Proverb 31 - Nouvo Testaman Kreol Morisien Harmonisation NTPS KM

Bann konsey pou enn lerwa

¹ Ala bann parol solanel ki mama Lerwa Lemouel ti ansegn li:

² Ki mo pou dir twa mo garson? Mo finn met twa lor later; mo ti priye pou gagn twa e mo lapriyer finn exose. Aster-la, ekout mwa!

³ Pa fini to kouraz ar bann fam; pa depans to kas ar zot; sa manier lamem ki boukou lerwa finn rwine.

⁴ Lemouel, fodepa ki lerwa tom dan lalkol; fodepa dirizan kontan labwason for;

⁵ sinon, dan soulezon, zot pou bliye ki lalwa dir; e zot pou maltret bann pov.

⁶ Donn lalkol dimounn ki pe mor, donn divin dimounn ki dan tristes;

⁷ les zot bwar pou ki zot bliye zot mizer, pou ki zot bliye zot lapenn.

⁸ Vinn portparol bann dimounn san parol; defann bann dimounn ki finn abandone.

⁹ Koz pou zot! Ziz ar lazistis! Pa ezite pou defann drwa bann dimounn mizer.

Konsernan enn bon fam

¹⁰ Li bien difisil trouv enn fam parfe! Li pli presie ki bann bizou gran valer.

¹¹ So mari fer li foul konfians, e zame li pa pou mank nanye.

¹² Fam-la pou bon avek so mari ziska so dernie souf; zame li pou fer li dimal.

¹³ Li rod bon lalenn ek bon latwal an-lin; li gagn lazwa pou travay ek so lame.

¹⁴ Li kouma bato marsandiz; li amenn so manze depi lwin.

¹⁵ Li lev boner gramatin, pou prepar manze so fami; e li organiz travay bann servant.

¹⁶ Li kone kan kapav aste enn later; ar so prop lamone, li fer plant enn karo rezin.

¹⁷ Li travay ar kouraz; e zame li pa res nanye fer.

¹⁸ Li veye ki so travay fer profi; so lalanp res alime ziska tar dan aswar.

¹⁹ Li fabrik so prop difil; li tis so prop latwal.

²⁰ Li zenere ar dimounn pov; li pa ezite pou ed bann malere.

²¹ Li pa per kan lanez tonbe dan liver; parski, dan so lakaz, tou dimounn ena bon linz.

²² Li fabrik dra lili ek molton; bann linz an-lin ki li mete, enn veritab bote.

²³ So mari ena bon repitasion e li sieze parmi bann lider dan pei.

²⁴ Fam-la koud linz e li fabrik sintir; li vann zot ar bann marsan.

²⁵ Li enn fam for ki tou dimounn respekte; so lavenir asire.

²⁶ Li koz avek lasazes; li donn lansegnman avek bonte.

²⁷ Li pran bien swin so fami; lapares pa koste ar li.

²⁸ So bann zanfan ador li; so mari admir li e felisit li.

²⁹ Mari-la dir li: “Ena boukou fam ki fer bon travay, me twa, to depas zot enn may.”

³⁰ Laparans tronper; labote efemer; me enn fam ki respekte LESEGNER, merit nou loner.

³¹ Rekonpans li pou so louvraz; e felisit li anpiblik pou so travay.