Proverb 18 - Nouvo Testaman Kreol Morisien Harmonisation NTPS KM

¹ Dimounn egois rod so prop lintere; li ankoler kan donn li bon konsey.

² Dimounn bet pa sey konpran; li rod montre ki li enn gran tenor.

³ Pese amenn laont; kan loner tonbe, mepri pran plas.

⁴ Ena dimounn, zot parol profon kouma losean; zot sazes kler kouma dilo lasours.

⁵ Li pa korek protez koupab; li inakseptab met inosan dan prizon.

⁶ Parol enn insanse atir dispit, seki rod lager gagn rakle.

⁷ Kan enn vantar koze, li rwinn limem; so parol kouma enn piez pou may limem.

⁸ Ayo palab! To kouma enn gato fondan; to fondan dan pale, to glise, to desann.

⁹ Enn dimounn ki pares, li frer avek destrikter.

¹⁰ LESEGNER, li kouma enn latour bien solid; kot li, bon dimounn gagn lape ek sekirite.

¹¹ Ena dimounn ris ki krwar zot lamone kapav protez zot, zot panse zot rises kouma enn miray fortifie.

¹² Leker ki ranpli ar lorgey atir katastrof; me limilite atir loner.

¹³ Ekoute avan reponn, sinon to pou pas pou enn bet e to pou onte.

¹⁴ Kan to moral for, to konbat maladi; me si to moral ba, kouma to pou manz ar li?

¹⁵ Enn dimounn intelizan touletan anvi aprann; enn saz touletan anvi ekout bon lansegnman.

¹⁶ Si to anvi zwenn enn dimounn inportan, amenn enn kado valab e laport pou ouver.

¹⁷ Premie dimounn ki koze divan ziz, paret pe koz vre; me tou sanze kan so adverser koumans kestionn li.

¹⁸ Kouma pou aret enn dispit ant de dimounn ris dan lakour? Meyer tir lakourtpay pou departaz zot.

¹⁹ Pa ofans enn frer, li pou bien difisil pou to afront li apre. Dispit ferm leker, kouma verou enn laport an-fer.

²⁰ Bon parol enn dimounn ranpli so vant; so zoli diskour rasazie li.

²¹ Lalang ena pouvwar, li kapav amenn lavi ouswa lamor; si to kontan koze, fer atansion konsekans.

²² Kan enn zom marye avek enn fam, li trouv so boner; li enn benediksion LESEGNER.

²³ Bann pov sipliye pou gagn faver; me bann ris reponn ar koler.

²⁴ Parfwa kamarad vinn kamaron; me enn kamarad sinser, li kapav pli serye ki frer-ser.