Mt 7 - Nouvo Testaman Kreol Morisien Harmonisation NTPS KM

Lapay ek poto

¹ “Pa ziz lezot e Bondie pa pou ziz zot.

² Parski Bondie pou ziz zot parey kouma zot ziz lezot e mezir ki zot servi pou lezot, samem li pou servi pou zot.

³ Ki manier to trouv lapay ki dan lizie to frer, me poto ki dan to lizie to pa remarke.

⁴ Kouma to kapav dir ar to frer, les mo retir lapay ki dan to lizie me poto ki dan pou twa, to pa trouve?

⁵ Zot bann ipokrit, retir an premie poto ki dan zot lizie, lerla zot pou trouv bien kler pou retir lapay ki dan lizie zot frer.

⁶ Pa donn lisien seki sakre, e pa zet zot perl ar koson ki kapav kraz li e revire pou atak zot.

Dimande, rode e tap laport

⁷ Dimande, e to pou gagne, rode e to pou trouve, tape e laport pou ouver pou twa.

⁸ Parski tou dimounn ki dimande pou resevwar, seki rode pou trouve, e laport pou ouver pou seki tape.

⁹ Kisann-la parmi zot, ki si so garson dimann dipin, li donn li enn ros;

¹⁰ si li dimann pwason, pou donn li enn serpan?

¹¹ Move kouma zot move, zot kone kouma donn bon kado zot zanfan, alor ki kantite bon kiksoz anplis zot Papa ki dan lesiel pou donn zot kan zot dimann li.

¹² Alor tou seki zot anvi ki lezot fer pou zot, fer parey pou lezot osi, samem lansegnman lalwa ek bann profet.

¹³ Pas par laport etrwat, parski laport lanfer li bien larz e sime perdision li fasil. Finn ena boukou ki prefer sa sime-la.

¹⁴ Parski laport etrwat ek sime lavi li dir, e tigit dimounn pran sa sime-la.

Enn zarb avek so fri

¹⁵ Fer atansion bann fos profet ki vini kouma bann mouton me ki an-verite zot bann loulou feros.

¹⁶ Zot pou rekonet li par so fri. To pa rekolte rezin oubien fig lor pie pikan.

¹⁷ Tou zarb ki bon raport bon fri, zarb ki pa bon raport move fri.

¹⁸ Enn zarb bon pa kapav prodir move fri, ni enn zarb malad bann bon fri.

¹⁹ Tou bann zarb ki pa donn bon fri, pou koupe e zet dan dife.

²⁰ Koumsa mem zot pou rekonet bann fos profet, par zot kondwit.”

Bann vre disip

²¹ “Pa tou dimounn ki dir mwa, ‘Segner, Segner’ ki pou rant dan rwayom lesiel, me zis bann ki fer volonte mo papa ki dan lesiel.

²² Zour zizman, pou ena boukou ki pou dir mwa ‘Segner, Segner, lor to nom nou finn azir kouma profet, lor to nom nou finn sas bann move lespri, lor to nom ki nou finn akonpli boukou mirak.’

²³ Lerla li pou dir zot, ‘Zame mo pa finn konn zot; sorti la ale, zot ki komet lemal.’

Fondasion solid

²⁴ Koumsa mem, tou dimounn ki ekout seki mo fek dir e met li an pratik, li parey enn zom ki finn ranz so lakaz lor fondasion solid.

²⁵ Lapli tonbe, inondasion vini, divan soufle lor lakaz-la, li pa kraze, akoz li finn konstrir lor ros.

²⁶ E tou dimounn ki ekout mo parol e pa met li an pratik, zot pou parey enn fou ki konstrir so lakaz lor disab.

²⁷ Lapli tonbe, inondasion vini, divan soufle lor lakaz-la, li kraze.”

²⁸ Ler Zezi fini dir sa bann zafer-la, lafoul ti etone par so lansegnman,

²⁹ parski li ti ansegn zot parey enn kikenn ki ena lotorite, pa parey kouma bann dokter lalwa.