Proverb 27 - Nouvo Testaman Kreol Morisien Harmonisation NTPS KM

¹ Aret fer gran-nwar konsernan dime; parski personn pa kone ki kapav arive zordi.

² Pa lev tomem anler, les enn lot flat twa; mem enn etranze kapav felisit twa, me pa fer li tomem.

³ Enn ros pez lour, disab osi; me provokasion enn bet pli lour ankor.

⁴ Laviolans fer per, lakoler danzere; me zalouzi pli terib ki toule-de.

⁵ Enn kritik fran ek onet li meyer ki enn santiman ki res andan.

⁶ Mem si enn kamarad repros twa kitsoz, to kapav fer li konfians; me si enn lennmi vinn anbras twa, pran kont!

⁷ Kan to vant plin, dimiel osi to pou refize; me kan to afame, mem margoz to pou anvi manze.

⁸ Enn dimounn ki lwin ar lakaz so fami, li kouma enn zwazo ki lwin ar so nik.

⁹ Parfin ek delwil esansiel met lazwa dan leker; me nanye pa bat lamitie enn kamarad sinser.

¹⁰ Pa rezet to kamarad, ni kamarad to papa. Si to bizin led, pa al rode kot fami reste; enn vwazin akote, pli sir ki enn fami ki res lwin.

¹¹ Mo zanfan, viv ar lasazes; to ava met mo leker dan lazwa. Lerla, mo pou ena repons pou dimounn ki kritik mwa.

¹² Enn dimounn intelizan, li konn evit maler; enn inioran, nek bes latet fonse. Lerla, li zwenn tase.

¹³ Si kikenn ase bet pou garanti det enn etranze, li merite kan pran so prop dibien pou ranbours det-la.

¹⁴ Si gramatin boner to lev to vwazin pou dir li bonzour for-for, koumadir to pe insilte li.

¹⁵ Enn partner ki manz lavi touletan, li kouma lapli ki pa aret tonbe;

¹⁶ si to sey aret li, koumadir to pe sey aret divan soufle, ouswa to pe rod trap delwil dan to lame.

¹⁷ Feray fit feray; dimounn transform dimounn.

¹⁸ Si to okip to pie fri, to pou manz so fri; si to okip lintere to patron, to pou gagn loner.

¹⁹ Get dan laglas, to pou trouv to figir; get dan to leker, to pou trouv to karakter.

²⁰ Lamor zame satisfe, pli li gagne li pran. Bann imin osi parey, zame zot satisfe ar seki zot ena.

²¹ Nou konn kalite lor ek larzan atraver dife; nou konn valer enn dimounn atraver so repitasion.

²² Ninport ki kantite bate to pou bat enn bet, li pa pou aret fer betiz.

²³ Get bien lasante to zanimo; pran bien kont to troupo.

²⁴ Parski larises, pa dir lontan, kouma regn enn lerwa pa dir touletan.

²⁵ Kan to finn fini koup lerb, li repouse; kan to al ramas lerb lor flan kolinn pou nouri to zanimo,

²⁶ to bann mouton pou abiy twa, to bann troupo pou permet twa aste later.

²⁷ Pou ena ase dile pou nouri twa ek to fami; anplis, to pou kapav nouri to bann serviter ek servant.