Proverb 25 - Nouvo Testaman Kreol Morisien Harmonisation NTPS KM

Ankor diferan proverb Salomon

¹ Ala ankor plizir proverb Salomon, ki ti kopie par bann skrib Ezekias, lerwa Zida.

² Nou glorifie LESEGNER parski so bann aksion res bann gran mister; nou glorifie lerwa parski li desifre bann mister-la.

³ Parey kouma nou pa konn oter lesiel ouswa profonder lamer, zame nou pou konn profonder panse enn lerwa.

⁴ Tir verdigri ki kouver larzan, e bizoutie pou kapav fasonn bann obze presie.

⁵ Met tou froder deor dan lantouraz lerwa, lerla, li pou gouvern ar lazistis, e so pouvwar pou grandi.

⁶ Pa fer vantar dan prezans lerwa; pa sey pran plas seki pli gran ki twa.

⁷ Parski li boukou pli bon kan gagn promosion, ki kan perdi grad divan enn sef.

⁸ Kan to finn trouv kiksoz, pa prese pou met zafer lakour. Si to adverser prouve ki to ena tor, lerla, to latet pou bese ar laont.

⁹ Sey regle problem an-prive ar to vwazin; pa bizin devwal sekre personn.

¹⁰ Dimounn pou akiz twa pou difamasion, e sa pou touzour rwinn to repitasion.

¹¹ Enn parol bien kalkile, li kouma enn desin an-or lor enn plato an-arzan.

¹² Enn bon konsey, li kouma enn zano gran valer pou zorey ki ekoute.

¹³ Enn serviter fidel ek onet soulaz langwas so met, kouma dilo lasours, rafresi bann kouper kann anplin lete.

¹⁴ Dimounn ki touletan promet kado, me zame pa done, li kouma niaz ek divan ki zame donn lapli.

¹⁵ Avek pasians, to kapav fer to sef sanz lide; douser dan langaz fer baraz tonbe.

¹⁶ Si to finn dekouver dimiel, pa fer gourman; manz zis, pou ki to pa gagn maloker apre.

¹⁷ Pa tro met nene kot to vwazin, sinon, li pou plin ar twa e li pou koumans deteste twa.

¹⁸ Si to akiz to prosin pou nanye, koumadir to pe atak li ar baton, fles ek lepe.

¹⁹ Si to fer konfians enn dimounn malonet dan to maler, koumadir to pe manze ar enn ledan bouze, ouswa to pe marse ar enn lipie foule.

²⁰ Pa sant bann sante lazwa ar enn dimounn ki dan tristes, li koumadir to pe tir to linz dan freser, ouswa to pe vid lalkol lor enn ple.

²¹ Si to lennmi gagn fin, donn li manze; si li swaf, donn li bwar.

²² Sa pou rann li malalez. So latet pou sofe, koumadir ena labrez. Lerla, LESEGNER pou rekonpans twa.

²³ Divan Lenor amenn lapli lete, palab amenn lakoler.

²⁴ Prefer dormi deor dan kwin lakaz, ki dan lakaz avek enn partner gran labous.

²⁵ Parey kouma dilo fre apez nou laswaf, enn bon nouvel fer nou leker kontan.

²⁶ Kan enn bon dimounn kapitile divan enn malfeter, li parey kouma labou dan dilo, ouswa pwazon dan lasours.

²⁷ Li pa bon manz tro boukou dimiel; li pa bon osi, kan to rod tro boukou loner.

²⁸ Enn dimounn ki pa kontrol so koler, li kouma enn lavil san defans divan lennmi.