Proverb 6 - Nouvo Testaman Kreol Morisien Harmonisation NTPS KM

Danze kan dibout garanti pou enn lot

¹ Mo zanfan, si to finn dibout garanti pou enn vwazin, savedir ki to finn donn to parol.

² To prop labous finn piez twa; to prop parol finn koulout twa.

³ To finn vinn esklav enn kaser. Alor, ala seki to bizin fer: Pa tike, al get li ek sipliy li.

⁴ Pa les somey trap twa; Pa les to popier vinn lour.

⁵ Galoupe kouma enn serf divan so predater; Ras lavi kouma enn zwazo divan zarm saser.

Konsey pou bann pares

⁶ Twa ki pares, obzerv enn fourmi; fer kouma li, e to pou vinn saz.

⁷ Enn fourmi pena sef; li pena ni formenn ni patron.

⁸ Pourtan, li ramas manze dan lete; li ranpli so grenie dan bon sezon.

⁹ Ala to pares la! Ziska kan to pou res lor to lili? Kan to pou deside pou fer enn mouv?

¹⁰ To kas enn ti somey, to fer enn ti lasies; to kas enn poz, to krwaz to lebra.

¹¹ Letansa, lamizer pou tom lor twa kouma enn voler. Lafin, laswaf pou atak twa kouma enn bandi.

Lansegnman pou bann triser

¹² Vorien ek malfeter, pas zot letan fann mansonz.

¹³ Zot pez lizie, zot pil lipie, e zot klak ledwa pou anbet zot viktim.

¹⁴ Zot tir plan modi ar lespri malsin; kot zot pase zot fann dezord.

¹⁵ Akoz sa, maler pou tom lor zot antret; okenn remed pa pou sap zot lavi.

Seki LESEGNER deteste

^16-19 Ena sis kitsoz ki LESEGNER deteste: Regar vantar, lalang manter, lame ki tir lavi inosan, leker ki tir plan modi, lipie ki galoupe pou al komet lemal, labous enn fos temwin ki fann mansonz. Ala enn setiem ki LESEGNER pa siporte: Dimounn ki sem zizani e met dibri ant frer-ser.

Pa komet ladilter

²⁰ Mo zanfan, gard bann komannman to papa; pa bliye bann bon konsey to mama.

²¹ Grav zot touletan dan fon to leker; atas zot otour to likou.

²² Kan to marse, zot pou gid twa; kan to dormi, zot pou vey lor twa; e kan to leve, zot pou konsey twa.

²³ Bann komannman-la kouma enn lalanp dan marenwar; bann lansegnman-la kouma enn lalimier dan lobskirite. Bann repros ek disiplinn pou ouver sime lavi pou twa.

²⁴ Zot pou protez twa kont fam move lavi; Zot pou prezerv twa kont bann parol dimiel fam adilter.

²⁵ Pa les to leker atire ar so bote; Pa les twa gate ar so regar.

²⁶ Enn prostitie kapav donn twa so lekor pou enn bouse manze; me avek fam enn lot zom, to kapav perdi to lavi.

²⁷ Si kikenn sarye labrez dan so pos, eski so linz pa pou pran dife?

²⁸ Si kikenn mars lor dife, eski so lipie pa pou brile?

²⁹ Li parey pou enn zom ki dormi ar fam so prosin; si li fer sa, so konsekans pou bien ser.

³⁰ Kan kikenn kokin, zis pou kalme so lafin, nou pa tro blam li;

³¹ me si proprieter may li, so santans sever. Li pou konfiske tou seki li posede.

³² Me enn zom ki komet adilter, li finn perdi larezon; kan li fer sa, li detrir so prop lavi.

³³ Sa zom-la pou gagn bate, e so repitasion pou gate; touletan li pou viv dan laont ek dezoner.

³⁴ Enn zom, kan so fam tronp li, li zalou e li ankoler; lerla, so vanzans pou terib.

³⁵ Li pa pou aksepte dedomazman; li pou refiz pran kado, ser kouma li ser.