Proverb 3 - Nouvo Testaman Kreol Morisien Harmonisation NTPS KM

Respe pou Bondie

¹ Mo zanfan, pa bliye mo lansegnman, dan fon to leker, to ava gard mo bann komannman.

² Koumsa, to pou viv lontan e to pou ere dan to lavi.

³ Pa les sinserite ek fidelite kit twa; Atas zot otour to likou; grav zot dan to leker.

⁴ Alor, Bondie ek bann dimounn pou kontan twa, e zot pou estim twa.

⁵ Zame pa krwar ki to enn gran koneser; me fer LESEGNER konfians ar tou to leker.

⁶ Rekonet li dan tou to proze, e li pou ekler to sime.

⁷ Zame pa krwar ki to tro saz; me respekte LESEGNER e evit lemal.

⁸ Sa pou geri to blesir; sa pou fortifie to lekor.

⁹ Glorifie LESEGNER ar tou seki to posede; ofer li premie rekolt to karo.

¹⁰ Lerla, to grenie pou garni ar manze; to damzann pou ranpli ar divin.

¹¹ Mo zanfan, pa mepriz disiplinn LESEGNER; pa vir ledo ar so repros;

¹² parski LESEGNER koriz sa-enn ki li kontan la; parey kouma enn paran koriz zanfan ki li prefere.

Valer lasazes

¹³ Li ere sa dimounn ki dekouver lasazes la; e ki ena lintelizans pou konpran.

¹⁴ Seki lasazes donn li, pli presie ki larzan, e so valer pli for ki lor.

¹⁵ Lasazes pli presie ki bann bizou gran valer, li pli inportan ki tou seki enn dimounn kapav dezire dan so leker.

¹⁶ Enn kote, li ed nou pou viv lontan; lot kote, li donn nou larises ek loner.

¹⁷ Li enn gran plezir pou mars lor sime lasazes, so bann santie donn lazwa ek lape.

¹⁸ Lasazes kouma enn pie ki donn lavi bann ki trap li; bann ki konn gard lasazes, pou apel zot bienere.

Lasazes Bondie dan kreasion

¹⁹ LESEGNER, dan so sazes, finn kree later; avek so konesans, li finn kree lesiel.

²⁰ Par so kapasite, li finn fer dilo souterin sourse, e li finn fer niaz devers lapli.

Bondie protez bann ki saz

²¹ Mo zanfan, atas twa ar lasazes ek lintelizans; Pa les zot kit twa enn pous.

²² Zot pou donn twa enn zoli lavi; zot pou kouma enn kolie gran valer otour to likou.

²³ Lerla, to sime pou kler ek sir, e to lipie pa pou kogn ar ros.

²⁴ Ler to pe alonze, to pa pou gagn per; e lor to lili, to pou dormi trankil.

²⁵ Pa bizin per kan tanpet bate; pa trakase kan siklonn kraz lor bann move dimounn.

²⁶ LESEGNER pou protez twa; li pou anpes to lipie rant dan piez.

Konn viv bien ar to prosin

²⁷ Zame pa refiz ed bann dimounn ki merite; fer dibien tanki to kapav.

²⁸ Pa dir to vwazin: “pase plitar,” kan to bien kapav ed li aster-la mem.

²⁹ Pa tir plan pou fer ditor to vwazin, ki viv pre kot twa e ki fer twa konfians.

³⁰ Pa dispit ar dimounn san rezon kan personn pa finn fer twa ditor.

³¹ Pa zalou enn dimounn violan, e pa swiv so manier.

³² LESEGNER deteste bann move dimounn, me li estim bann ki onet.

³³ LESEGNER modi fami bann malfeter; me li beni fami bann ki viv dan ladrwatir.

³⁴ Li mepriz bann vantar ek bann arogan; me li donn so faver bann ki mars dan limilite.

³⁵ Bann saz gagn loner ek bon repitasion; Bann vantar fini dan laont.