Proverb 23 - Nouvo Testaman Kreol Morisien Harmonisation NTPS KM

6

¹ Si to invite pou manze kot enn dimounn inportan, to bizin ena enn bon konportman.

² Si to lapeti feros, konn kontrol twa.

³ Pa les twa tante par so bann manze rar; sa kapav rann twa malad.

7

⁴ Aret touy lekor pou vinn ris; les lasazes gid twa. Lerla, to pou kone kan bizin dir non.

⁵ Apenn to get to larzan dan to lame, li rod sime ale; li met lezel, li mont dan lezer kouma zwazo.

8

⁶ Refiz al manze kot enn dimounn peng; pa dezir so bann manze rar;

⁷ parski li touletan fer kont. Ar so labous li pou dir twa: “manz ankor, bwar ankor!” Me dan so leker li pa sinser.

⁸ Apre sa, to pou vomi seki to finn manze; lerla, bann parol remersiman ki to finn dir li, pa pou servi nanye.

9

⁹ Pa gaspiy to bann parol sazes ar enn dimounn san-konpran; li pou mepriz valer to parol.

10

¹⁰ Pa deplas bann vie born; Pa kokin later bann orfelin san defans;

¹¹ LESEGNER, zot defanser, li pwisan. Li pou pled zot ka kont twa.

11

¹² Grav lansegnman ki to finn gagne dan to leker; ouver to zorey pou ekout bann parol ki donn konesans.

12

¹³ Pa ezite pou koriz enn zanfan; enn ti-kout rotin pa pou touy li.

¹⁴ Okontrer, sa pou ed li e pou tir li dan sime lamor.

Konsey enn paran pou so zanfan 13

¹⁵ Mo zanfan, si to vinn saz, mo leker pou dan lazwa.

¹⁶ Mo pou bien fier, kan mo pou tann twa koz bann parol konesans.

14

¹⁷ Pa bizin zalou bann move dimounn; respekte LESEGNER sak zour to lavi.

¹⁸ Lerla, to pou ena enn bon lavenir, e to lespwar pa pou tom dan dilo.

15

¹⁹ Mo piti, ekout mwa e to pou vinn saz; diriz to pa lor sime ladrwatir.

²⁰ Pa frekant soular; Pa frekant voras.

²¹ Soular ek voras pou fini lor lapay. Si to nek manze-bwar apre to dormi, biento to pou met kostim goni.

16

²² Ekout to papa ki finn donn twa lavi; pa abandonn to mama kan li dan laz.

²³ Touletan rod laverite, zame pa rezet li; kiltiv lasazes, linstriksion ek disernman.

²⁴ Kan enn zanfan amenn enn bon lavi, so paran ranpli ar lazwa; leker enn paran kontan kan so zanfan saz.

²⁵ Fer to paran kontan; donn lazwa to mama ki finn met twa lor later.

17

²⁶ Mo zanfan, fer mwa konfians; swiv mo lexanp dan lazwa.

²⁷ Enn prostitie, li kouma enn piez pou twa; enn fam adilter, li kouma enn latrap.

²⁸ Li vey lokazion kouma enn voler. Li finn fini kas boukou menaz.

18

²⁹ Kisann-la ki dan traka e pe regrete? Kisann-la nek sipote e dispite? Kisann-la nek gagn dimal pou nanye? Kisann-la so lizie touletan rouz?

³⁰ Bann ki touletan dan tavern; bann ki nek bwar melanz.

³¹ Pa les twa tante ar larak; pa les li atir twa ar so kouler ek so lekim; dan labous li bon, li glise, li desann.

³² Me alafin to pou konn so refrin, ler li mord twa kouma serpan.

³³ Maloker pou fer twa trouv zekler; to pou delire, to pou rabase.

³⁴ To latet pou vire; to pou balans dekote kouma enn bato dan tanpet.

³⁵ To pou dir: “Zot ti bat mwa, me mo pa rapel; mo finn gagn dimal, me mo pa santi. Kan pou gramatin? Mo bizin enn topet pou kas malad latet.”