Proverb 22 - Nouvo Testaman Kreol Morisien Harmonisation NTPS KM

¹ Enn bon repitasion meyer ki enn gran rises; loner vo plis ki lor ek larzan.

² Ris ek pov ena enn kitsoz an-komin: LESEGNER finn kree toule-de.

³ Dimounn intelizan trouv problem vini e li pran prekosion; bann ki pa reflesi fons drwat, e zot pey konsekans.

⁴ Mars avek limilite e respekte LESEGNER; lerla, to pou viv lontan e to pou gagn rises ek loner.

⁵ Ena pikan ek piez lor sime move dimounn; dimounn pridan res lwin ar sa sime-la.

⁶ Montre enn zanfan bon manier viv depi li tipti; li pou met sa an-pratik mem kan li finn vinn vie.

⁷ Dimounn ris dominn lor dimounn pov; bann anprinter vinn esklav bann kaser.

⁸ Kan to sem linzistis, to rekolte maler; e to koler pou anvol dan ler.

⁹ Bann dimounn ki ena bon leker pou gagn benediksion, parski zot partaz zot manze ar bann pov.

¹⁰ Si to anvi aret enn dispit, met bann insolan deor; lerla, pa pou ena ni lager ni insilt.

¹¹ Si to leker prop e si to koz avek bonte, lerwa, limem pou vinn to kamarad.

¹² LESEGNER veye ki laverite triyonfe e li kas plan bann manter.

¹³ Bann pares res lakaz, zot dir: “Ena enn lion deor pou manz mwa.”

¹⁴ Labous enn fam move lavi, li kouma enn lafos profon; seki atir lakoler LESEGNER pou tom ladan.

¹⁵ Li normal ki zanfan fer betiz. Me disiplinn zot! Lerla, zot pou sanze.

¹⁶ Si to rod vinn ris lor ledo bann pov, e si to donn kado bann ris, enn zour, twa ki pou vinn pov.

Bann konsey enn saz

¹⁷ Ouver to zorey e ekout parol dimounn saz; met an-pratik mo bann lansegnman.

¹⁸ To pou ere, si to gard zot dan to leker, e lor to lalev.

¹⁹ Mo anvi to met to konfians dan LESEGNER, akoz sa, zordi, mo pe dir twa sa bann parol lasazes la.

²⁰ Pou twa mo finn ekrir trant konsey, bann parol konesans ek sazes.

²¹ Sa bann konsey-la pou fer twa kone ki bon e ki vre; to pou konn donn bon repons kouma enn bon mesaze.

1

²² Pa kokin enn pov zis parski li mizer; e pa kraz kikenn ki pena mwayin pou pran enn avoka.

²³ An-efe, LESEGNER pou pled pou li e pou konfiske to lavi, kouma to finn konfiske dibien enn malere.

2

²⁴ Pa rant kamarad ar dimounn ki sap lor kal brit-brit; pa frekant dimounn ki sofe pou enn wi, pou enn non;

²⁵ parski to kapav vinn kouma li, e may dan enn latrap.

3

²⁶ Pa fer erer donn parol pou garanti det lezot.

²⁷ Tansion, si to pa kapav ranbourse, bann-la pou vinn tir twa lor to lili e pou pran tou to dibien.

4

²⁸ Pa kokin propriete to vwazin; pa deplas bann born ki to anset finn mete.

5

²⁹ Get bien sa artizan ki fer so travay bien la; lerwa pou angaz li, e li pou nepli bizin travay pou etranze.