Proverb 20 - Nouvo Testaman Kreol Morisien Harmonisation NTPS KM

¹ Divin fer twa vinn tapazer, lalkol fer twa rod lager; dimounn ki dan soulezon zame vinn saz.

² Kan lerwa ankoler li kouma enn lion ki pe grogne; pa ogmant so koler, to pou fini sis pie anba later.

³ Ninport ki fezer kapav lev lager; me li enn loner pou dimounn ki konn evit lager.

⁴ Planter pares pa prepar karo dan bon sezon; ler rekolt vini, zero plonbaz.

⁵ Panse dan leker enn dimounn, li profon kouma dilo kler anba later; bizin enn lespri fite pou fer li monte.

⁶ Tou dimounn lor later dir ki zot sinser; an-verite, pena boukou ki to kapav vremem fer konfians.

⁷ Bienere bann zanfan, si zot paran amenn enn lavi san repros.

⁸ Enn vre dirizan, li enn bon ziz; li konn detekte seki move.

⁹ Personn pa kapav dir ki so konsians kler; personn pa kapav pretann ki li pena pese.

¹⁰ Kan pwa ek mizir trike, LESEGNER deteste.

¹¹ Mem enn zanfan montre ki li ete par so konportman; fasil pou kone si li bon, si li onet.

¹² LESEGNER finn donn nou lizie pou gete, ek zorey pou ekoute.

¹³ Si to pas letan dormi, to pou lor lapay, me to katora pou plin si to leve, to al travay.

¹⁴ kliyan plengne kan aste; me kan fini aste li blage.

¹⁵ Bann parol konesans pli presie ki boukou lor ek pier presie.

¹⁶ Si kikenn ase bet pou garanti det enn etranze, li merite kan ipotek so dibien kouma garanti.

¹⁷ Manze kokin, li bien dou dan labous, me bien vit li vinn gravie anba ledan.

¹⁸ Swiv bon konsey si to anvi to proze reisi; reflesi bien avan to azir.

¹⁹ Palabrer pa konn gard sekre. Pa frekant dimounn ki nek blage.

²⁰ Si to modi to paran, to lavi pou tengn avan ler, kouma enn lalanp dan lanwit.

²¹ Lamone fasil, mal gagne; li pa pou profit twa plitar.

²² Pa pran lalwa dan to lame; met dan lame LESEGNER, limem Ziz.

²³ LESEGNER pa kontan kan trik balans; li malonet kan fos mizir.

²⁴ LESEGNER, limem ki diriz nou pa; akoz sa, souvan nou pa konpran kot nou pe ale.

²⁵ Pans bien avan to promet LESEGNER enn lofrand. Pa fer enn serman ki to pou regrete! Li bien danzere!

²⁶ Enn bon dirizan kone kisann-la ki move; li pou pini zot san pitie.

²⁷ LESEGNER finn donn nou enn konsians kouma enn lalanp; li explor nou leker.

²⁸ Enn lerwa res opouvwar kan li bon ek onet; so fidelite rann so tronn pli solid.

²⁹ Fierte zenes dan zot lafors; me seve blan fer bote gran-dimounn.

³⁰ Parfwa bizin gagn bate pou nou manier sanze; souvan bizin gagn dimal pou leker transforme.