Proverb 10 - Nouvo Testaman Kreol Morisien Harmonisation NTPS KM

Bann proverb Salomon lor lavi moral

¹ Bann zanfan saz fer leker zot paran kontan; zanfan bet fer leker zot paran fermal.

² Rises mal-gagne fer lavi amer; me enn lavi onet tir twa dan piez lamor.

³ LESEGNER pa pou les bon dimounn mordefin; me li pou anpes bann malfeter akonpli zot move dezir.

⁴ Lame enn dimounn pares amenn lamizer; me lame enn bon travayer amenn larises.

⁵ Li enn loner pou dimounn ki rekolte dan bon sezon; me li enn laont pou dimounn ki dormi dan sezon rekolt.

⁶ Benediksion pou lor latet bann bon dimounn; me laviolans sort dan labous bann malfeter.

⁷ Souvenir enn bon dimounn rann nou ere. Me kan enn malfeter mor, bien vit nou bliye so nom.

⁸ Dimounn saz ek rezonab ekout bon konsey; me enn bet ki koz ninport fini dan presipis.

⁹ Dimounn onet viv an-sekirite; me bann malonet zwenn tase.

¹⁰ Dimounn ki pez lizie pou anbet lezot, amenn problem; bann ki pa per pou korize, amenn lape.

¹¹ Parol bon dimounn kouma enn lasours ki donn lavi; me parol enn malfeter kasiet boukou violans.

¹² Laenn amenn lager; lamour pardonn erer.

¹³ Lasazes, li lor lalev bann dimounn intelizan; me bann ki pena bonsans ava gagn kout baton.

¹⁴ Dimounn ki saz gard konesans kouma enn trezor; me kan ti-lespri koze, larwinn zame lwin.

¹⁵ Dibien enn ris protez li kouma enn fortres; lamizer enn pov ronz li kouma karya.

¹⁶ Lapey enn dimounn onet amenn nouvo lavi; lapey enn dimounn malonet servi pou fer pese.

¹⁷ Seki ekoute kan koriz li, li progrese lor sime lavi; seki zame aksepte so erer, li perdi so sime.

¹⁸ Seki kasiet laenn dan so leker, li enn manter; e seki fann fos rimer, li enn palabrer.

¹⁹ Plis to koz boukou, plis to ena risk fer pese; enn saz konn kontrol so lalang.

²⁰ Parol enn bon dimounn, li kouma metal presie; lespri dimounn malsin, li kouma enn drom vid.

²¹ Parol bann zis, nouri boukou dimounn; me bann bet mor par zot prop betiz.

²² Benediksion LESEGNER amenn larises; me pa latristes.

²³ Dimounn ti-lespri gagn plezir dan pratik lemal; dimounn ki ena rezonnman gagn plezir dan pratik lasazes.

²⁴ Dimounn drwat gagn seki zot dezire; move dimounn gagn seki zot plis per.

²⁵ Tanpet vini, move dimounn anvole; me bon dimounn touletan reziste.

²⁶ Dimounn pares minn zot anplwayer, parey kouma lafime bril lizie, e vineg fer ledan grinse.

²⁷ Dimounn ki respekte LESEGNER pou viv pli lontan; me bann malfeter pou mor avan ler.

²⁸ Lespwar bon dimounn donn zot lazwa; move dimounn pena lavenir ditou.

²⁹ LESEGNER protez bann bon dimounn ar pwisans; me li detrir bann dimounn ki fer lemal.

³⁰ Dimounn drwat pou viv an-sekirite; dimounn traver pou zwenn tase.

³¹ Bann dimounn drwat koz langaz lasazes; me bann ki ena lalang manter pou gagn pinision.

³² Parol bann bon dimounn fer plezir; mansonz bann move dimounn fer soufer.