Proverb 17 - Nouvo Testaman Kreol Morisien Harmonisation NTPS KM

¹ Li meyer manz enn bout dipin sek dan trankilite, ki enn festin dan enn lakaz ranpli ar dispit.

² Enn serviter intelizan ena plis merit ki enn eritie ki ena lespri volaz; sa serviter-la pou gagn enn par dan leritaz.

³ Nou servi dife pou teste lor ek larzan; zis LESEGNER ki kapav teste nou leker.

⁴ Enn malfeter ekout koze malang; enn manter ekout koze mansonz.

⁵ Si to mepriz bann pov, pa bliye, to pe mepriz zot kreater osi; ena pinision pou seki pran plezir dan soufrans lezot.

⁶ Bann ti-zanfan fer fierte bann gran-paran; bann paran fer loner zot zanfan.

⁷ Li paret drol kan enn bet koz bon koze; me li ankor pli drol kan enn dirizan koz ninport.

⁸ Ena panse kan zot donn gous koumadir zot pe fer mazik; zot krwar li enn lakle paspartou.

⁹ Si to anvi dimounn kontan twa, pardonn zot erer; si touletan to repros zot erer, to kapav dir bay-bay lamitie.

¹⁰ Enn ti repros ena plis lefe lor enn dimounn saz, ki san kout baton lor ledo enn bet.

¹¹ Move dimounn konn zis fer ninport. Tansion! Mesaze lamor pou vinn tap so laport.

¹² Li preferab zwenn enn mama lours ki finn perdi so piti, ki afront enn bet ki finn plonze dan so foli.

¹³ Si to rann lemal pou lebien, lemal zame pou kit to lakaz.

¹⁴ Koumansman enn dispit li kouma enn felir dan rezervwar; aret li vit, sinon bagar kouma inondasion.

¹⁵ LESEGNER pa kontan kan fer inosan pey pou koupab, e kan fer malfeter pas pou sin.

¹⁶ Ki serti met larzan dan lame enn vantar? Pou li aste lasazes? Non, bonsans mem li pena.

¹⁷ Enn vre kamarad res fidel dan tou sirkonstans; nou fami la pou partaz nou soufrans.

¹⁸ Fode latet pa bon pou dibout garan, e pou pey det ou prosin.

¹⁹ Seki kontan kerel, sem diskord; seki rod grander pou gagn maler.

²⁰ Enn triser pa pou konn leboner; seki so lalang perver pou tom dan maler.

²¹ Paran ki gagn enn zanfan bet, li dan lapenn; zanfan bet met paran dan tourman.

²² Si lazwa dan leker, lasante pou meyer; kan traka dan lespri, lekor deperi.

²³ Kan ziz pran gous, lalwa vinn lous.

²⁴ Enn dimounn intelizan gard so regar lor lasazes; me enn dimounn bet gard so latet dan niaz.

²⁵ Zanfan bet met so papa dan lapenn; li rann lavi so mama amer.

²⁶ Li pa bon kan fer inosan pey lamann; li inzis kan met dimounn integ dan prizon.

²⁷ Dimounn ki pa koz boukou ena konesans; dimounn ki gard so kalm ena lasirans.

²⁸ Mem enn bet ki gard silans pas pou enn saz; kan li ferm labous, li pas pou enn gran malin.