Proverb 13 - Nouvo Testaman Kreol Morisien Harmonisation NTPS KM

¹ Enn zanfan saz ekout konsey so papa; me enn vantar refiz rekonet so erer.

² Bon dimounn rekolte fri so bon parol; bann malonet touletan swaf laviolans.

³ Fer bien atansion ar seki to dir e to pou prezerv to lavi; seki koz ninport san reflesi, pou zwenn tase.

⁴ Enn dimounn ki pares, so dezir zame abouti. Fer zefor! Travay dir, e tou to dezir pou realize.

⁵ Dimounn onet deteste mansonz; move dimounn fer lezot onte ar zot bann insilt.

⁶ Lonette, li enn proteksion pou bann dimounn drwat; pese bann malfeter amenn zot larwinn.

⁷ Ena ki pena nanye, me zot met dan zar, deklar risar; Ena ki ena fortinn, me zot fer krwar ki zot pov.

⁸ Bann ris servi kas pou protez zot lavi; me lavi bann pov zame pa menase.

⁹ Enn dimounn drwat, li kouma enn lalimier ki briye for-for; me enn malfeter, li kouma enn lalanp ki pe tengn.

¹⁰ Bann arogan nek provok dispit; me bann ki ekout konsey ena lasazes.

¹¹ Larises mal-gagne pa pran letan pou evapore; me dibien ki ramase kouma gout lapli, pou fini par vinn enn rezervwar ki deborde.

¹² Kan lespwar tom dan dilo, leker fermal; me kan enn rev realize, leker zwaye.

¹³ Si kikenn rezet enn bon konsey, li ava pey konsekans; me seki respekte komannman Bondie, li ava gagn rekonpans.

¹⁴ Lansegnman enn saz, li enn lafontenn ki donn lavi; li ede pou evit bann piez lamor.

¹⁵ Bon rezonnman fer twa gagn respe lezot; bann foser swiv sime perdision.

¹⁶ Dimounn rezonab reflesi avan azir; enn vantar fer letalaz so liniorans.

¹⁷ Mesaze foser amenn maler; mesaze fidel amenn bon nouvel.

¹⁸ Si to refiz aprann, to pou res pov e lezot pou mepriz twa; me si to aksepte koreksion enn profeser, to pou gagn loner.

¹⁹ Kan enn dimounn realiz so dezir, sa fer li plezir; me enn gran-nwar prefer res dan nwar.

²⁰ Frekant dimounn saz e to pou vinn saz; me si to mars ar dimounn bet, to pou gagn problem.

²¹ Maler pourswiv bann peser; prosperite rekonpans bann fidel.

²² Bon dimounn kit leritaz pou ti-zanfan; larises bann move dimounn fini dan pos bon dimounn.

²³ Karo abandone kapav donn malere boukou manze; me bann inzis prefer les terin anfris.

²⁴ Paran ki pa koriz so zanfan pa kontan li; paran ki kontan so zanfan pa ezite pou koriz li e met li dan bon sime.

²⁵ Bon dimounn manze, vant rasazie; move dimounn plengne, vant grogne.