Proverb 26 - Nouvo Testaman Kreol Morisien Harmonisation NTPS KM

¹ Eski lanez tonbe dan lete? Eski lapli tonbe dan sezon sek? Parey! Loner pa ale ar enn dimounn bet.

² Kouma mwano vir-vire dan lesiel, kouma zirondel tourn-tourne dan lezer, malediksion san fondman pa pran lor personn.

³ Enn kravas pou seval, enn baton pou bourik, enn rotin pou ledo enn bet.

⁴ Pa kas latet reponn enn bet; sinon to pou abes twa net.

⁵ Si to reponn enn bet, fer li kone li bet; sinon, li pou pran li pou enn fwet.

⁶ Si to swazir enn bet pou pas to mesaz, koumadir to pe koup to prop lipie; to pe invit traka.

⁷ Enn parol saz dan labous enn bet, li feb kouma lipie enn paralize.

⁸ Si to felisit enn bet, li koumadir to pe met enn ros dan enn fles. Tansion blese!

⁹ Enn proverb dan labous enn bet, li kouma enn kouto dan lame soular.

¹⁰ Si enn patron anplway enn bet ouswa enn soular, koumadir li pe tir kout fles lor tou dimounn.

¹¹ Enn bet ki repet mem betiz, wadir enn lisien ki remanz so vomi.

¹² Mil fwa to zwenn enn bet, ki to zwenn enn dimounn ki deklar saz.

¹³ Enn pares dir: “Ena enn lion deor! Ena danze partou!”

¹⁴ Enn laport vire-tourne lor so gon; enn pares vire-tourne lor so lili.

¹⁵ Enn pares met lame dan lasiet manze, me li tro fatige pou met manze-la dan so labous.

¹⁶ Enn pares krwar ki li pli malin ki bann dimounn ki ena disernman.

¹⁷ Si to met to nene dan bagar ki pa konsern twa, koumadir to pe trap zorey enn move lisien.

^18-19 Kan kikenn trik so prosin, apre dir: “Mo ti pe badine,” li parey kouma enn fou ankoler ki pe tir kout bal brit-brit.

²⁰ Kan nepli ena dibwa, dife tengn; kan nepli ena palab, dispit arete.

²¹ Parey kouma sarbon fer labrez ek dibwa nouri dife, enn palabrer nouri laenn ek konfli.

²² Parol palab, li kouma enn manze ki finn bien prepare; li fondan dan labous e li fasil pou dizere.

²³ Lapintir kasiet defo lor dibwa, me zoli parol kasiet mesanste ki dan leker.

²⁴ Enn ipokrit kasiet so laenn dan so bann parol dou; me dan so leker, li pe mont enn move kou.

²⁵ Kan to lennmi flat twa ar zoli parol, pa krwar li; parski so leker ranpli ar lafoli.

²⁶ Li kapav ase rize pou kasiet so laenn, me enn zour, so mesanste pou paret anplin lizour.

²⁷ Si to fouy trou pou piez lezot, tomem ki pou tom ladan; si to koumans roul enn gro ros, li pou retourn lor tomem.

²⁸ Lalang manter deteste so viktim; kikenn ki met dan siro rwinn dimounn ki li flate la.