Proverb 11 - Nouvo Testaman Kreol Morisien Harmonisation NTPS KM

¹ LESEGNER deteste bann ki fos zot balans; me sa fer li plezir kan servi enn pwa ki zis.

² Lorgey atir dezoner; me limilite atir lasazes.

³ Enn bon dimounn mars touzour dan lonette; me enn malonet mor ar so prop mesanste.

⁴ Kan Bondie pou rann so zizman, to rises pa pou sov twa; me lonette ek fidelite kapav prezerv to lavi.

⁵ Enn dimounn onet pratik lazistis e so sime drwat; me enn malonet fouy so prop tom.

⁶ Lonette enn bon dimounn pou sap so lavi; me enn malonet pou may dan so prop piez.

⁷ Kan enn move dimounn mor, so lespwar osi anvole; konfians ki li ti ena dan so rises, disparet kouma lafime.

⁸ Enn dimounn ki drwat ek fidel, pa pou gagn problem; me move dimounn atir traka lor limem.

⁹ Parol move dimounn amenn larwinn lor so prosin; me lexperyans enn saz tir li dan petrin.

¹⁰ Kan bon dimounn prospere, lepep selebre; e kan move dimounn mor, lepep dir: “granmersi.”

¹¹ Bann bon dirizan atir benediksion Bondie, ek pei progrese; me mansonz bann move dirizan devir pei anba-lao.

¹² To bet, si to fer vantar ar to prosin; bann dimounn ki ena disernman kone kan bizin res trankil.

¹³ Enn dimounn palab pou devwal to sekre; enn dimounn sinser merit to konfians.

¹⁴ Enn nasion san direksion pou tonbe; me kan ena boukou bon konseye, laviktwar asire.

¹⁵ Pa dibout garan pou enn etranze, to pou regrete; to lavi pou pli trankil si to refize.

¹⁶ Enn zoli fam ki viv bien gagn loner; enn zom debrouyar gagn rises.

¹⁷ Bann bon dimounn pou gagn zot rekonpans; bann malfeter atir zot prop maler.

¹⁸ Bann move dimounn travay pou nanye; dimounn ki fer dibien, zot ava dan bien.

¹⁹ Seki res ferm dan sime lazistis pou viv; me seki galoup deryer lemal pou mor.

²⁰ LESEGNER deteste bann dimounn ki ena leker sal; me bann ki viv drwat fer li plezir.

²¹ Marke-garde, move dimounn pou gagn pinision; me bon dimounn pa pou konn kondanasion.

²² Enn zoli fam ki pena bonsans, so bote kouma enn bag an-or lor nene koson.

²³ Enn bon dimounn dezir zis seki bon; enn malfeter atir touzour lakoler lezot.

²⁴ Ena ki donn avek bon leker, e zot vinn pli ris; ena ki peng, me zot vinn pli pov.

²⁵ Dimounn ki zenere pou prospere; seki donn lezot enn ver dilo, zame pa pou gagn swaf.

²⁶ Lepep modi bann komersan ki atann pri monte pou vande; me zot onor marsan ki pa get zis profi.

²⁷ Dimounn ki fer dibien gagn faver; me seki pratik lemal gagn maler.

²⁸ Seki met zot konfians dan zot rises, zot pou tonbe kouma fey sek; me bann fidel pou prospere kouma enn pie ki so feyaz touzour ver.

²⁹ Seki fer so fami soufer, li pou gob ler. Bann ti-lespri touletan pou esklav bann saz.

³⁰ Enn bon dimounn, li kouma enn pie ki donn lavi; me laviolans, souvan amenn lamor.

³¹ Si bon dimounn gagn rekonpans lor later, bann malfeter ek bann peser osi pou rekolte seki zot seme.