Proverb 2 - Nouvo Testaman Kreol Morisien Harmonisation NTPS KM

¹ Mo zanfan, pran kont mo parol; gard mo bann instriksion kouma enn trezor.

² Ouver to zorey ekout lasazes, e grav so mesaz dan to leker.

³ Wi, kontign sipliye pou to gagn disernman, pa aret insiste pou to gagn konpreansion.

⁴ Mo zanfan, rod lasazes kouma larzan, resers li kouma enn trezor.

⁵ Lerla, to pou konn respekte LESEGNER e vremem, to ava konn Bondie.

⁶ Parski LESEGNER, limem lasours lasazes, so parol donn konesans ek disernman.

⁷ Li enn gran proteksion pou dimounn drwat; li enn boukliye pou dimounn onet.

⁸ Li vey sime bann ki fer lazistis, li protez larout so bann fidel.

⁹ Si to pran kont tousala, lerla, to pou konn ladrwatir ek lazistis, to pou konpran lonette ek bon manier viv.

¹⁰ Alor, lasazes pou ranpli to leker, konesans pou ranpli to lespri ar lazwa.

¹¹ Lerla, to bon rezonnman pou gid twa, to disernman pou protez twa.

¹² Li pou anpes twa mars lor sime lemal, li pou prezerv twa kont bann manter,

¹³ kont bann ki abandonn sime lazistis, e ki mars dan sime marenwar.

¹⁴ Zot gagn plezir dan fer pese, ek lazwa dan fer lemal;

¹⁵ Zot finn swazir sime traver, e zot konportman pa drwat.

¹⁶ Pa les twa rant dan siro bann fam ki pena moral, bann fam move lavi ar zot bann parol dou.

¹⁷ Zot abandonn zot mari marye, e zot pa respekte serman sakre zot maryaz.

¹⁸ Si to swiv sime so lakaz, to pou al trouv lamor; Si to mars lor so larout, to pou al dan marenwar.

¹⁹ Seki al kot li, zot gagn sime rantre, me pena sime sorti; zot pa pou kapav retourn dan sime lavi.

²⁰ Alor, swiv sime bon dimounn, e imit bann ki pratik lazistis.

²¹ Zis bann dimounn drwat ki pou viv dan nou pei; zis bann dimounn ki lame prop, ki pou res isi.

²² Bann malfeter pou bizin lev pake ale; Bann tret pou gagn derasine.