Proverb 4 - Nouvo Testaman Kreol Morisien Harmonisation NTPS KM

Konsey enn paran

¹ Mo zanfan, ekout konsey to paran; fer atansion, e to pou gagn disernman.

² Mo pe donn twa bon konsey; pa les li glise ale kouma dilo lor bredsonz.

³ Mwa osi mo ti enn ti-garson pou mo papa; Mo mama ti gat mwa kouma enn zanfan inik.

⁴ Mo papa ti ansegn mwa, e ti dir mwa: “Grav mo bann parol dan to leker; rapel bien mo konsey e to pou viv bien.

⁵ Rod touzour lasazes ek disernman; pa vir ledo ar mo bann parol.

⁶ Pa abandonn lasazes e li pou protez twa; kontan li e li pou vey lor twa.

⁷ Pou to vinn saz, devlop lasazes dan twa; rod disernman, parski li pli inportan ki tou seki to posede.

⁸ Kontan lasazes e to pou vinn inportan. Ser li for, napa large, e to pou gagn loner.

⁹ Lasazes pou kouma enn girland zoli fler lor to fron; li pou kouma enn zoli kouronn lor to latet.”

Lasazes donn lavi ek proteksion

¹⁰ Mo zanfan, ekout mwa; pran kont mo parol, e to pou viv lontan.

¹¹ Mo finn ansegn twa sime lasazes; mo finn gid twa lor larout ladrwatir.

¹² Ler to marse, pa pou ena baryer lor to sime; ler to galoupe, to pa pou kogne.

¹³ Gard dan to memwar lansegnman ki to finn gagne; napa les li sape. Vey li bien, kouma to vey to prop lavi.

¹⁴ Pa imit bann move dimounn; pa azir kouma bann malfeter.

¹⁵ Mo piti! Pa frekant zot sime; pran lot direksion, e kontign to larout.

¹⁶ Bann move dimounn pa kapav dormi tanki zot pa fer lemal; zot pa gagn somey tanki zot pa fer enn dimounn ditor.

¹⁷ Zot viv ar mesanste kouma zot dipin; zot pran laviolans kouma zot divin.

¹⁸ Me sime bann zis, li kouma lalimier gramatin; so klarte kontign ogmante ziska soley anler.

¹⁹ Bann move dimounn mars dan sime marenwar; zot kogne, e zot pa kone ar ki.

Swazir sime lavi

²⁰ Zanfan, pran kont mo parol; ekout bien mo bann konsey;

²¹ gard to lizie fixe lor zot; grav zot dan fon to leker.

²² Tou seki met mo bann parol ek mo bann konsey an-pratik, zot pou viv enn bon lavi; zot pa pou met malad dan zot lekor.

²³ Vey bien bann panse ki sorti dan to leker; samem lasours lavi.

²⁴ Pa les mansonz sorti dan to labous; pa les to lalang bate pou koz ninport.

²⁵ Fixe to lizie drwat divan twa; pa les to regar fann de kote.

²⁶ Get bien kot to met to lipie; lerla, to sir to pa pou kogne.

²⁷ Pa devie ni adrwat ni agos; pa koste ar sime lemal.