Proverb 19 - Nouvo Testaman Kreol Morisien Harmonisation NTPS KM

¹ Preferab pov, me onet; ki manter e bet.

² Kan pa pran letan reflesi avan azir, li danzere; kan tro prese, kapav zwenn kogne.

³ Ena ki detrir zot lavi ar zot prop erer; apre sa, zot ankoler kont LESEGNER.

⁴ Dimounn ris, touletan gagn boukou nouvo kamarad; me dimounn pov perdi so sel kamarad.

⁵ Enn zour, fos temwin pou konn kondanasion; manter pou gagn so pinision.

⁶ Setaki oule gagn faver enn dimounn bon leker; tou dimounn kamarad ar kikenn ki zenere.

⁷ Si dimounn mizer gagn rezete par so prop frer, zize aster kouma so bann kamarad pou fer ar li! Li fer tou pou koz ar zot, me so parol tom dan dilo.

⁸ Aprann gagn lasazes e to pou viv ere; viv ek disernman e to pou prospere.

⁹ Enn zour, fos temwin pou gagn seki li merite; bann manter napa pou sape.

¹⁰ Li drol kan enn dimounn bet viv dan lix; me li pli drol kan enn serviter diriz so sef.

¹¹ Dimounn rezonab kontrol so koler; kan li pardonn lezot, li gagn plis loner.

¹² Kan lerwa ankoler li kouma enn lion ki fer per; me so bonte kouma laroze ki rafresi lerb ver.

¹³ Zanfan malelve met papa dan traka; enn fam ki pa aret dispite, li kouma enn tiyo ki perse.

¹⁴ Enn dimounn kapav erit lakaz ek larzan ar so paran; me enn fam intelizan, li enn benediksion LESEGNER.

¹⁵ Si to pares e si to kontan dormi, pa rod manze kan vant grogne.

¹⁶ Obzerv komannman Bondie e to pou viv bien; me si to swiv move sime to pou trouv lamor.

¹⁷ Kan to ed bann pov, to pe pret LESEGNER, limem ki pou rekonpans twa.

¹⁸ Koriz to zanfan kan ankor ena letan; me dan to koler, zame pa swet so maler.

¹⁹ Enn dimounn violan bizin pey konsekans; sinon, sak fwa li pou refer so violans.

²⁰ Si to ekout bann konsey, si to dispoze pou aprann to leson, dousma-dousma to pou vinn saz.

²¹ Dimounn kapav fer boukou proze; me volonte LESEGNER ki pou realize.

²² Nou apresie dimounn bon ek sinser; mil fwa to pov ki to manter.

²³ Respekte LESEGNER e to pou viv bien; to pou viv an-sekirite e maler pa pou koste ar twa.

²⁴ Dimounn pares met lame dan lasiet manze, me li tro feb pou met manze-la dan so labous.

²⁵ Koriz enn insolan, bann bet pou aprann vinn pridan; montre enn dimounn intelizan so erer, li pou gagn plis konesans.

²⁶ Zanfan ki bat so papa e rezet so mama, li atir laont ek dezoner.

²⁷ Mo zanfan, pa aret aprann; sinon, to pou bliye seki to deza kone.

²⁸ Pena lazistis kan fos temwin koz manti. Move dimounn nek medit lemal.

²⁹ Bann insolan pou gagn kondanasion; bann bet pou gagn pinision.