Mt 2 - Nouvo Testaman Kreol Morisien Harmonisation NTPS KM

Bann savan vinn vizit Zezi

¹ Zezi ti ne dan Betleem dan Galile, lepok lerwa Erod. Apre so nesans, enn bann savan sorti kote soley levan, ariv dan Zerizalem.

² Zot dimande, “Kot lerwa bann Zwif ki finn fek ne?” “Nou finn trouv so zetwal leve dan les e nou finn vini pou ador li.”

³ Kan lerwa Erod tann sa, so latet fatige e tou bann abitan Zerizalem osi ti trakase.

⁴ Li ti apel tou bann sef pret ek bann dokter lalwa ki travay pou lepep, e li dimann zot ki kote Lemesi pou ne.

⁵ Zot reponn li, “Betleem dan Zide. Ala seki profet finn ekrir:

⁶ Betleem, twa ki lor later Zide to napa pli dernie parmi bann lavil prinsipal, parski kot tomem pou sorti enn berze ki pou diriz mo pep Izrael.”

⁷ Alor Erod apel bann savan-la san ki personn kone e li dimann zot ki dat exak sa zetwal-la ti paret.

⁸ Apre sa, li avoy zot Betleem e li dir zot: “Al rod tou linformasion lor sa zanfan-la, e kan zot trouv li, fer mwa kone pou ki mwa osi mo al ador li.”

⁹ Apre ki zot finn tande seki lerwa ti ena pou dir zot, zot ale. Sa zetwal ki zot finn trouve dan les ti pe avanse devan zot, li ti aret zis lao landrwa kot zanfan-la ti ete.

¹⁰ Zot ti dan enn gran lazwa kan zot trouv zetwal-la.

¹¹ Ler zot rant dan lakaz-la, zot trouv Zezi ek so mama Marie. Zot tom azenou pou ador li; zot ouver zot kof bizou e zot ofer li lor, lansan ek lamir;

¹² me dan enn rev Bondie ti averti zot pa retourn kot Erod; zot pran enn lot sime pou retourn dan zot pei.

Depar pou Lezip

¹³ Apre ki bann savan finn fini ale, enn anz Lesegner paret devan Zozef dan enn rev e li dir li, “Leve, pran sa zanfan-la ek so mama, sove al dan Lezip; res laba ziska ki mo dir twa retourne, parski Erod pou rod sa zanfan-la pou touy li.”

¹⁴ Dan lanwit, Zozef leve li pran zanfan-la ek so mama, li al Lezip.

¹⁵ Li res laba ziska lamor Erod. Tousala finn arive pou ki parol ki Lesegner finn dir atraver so profet realize “Mo finn apel mo garson depi Lezip.”

Masak bann inosan

¹⁶ Ler Erod realize ki sa bann savan-la finn tronp li, li ankoler. Li donn lord touy tou bann garson ki ena de-z-an ou mwins e ki abit dan rezion Betleem. Li finn azir dapre lanket ki li finn pran avek bann savan lor dat exak ki zetwal ti paret.

¹⁷ Alor seki profet Zeremi ti deklare ti finn realize,

¹⁸ “Enn lavwa leve dan Rama. Ena plore, ena plengne, Rasel pe plor so bann zanfan. Li pa oule konsolasion parski zot nepli la.”

Retour dan Lezip

¹⁹ Apre lamor Erod anz Lesegner paret devan Zozef dan enn rev kan li ti ankor Lezip.

²⁰ Li dir li, “Leve, pran zanfan-la ek so mama avek twa e retourn lor later Izrael parski bann seki ti pe rod touy li finn fini mor.”

²¹ Alor Zozef leve, li pran zanfan-la ek so mama e li retourn lor later Izrael.

²² Ler li aprann ki Arkelais ti finn ranplas so papa Erod kouma lerwa Zide, li gagn per pou al laba. Apre ki enn anz finn averti li dan enn rev, li ti al dan rezion Galile.

²³ Li instal li laba, dan enn lavil ki apel Nazaret. Tousala finn realize dapre seki bann profet ti anonse: “Li pou apel Nazareen.”