Proverb 30 - Nouvo Testaman Kreol Morisien Harmonisation NTPS KM

Bann parol Agour

¹ Bann parol solanel Agour, garson Yake. Ala seki sa zom-la ti dir: Bondie, mo dekouraze! Twa, to pa la! Kouma mo pou viv?

² Li vre ki mo pli bet ki bann lezot dimounn; mo pena disernman ki lezot ena.

³ Mo pena lasazes e mo pa konn nanye lor Bondie.

⁴ Eski kikenn finn deza mont dan lesiel, apre finn redesann? Eski kikenn finn deza may divan dan so pla lame? Eski kikenn finn deza anvlop lamer dan so linz? Kisann-la ki finn mizir later e donn li so limit? Kouma li apele? Kisann-la so zanfan? Si to kone, dir mwa!

⁵ Tou seki Bondie dir, li vre; li enn boukliye pou dimounn ki rod so sekour.

⁶ Pa azout nanye ar parol Bondie, sinon, li pou repros twa e to pou pas pou enn manter.

⁷ Bondie, mo dimann twa zis de kitsoz; akord mwa sa avan mo mor:

⁸ Pa les mwa dir bann foste ek bann mansonz; pa fer mwa vinn ni tro ris ni tro pov. Donn mwa zis manze ki mo bizin pou viv.

⁹ Si mo vinn tro ris, mo kapav bliye twaSEGNER. E si mo vinn tro pov, mo kapav vinn enn voler e dezonor twa, mo Bondie.

¹⁰ Pa fer palab kont enn travayer ar so patron; sinon, travayer-la pou modi twa, e to pou peye pou sa.

¹¹ Ena dimounn ki modi zot papa; e pena respe pou zot mama.

¹² Ena dimounn ki krwar zot parfe, me an-verite, zot sal ar pese.

¹³ Ena dimounn ki ranpli ar lorgey; zot get lezot ar mepri.

¹⁴ Ena dimounn, koumadir zot ena ledan rekin, ouswa ledan enn zanimo feros. Telman zot dominer, zot oule devor tou bann pov; zot oule fini tou bann malere.

^15-16 Enn sansi ti ena de zanfan; zot ti zis konn dir: “Donn ankor! Donn ankor!” Ena trwa kitsoz ki zame pa satisfe: lamor, enn fam steril, ek enn later sek. Ena enn katriem ki zame dir, “ase”: dife! Tanki li gagne, li brile.

¹⁷ Zanfan ki mepriz so papa, e dezobeir so mama, korbo pou bek so lizie e votour pou devor so kadav.

^18-19 Ena trwa mister ki mo pa konpran: Kouma leg anvole dan lezer, kouma serpan ranpe lor ros, e kouma bato trouv so sime omilie lamer. Ena enn katriem mister ki mo pa konpran: Kouma enn zennzan ek enn zennfi tom amoure.

²⁰ Ala manier enn adilter: Li manze, li souy so labous, e li dir: “Mo pa finn fer nanye demal!”

^21-23 Trwa kiksoz fer later tranble: Kan enn esklav vinn lerwa, kan enn bet ena plis manze ki bizin; kan enn fam detestab reisi marye. Ena enn katriem ki fer later savire: Kan enn servant pran plas madam dan lakaz.

²⁴ Lor later, ena kat kreatir ki bien tipti, me zot bien debrouyar:

²⁵ bann fourmi kapav feb, me dan lete, zot konn ramas manze pou letan dir;

²⁶ bann daman pena pouvwar, me zot konn aranz zot lakaz dan fant ros;

²⁷ sotrel pena sef, me zot deplase kouma solda dan parad;

²⁸ sitan bann geko tipti, to kapav trap zot dan to lame, me pourtan, zot kapav rant dan pale lerwa.

^29-31 Ena trwa kreatir ki zoli pou gete dan zot demars: Lion, lerwa zanimo, li pa kile divan personn; enn kok ki dres lor so lapat, ek enn bouk. Ena enn katriem ki ena enn demars bien fier: Enn lerwa ki mars antet so larme.

³² Si to finn deklar tenor kouma bann bet, si to finn tir plan pou fer lezot dimal, aster, ferm labous, res trankil!

³³ Kan to bat lakrem dile, to gagn diber; kan to gagn kou lor nene, disan koule; me kan to provok lakoler, to ava gagn lager.