Proverb 16 - Nouvo Testaman Kreol Morisien Harmonisation NTPS KM

¹ Zom kapav fer bel-bel plan, me LESEGNER ki ena dernie mo.

² Bann imin krwar ki zot pe bien azir; me LESEGNER konn bien ki ena dan zot leker.

³ Konfie LESEGNER to travay, li pou realiz tou to proze.

⁴ LESEGNER finn kree tou kiksoz pou enn rezon; mem bann malfeter finn kree pou zot konn zizman.

⁵ LESEGNER deteste larogans; bann arogan pou gagn zot pinision.

⁶ Dimounn ki lwayal ek fidel, so bann pese pardone; me si to respekte LESEGNER, to pou evit fer lemal.

⁷ Si to manier viv fer LESEGNER plezir, li fer to lennmi vinn to kamarad.

⁸ Preferab to gagn enn ti-kas dan lonette, ki gagn boukou kas dan fason malonet.

⁹ Bann imin fer bann plan dan zot leker; me LESEGNER ki deside seki pou arive.

¹⁰ Si parol enn lerwa inspire par Bondie, so zizman pou touletan korek.

¹¹ Balans onet ek mezir zis, zot pou LESEGNER; li finn donn sak pwa so valer.

¹² Lerwa deteste kan dimounn fer lemal; lazistis fer enn rwayom vinn pli for.

¹³ Lerwa apresie bann koze onet; li kontan dimounn ki koz laverite.

¹⁴ Kan lerwa sap lor kal, lamor lor baz; me enn dimounn saz fer tou pou li res kalm.

¹⁵ Kan lerwa dan lazwa, lavi briye dan pei; so bonte manifeste, kouma lapli ki rafresi.

¹⁶ Rod lasazes plito ki lor; swazir bon rezonnman plito ki larzan.

¹⁷ Lespri eklere evit pran sime lemal; kan to vey to manier viv, to prezerv to lavi.

¹⁸ Lorgey amenn destriksion; larogans amenn larwinn.

¹⁹ Preferab enn lavi sinp parmi bann pov, ki pran par dan rises mal-gagne bann orgeye.

²⁰ Pran bien kont seki finn montre twa, to pou konn sikse; fer LESEGNER konfians, to pou ere.

²¹ Dimounn ki ena lespri lasazes ena disernman; pli li koz bon parol, pli lezot ekout li.

²² Dimounn ki ena lasazes, li ena enn lasours lavi. Bann bet pou tonbe ar zot prop betiz.

²³ Enn dimounn saz reflesi avan li koze; so bann bon parol pou konvink lezot.

²⁴ Bann bon parol parey kouma dimiel; li adousi lespri e li nouri lekor.

²⁵ Fer atansion! Ena sime ki paret bon, me dan so bout, to kapav zwenn lamor.

²⁶ Kan enn travayer gagn fin, li bizin travay; si li pa travay, so vant res vid.

²⁷ Move dimounn rod tou mwayin pou fer lemal; zot parol kouma enn dife ki devor tou.

²⁸ Bann dimounn perver fann rimer pou lev lager; palabrer met dibri ant bon kamarad.

²⁹ Dimounn violan anbet so prosin; li kondir zot dan sime malsin.

³⁰ Atansion! Dimounn ki pez lizie konplot mesanste; seki pez lalev manigans lemal.

³¹ Enn long lavi, li enn rekonpans, enn kouronn laglwar; sa, zis bann dimounn ki azir bien ki resevwar.

³² Preferab ena pasians ki pouvwar. Vomie to kontrol tomem ki to sey kontrol enn lavil.

³³ Tiraz osor fer dan enn sak; me zis LESEGNER ki desid tou.