Mt 6 - Nouvo Testaman Kreol Morisien Harmonisation NTPS KM

Lansegnman lor lasarite

¹ “Tansion zot pratik zot devwar relizie devan lezot, zis pou lizie lezot; sinon zot pa pou gagn rekonpans ki sorti kot zot Papa dan lesiel.

² Kan to fer lasarite, pa bizin sonn tronpet kouma bann ipokrit fer dan bann sinagog ek dan lari, pou ki dimounn aplodi zot. Laverite, mo dir zot, zot finn fini resevwar zot rekonpans.

³ Me twa, kan to fer lasarite fode to lame gos inior seki to lame drwat fer,

⁴ fode ki to bon aksion res sekre; to Papa ki trouv tou seki to fer pou rekonpans twa.

Lansegnman lor lapriyer

⁵ Kan zot fer lapriyer, pa fer kouma bann ipokrit ki kontan vinn devan pou priye dan sinagog e dan kat kwin lari pou ki dimounn trouv zot. Laverite mo dir zot, sa bann-la finn deza gagn zot rekonpans.

⁶ Me twa, kan to priye, rant dan to lasam, ferm twa andan e priye to Papa ki la dan sekre avek twa; to Papa ki trouv tou seki to fer, li pou rekonpans twa.

⁷ Kan to priye, pa bizin rabase kouma bann payin ki panse ki plis zot koze, plis zot lapriyer pou exose.

⁸ Pa fer kouma bann-la, parski twa, to Papa deza fini kone ki bon pou twa avan mem ki to dimann li.

⁹ Gete kouma zot bizin priye: ‘Nou Papa lao dan lesiel, ki to nom sanktifie.

¹⁰ Fer to regn vini realiz to volonte lor later kouma dan lesiel.

¹¹ Donn nou zordi dipin ki nou bizin.

¹² Pardonn nou nou bann pese, parey kouma nou pardonn bann ki finn ofans nou.

¹³ Pa les nou tom dan tantasion Me tir nou dan lemal.’

¹⁴ Si zot pardonn lezot zot fot, zot Papa dan lesiel pou pardonn zot osi,

¹⁵ me si zot pa pardonn lezot, zot Papa osi pa pou pardonn zot fot.

Lansegnman lor karem

¹⁶ Kan zot fer karem, pa bizin fer lakagn, kouma bann ipokrit, zot fer long-long figir pou montre lezot ki zot pe karem. Laverite mo dir zot, zot finn fini gagn zot rekonpans;

¹⁷ me twa, kan to zene, parfim to latet, lav to figir bien prop,

¹⁸ pou ki lezot pa rekonet si to pe fer karem, me to Papa ki invizib, li trouv tou seki to fer an-prive e li pou rekonpans twa.

Trezor dan lesiel

¹⁹ Pa ramas trezor lor later, la kot lever ek larouy kapav detrir li, e kot voler kapav defonse pou kokin.

²⁰ Ramas zot trezor plito dan lesiel, la kot ni lever, ni larouy pa kapav detrir li, e kot voler pa kapav defonse pou kokin,

²¹ parski la kot to trezor ete, to leker osi li lamem.

Lizie, samem lalanp nou lekor

²² Lizie, li lalanp nou lekor. Si to lizie li bon, tou to lekor pou eklere,

²³ me si to lizie li malad, tou to lekor pou dan teneb. Alor, si lalimier ki sipoze dan twa finn vinn teneb, be ki kalite marenwar sa!

Bondie oubien larzan

²⁴ Personn pa kapav vinn servi de met. Swa li ayir enn ek kontan lot la, oubien li atas li ar enn ek mepriz lot la. Zot pa kapav servi de met.

²⁵ Akoz samem mo dir zot: pa fatig zot ar zot lavi, ar seki zot pou manze ou bwar, ar labiyman zot lekor. Eski lavi pa pli inportan ki manze, e lekor pa pli inportan ki linz?

²⁶ Get bann zwazo dan lezer, zot pa ni seme, ni rekolte, ni ramase dan grenie, e pourtan Bondie Papa ki dan lesiel nouri zot. Eski zot pena plis valer ki zwazo?

²⁷ E kisann-la parmi zot, dan so linkietid, kapav prolonz so lavi.

²⁸ E kifer zot trakase ar linz? Get bann fler lis dan karo, kouma zot pouse. Zot pa ni travay ni koud,

²⁹ me mo dir zot, mem Salomon dan tou so laglwar pa finn zame abiye kouma sa bann fler-la.

³⁰ Si Bondie abiy enn karo lerb parey, ki zordi pe pouse e dime pou brile dan dife, eski li pa pou abiy zot ankor pli zoli ki sa? Ala zot lafwa mins la!

³¹ Alor, pa bizin zot trakase pou dimann zotmem, ‘Ki nou bizin manze?’ ou ‘Ki nou bizin bwar?’ oubien ‘Ki nou bizin met lor nou?’

³² Parski bann payin ki rod tousala; me zot Papa ki dan lesiel, li kone ki sa bann kiksoz ki neseser pou zot.

³³ Rod plito Rwayom Bondie ek so lazistis, e tou lezot kiksoz li pou donn zot anplis.

³⁴ Alor, pa bizin trakase pou dime, les dime vinn ar so dime. Traka enn zour li ase pou zordi.”