Proverb 14 - Nouvo Testaman Kreol Morisien Harmonisation NTPS KM

¹ Enn fam ki saz pran swin so fami; me enn fam bet detrir li ar so prop lame.

² Dimounn ki viv enn lavi onet, respekte LESEGNER; me seki malonet mepriz li.

³ Bann parol enn orgeye kouma enn baton pou bat limem; bann parol enn saz protez so lavi.

⁴ Si to pena toro pou labour later, to gardmanze res vid; lafors enn bef fer twa gagn bon rekolt.

⁵ Vre temwin koz laverite; fos temwin nek konn rakont mansonz.

⁶ Bann dimounn vantar zame pou vinn saz; me bann ki intelizan e reflesi, zot aprann vit.

⁷ Pa frekant bann inbesil; dan zot parol pena nanye ki bon.

⁸ Enn dimounn pridan ena lasazes, e li swazir bon sime; me lafoli enn vantar amenn li dan perdision.

⁹ Bann vantar pena laont kan zot fer pese; me bann dimounn drwat rod pardon Bondie.

¹⁰ Kan to leker dan lapenn, personn pa kone; kan to leker dan lazwa, personn pa kas latet.

¹¹ Lakaz move dimounn fasil kraze; me lakaz bon dimounn prospere.

¹² Fer atansion! Ena sime kapav paret bon, me alafin, to kapav trouv lamor.

¹³ Riye kapav kasiet tristes; kan lazwa vir ledo, lasagrin asize.

¹⁴ Move dimounn azir mal e zot pey konsekans; bon dimounn fer bon aksion e zot gagn rekonpans.

¹⁵ Dimounn bet, fasilman rant dan piez; dimounn pridan get bien kot li met so lipie.

¹⁶ Dimounn saz pran prekosion pou evit problem; ti-lespri tro prese, li bes latet, li rant dan piez.

¹⁷ Bann ki ankoler vit fer boukou betiz; kan to anbet dimounn, zot deteste twa.

¹⁸ Bann bet erit zot betiz; bann intelizan erit konesans kouma enn kouronn.

¹⁹ Move dimounn pou kourbe divan bon dimounn; bann malfeter pou dimann sarite divan laport bann dimounn drwat.

²⁰ Kan to mizer, dimounn vir ledo ar twa, mem to fami pa frekant twa. Me kan to ris, boukou dimounn fer kamarad ar twa!

²¹ Kan to mepriz to prosin ki gagn fin, to fer enn pese; bienere bann ki bon anver bann pov.

²² Dimounn ki ena move lintansion swiv sime perdision; dimounn ki ena bon santiman rekolte labonte ek fidelite.

²³ Travay dir, e to pou gagn bien to lavi; pas to letan palabre, e to pou res dan dife.

²⁴ Dimounn saz gagn larises kouma rekonpans; dimounn vantar rekolte divan.

²⁵ Enn temwin sov lavi kan li koz laverite; me li enn tret kan li dir mansonz.

²⁶ Kan nou respekte LESEGNER, nou sir nou pwin, e nou fami viv dan sekirite.

²⁷ Respe pou LESEGNER, li enn lasours lavi; li ed twa evit bann piez mortel.

²⁸ Enn gran popilasion fer laglwar enn lerwa; enn lerwa san enn pep pa vo nanye.

²⁹ Si to gard to kalm, savedir to saz; si to sap lor kal vit, savedir to bet.

³⁰ Kan to lespri trankil, to lekor bien; me kan to zalou, maladi ronz twa andan.

³¹ Kan fer dominer ar dimounn pov, nou insilte zot kreater; me kan pran swin bann pov, nou onor li.

³² Move dimounn pou kraze ar zot prop pese; bon dimounn ena lasirans, mem divan lamor.

³³ Lasazes res dan leker enn dimounn intelizan; me li pa prezan dan leker enn vantar.

³⁴ Lazistis fer laglwar enn pei; linzistis fer laont enn nasion.

³⁵ Enn serviter intelizan gagn faver lerwa; me enn serviter malonet atir so koler.