Proverb 12 - Nouvo Testaman Kreol Morisien Harmonisation NTPS KM

¹ Bann dimounn ki anvi aprann, zot aksepte disiplinn; me bann bet pa aksepte repros.

² LESEGNER donn so faver bann bon dimounn; me li kondann bann ki tir plan pou fer lemal.

³ Pratik lemal pa garanti sekirite; me dimounn drwat ena stabilite.

⁴ Enn bon fam, li kouma enn kouronn lor latet so mari; enn fam infidel, li kouma enn kanser dan lezo so mari.

⁵ Dimounn onet ena touzour bon lintansion; konsey enn malfeter met dimounn dan perdision.

⁶ Parol bann move dimounn kouma bann piez mortel; me parol dimounn drwat amenn delivrans.

⁷ Move dimounn fini mal, li pa les okenn tras; me fami dimounn drwat res bien solid.

⁸ Enn dimounn intelizan gagn ladmirasion; dimounn leker sal zame pou ena rezon.

⁹ Preferab res sinp e travay pou roul lakouzinn; olie met dan zar, me vant pe kriy lafaminn.

¹⁰ Bon dimounn okip bien zot zanimo; me move dimounn maltret seki pou zot.

¹¹ Enn planter ki travay dir, so grenie ranpli; enn inbesil perdi letan ar tou seki initil.

¹² Move dimounn rod rises mal-gagne; me bon dimounn zame mank manze.

¹³ Move dimounn pieze ar zot prop mansonz; dimounn onet konn evit maler.

¹⁴ Kan travay bien, gagn bon lapey; kan koz bon parol, gagn sikse.

¹⁵ Dimounn vantar touletan krwar zot ena rezon; me dimounn saz touletan ekout bon konsey.

¹⁶ Bann inbesil ankoler vit; me bann saz kontrol zot lemosion.

¹⁷ Enn temwin ki koz laverite amenn lazistis; mansonz enn move temwin nouri linzistis.

¹⁸ Parol anler fer dimal kouma lepe; me parol reflesi amenn gerizon ek lape.

¹⁹ Enn parol laverite res pou touzour; me enn parol mansonz res zis pou enn zour.

²⁰ Ena mesanste dan leker bann dimounn ki fer lemal; me ena lazwa dan leker bann dimounn ki fer lape.

²¹ Bann dimounn ki drwat viv dan leboner; me bann malfeter antoure ar maler.

²² LESEGNER deteste dimounn manter; me li apresie dimounn sinser.

²³ Dimounn intelizan pa fer palab; me bann bet etal zot betiz lor latab.

²⁴ Dimounn ki travay dir pou gagn pouvwar; me bann pares pou vinn esklav.

²⁵ Traka dan leker fer twa dekouraze; me enn bon parol fer twa soulaze.

²⁶ Enn dimounn drwat donn bon konsey so prosin; me sime enn move dimounn amenn li dan petrin.

²⁷ Bann dimounn pares pena nanye pou roti; me dimounn ki travay dir, touletan ena kitsoz pou kwi.

²⁸ Lor sime lazistis, to pou viv lontan; si to swiv li, to pa pou mor kouma perdan.