Proverb 5 - Nouvo Testaman Kreol Morisien Harmonisation NTPS KM

Avertisman kont linfidelite

¹ Mo zanfan, pran kont mo bann parol sazes; ouver zorey pou ekout mo bann konsey.

² Koumsa, to pou gagn disernman; e bann bon parol pou sorti dan to labous.

³ Fer atansion! Enn fam adilter, dan so labous, koumadir ena dimiel; so koze pli dou ki siro.

⁴ Me alafin, li vinn amer kouma mazanbron; li fite kouma kouto mousana.

⁵ Si to swiv li, li pou trenn twa dan lamor; so sime desann direk dan lafos.

⁶ Li pa finn swazir sime lavi; li pa mem kone ki li dan sime perdision.

⁷ Aster-la, mo piti, ekout mwa; pa rezet mo konsey.

⁸ Pa koste ar fam move lavi; pa les laport so lakaz tant twa.

⁹ Sinon, to pou perdi to repitasion; e bann dimounn san-pitie pou tir to lavi.

¹⁰ Lerla, bann etranze ki pou profit to rises; lezot ki pou zwir dibien ki to finn ramase ar to laswer.

¹¹ Finalman, kan maladi pou devor to lekor; kan to trouv to lavi pe ale, to pou plengne.

¹² Lerla, to pou dir: “Kifer mo finn vir ledo ar bann avertisman? Kifer mo pa finn pran kont bann repros?

¹³ Mo finn ignor parol mo bann edikater; mo finn rezet bann instriksion mo profeser.

¹⁴ Aster-la, mo dan bor presipis; mo loner finn rwine dan lasosiete.”

Fidelite ek lamour pou so fam

¹⁵ Dan to lakaz, to fam kouma enn lasours dilo kler ki prop. Pa al bwar andeor! Kot tomem ena enn basin dilo fre; rafresi twa.

¹⁶ Pa kit to semans dan tou kwin lari; oubien dan bann plas piblik.

¹⁷ Rezerv to plezir zis pou to fam; pa partaz li avek bann etranze.

¹⁸ To fam marye, li kouma enn lasours beni; zwir lavi ek trouv to lazwa ar li.

¹⁹ To fam ena enn bon leker, li enn bote; ki so lekor atir twa, ki so lamour rann twa fou.

²⁰ Napa rod plezir ar bann fam move lavi; pa les twa atire ar lekor enn fam ki tronp so mari.

²¹ Pa bliye, LESEGNER trouv tou seki bann imin fer; li okouran tou zot bann aksion.

²² Bann malfeter may dan latrap zot prop erer; zot tas dan file zot prop pese.

²³ Zot pou perdi lavi parski zot mank disiplinn; zot pou al dan perdision parski zot foli tro gran.