilter ena bann parol dimiel; lasazes ek disernman pou protez twa kont zot.

⁶ Enn fwa, atraver lafnet mo lakaz, mo pe get deor.

⁷ Mo pe obzerv bann zennzan ale-vini. Zot paret san lexperyans; parmi, ena enn ti zenes san bonsans.

⁸ Li pas kot enn lakrwaze. Ayo! Mo trouv li pran sime lakaz enn fam adilter.

⁹ Soley finn kouse, aswar pe vini; pe fer deplizanpli som.

¹⁰ Mo trouv enn fam koste ar li; so labiyman extra sexi; enn sou laont li pena.

¹¹ Li koz for-for ek li san pider. So lipie pa kapav res anplas dan lakaz.

¹² Timama dan lari, timama kot bazar; li nek veye dan tou ti kwin lari pou piez bann ti zenes.

¹³ Li may ti-lom-la, li anbras li; e li dir li avek enn lasirans:

¹⁴ “Mo ti ena enn sakrifis aksiondegras pou ofer; mo finn tini mo promes zordi. Mo ena bon laviann kot mwa.

¹⁵ Mo ti pe rod twa partou; to mem ki mo bizin; aster mo finn trouv twa, mo bien kontan.

¹⁶ Mo finn prepar mo lili avek enn zoli dra; mo dra exotik, an-lin ki sorti Lezip.

¹⁷ Mo finn parfim mo lili, avek parfin lamir, lalwes ek kanel.

¹⁸ Vinn ar mwa! Anou dormi ansam ziska gramatin. Les nou profit sa plezir-la ansam.

¹⁹ Pa traka twa, mo mari pa la; li finn al an-vwayaz pou enn long letan.

²⁰ Li finn sarye boukou lamone; li pa pou retourne avan plennlinn.”

²¹ Fam-la reisi met ti-lom dan siro; li atir li ar so bann parol dou.

²² Ti zenes-la nek swiv li deswit; li ale, kouma enn bef pe al labatwar, so latet bese koumadir serf pe al rant dan piez,

²³ ziska ki enn dibwa pwint transpers so lekor. Li kouma enn zwazo ki pe fons dan file; li pa kone ki so lavi andanze.

²⁴ Aster-la, mo piti, ekout mwa bien; ekout bien sak parol ki mo pe dir:

²⁵ Pa les to leker derape lor so sime, pa les to lipie egare dan so lale.

²⁶ Boukou finn zwenn tase avan twa; boukou finn trouv lamor, mem si zot ti for.

²⁷ Si to rant dan so lakaz, koumadir to finn pas par laport lamor; li amenn twa direk dan lemond bann mor.