Proverb 24 - Nouvo Testaman Kreol Morisien Harmonisation NTPS KM

19

¹ Pa rod fer kouma bann move dimounn; pa ni frekant zot.

² An-efe, dan zot panse ena zis violans; zis mesanste ki sorti dan zot labous.

20

³ Ar lasazes nou aranz enn lakaz; ar disernman nou fer li vinn pli solid.

⁴ Avek lexperyans nou ranpli bann lasam ar bann zoli obze valer.

21

⁵ Enn dimounn saz, li pli siperyer ki enn dimounn for; enn gran servo pli inportan ki zis lafors fizik.

⁶ Si to konn servi to lespri, sa pou ed twa kont to lennmi; kan to ena boukou bon konseye, laviktwar asire.

22

⁷ Lasazes tro difisil pou enn bet; kan dimounn saz zwenn ansam, bann bet pena nanye pou dir.

23

⁸ Si touletan to tir plan pou fer lemal, dimounn pou apel twa malfeter.

⁹ Enn malfeter, so program nek fer pese; personn pa kontan enn vantar arogan.

24

¹⁰ Si to bes lebra dan letan difisil, savedir to feb.

25

¹¹ Pa ezite pou al sekour enn inosan ki finn kondane amor; sap lavi dimounn ki pe kabose pou al divan bouro.

¹² Kapav to pou dir: “Mo pa ti kone.” Me, pa bliye, Bondie konn to leker. Li konn tou seki to fer; li pou rekonpans twa dapre to bann aksion.

26

¹³ Mo zanfan, dimiel bon pou manze; li dou dan labous.

¹⁴ Konpran mo zanfan, lasazes kouma dimiel pou to nam; kan to ena li, to lavenir asire, e to lespwar pa pou tom dan dilo.

27

¹⁵ Pa fer kouma bann malfeter ki vey lokazion pou atak fami bon dimounn; pa devaliz lakaz dimounn drwat.

¹⁶ Ninport komie fwa bon dimounn tonbe, li pou releve; me bann malfeter fini dan maler.

28

¹⁷ Pa bizin zibile kan to lennmi tonbe; pa sote-pile kan li kogne.

¹⁸ LESEGNER pa pou kontan kan li trouv sa; e li pa pou pini li.

29

¹⁹ Pa kas to latet ar bann move dimounn; pa rod vinn kouma zot;

²⁰ parski move dimounn pena lavenir; zot lavi pou tengn vit, kouma lalanp san petrol.

30

²¹ Mo zanfan, respekte LESEGNER e respekte lerwa; pa rant kamarad ar lennmi LESEGNER, ni ar lennmi lerwa.

²² Parski toule-de ena pouvwar pou rwinn twa. Personn pa kone ki maler zot kapav avoye.

Ankor inpe parol lasazes

²³ Ala proverb dimounn saz: Enn ziz pa gagn drwa get ar de lizie.

²⁴ Si enn ziz dir enn koupab: “To inosan,” dimounn pou modi li, lepep pou deteste li.

²⁵ Me si ziz-la pini bann koupab, li pou gagn loner ek boukou benediksion.

²⁶ Enn repons onet, li enn prev lamitie.

²⁷ Okip to lakour, prepar to terin avan; apre to kapav aranz to lakaz.

²⁸ Pa akiz to vwazin san rezon; pa bizin koz manti.

²⁹ Zame pa dir: “Mo pou tret li kouma li finn tret mwa; bate rande pa fer dimal.”

Pa fer pares

³⁰ Mo ti pas kot karo enn pares; kot plantasion enn bet.

³¹ Move lerb ti pe nate partou; pie pikan ti pe fer lalwa; ek miray ti finn grene dan boukou landrwa.

³² Mo ti arete, gete, reflesi; leson la ti bien kler:

³³ Kan kas poz fer somey, kan krwaz lebra repoze,

³⁴ lamizer atak twa kouma enn voler, lafin ek laswaf tom lor twa kouma enn bandi.