Proverb 29 - Nouvo Testaman Kreol Morisien Harmonisation NTPS KM

¹ Seki touletan rezinbe kan gagn repros, maler pou tom lor li antret. Okenn remed pa pou sap so lavi.

² Kan bann dimounn drwat opouvwar, lepep ena lazwa dan leker; me kan enn diktater gouverne, lepep pas mizer.

³ Zenes ki rod lasazes, fer so paran kontan; me zenes ki frekant prostitie, gaspiy tou so larzan.

⁴ Lerwa ki gouvern ar lazistis, fer so pei prospere; me dirizan ki tom dan koripsion, fer so pei rekile.

⁵ Dimounn ki nek met so vwazin dan siro, pe rod met vwazin-la dan leto.

⁶ Si to viv dan lemal, to pou may dan to prop piez; me si to viv onet, to pena traka e to kapav selebre dan lazwa.

⁷ Bann bon dimounn rekonet drwa bann pov; bann move dimounn tro bet pou konpran sa.

⁸ Bann konploter, fasil zot soulev enn emet dan pei; me bann saz fer tou pou kalme lakoler lepep.

⁹ Twa ki saz, pa gagn zafer avek enn bet; li pou kriye, zoure ek rikane, e to pa pou trouv okenn solision.

¹⁰ Bann asasin deteste dimounn onet; me bann zis protez zot.

¹¹ Enn dimounn bet sap lor kal brit; enn dimounn saz konn kontrol so lemosion.

¹² Si enn dirizan ekout palab, tou so lantouraz pou vinn malonet.

¹³ Pov ek opreser ena enn kiksoz an-komin: LESEGNER finn fer toule-de trouv soley.

¹⁴ Enn dirizan ki pa kraz bann pov, li pou regn lontan.

¹⁵ Disiplinn ek koreksion bien inportan pou edik zanfan; enn zanfan malelve fer so mama onte.

¹⁶ Kan move dimounn pran pouvwar, krim ogmante; me enn zour zot pou tonbe, e bann bon dimounn pou trouve.

¹⁷ Disiplinn to zanfan bien, to pou konn lape; zot pou met lazwa dan to leker.

¹⁸ Kan dirizan pena vizion, lepep pena kontrol; me bienere dimounn ki respekte lalwa Bondie.

¹⁹ Zis parol pa ase pou koriz enn ti-lespri; li kapav tande, me li pa pou sanze.

²⁰ Milfwa to gagn zafer ek enn inioran, ki to gagn zafer ek enn dimounn ki koze san reflesi.

²¹ Si touletan to donn to travayer tou seki li dimande, enn zour li pou fer gran-nwar ar twa.

²² Dimounn ki sap lor kal vit, li amenn dezord; e dimounn ki sofe vit, li sem diskord.

²³ Kan to viv ek lorgey, enn zour to pou abese; me si to viv ek limilite, enn zour to pou onore.

²⁴ Si to konplis enn voler, to lavi bien amer; to kone Bondie pou pini twa, me to pa kapav devwale.

²⁵ Si nou per lezot, nou lavi pieze; me si nou fer LESEGNER konfians, nou an-sekirite.

²⁶ Dimounn rod faver bann ki dan pouvwar; me zis LESEGNER ki donn li seki li merite.

²⁷ Bann dimounn onet ay linzistis; me bann malfeter ay dimounn onet.