Mt 17 - Nouvo Testaman Kreol Morisien Harmonisation NTPS KM

Transfigirasion Zezi

¹ Sis zour apre, Zezi pran Pier, Zak ek so frer Zan e li amenn zot lor enn montagn bien ot. Zot ti tousel avek li.

² Li transfigire devan zot e so figir briye kouma soley, so linz vinn blan kouma lalimier.

³ So trwa disip trouv Moiz ek Eli paret enn kout e zot ti pe koz ar Zezi.

⁴ Alor Pier dir Zezi, “Segner, li bien bon nou la avek twa! Si to oule, mo ranz trwa latant, enn pou twa, enn pou Moiz ek enn pou Eli.”

⁵ Letan li ti ankor pe koze, enn niaz bien blan kouver zot e enn lavwa dan niaz-la ti pe dir, “Samem mo Garson ki mo bien kontan, li donn mwa boukou lazwa, ekout li!”

⁶ Ler bann disip tann sa lavwa-la, zot ti telman efreye ki zot tom anplan lor later.

⁷ Me Zezi apros zot e tous zot, li dir, “Leve, pa gagn per.”

⁸ Zot lev zot lizie e zot trouv Zezi tousel.

⁹ Letan zot pe desann montagn, Zezi donn zot enn lord, “Pa rakont personn seki zot finn trouve tanki Garson Limanite pa resisite parmi bann mor.”

¹⁰ Lerla bann disip dimann li, “Kifer bann dokter lalwa dir fode ki Eli revini avan?”

¹¹ Li reponn zot, “Zisteman Eli pou revini e met tou dan lord.

¹² Me les mo dir zot ki Eli finn fini vini e bann-la pa finn rekonet li, me zot finn tret li kouma zot anvi. Koumsa mem Garson Limanite pou soufer ar zot.”

¹³ Lerla bann disip konpran ki li ti pe koz ar zot lor Zan Batis.

Zezi geri enn ti garson posede

¹⁴ Ler zot ariv kot lafoul ti ete, enn boug vini, tom azenou devan Zezi,

¹⁵ e li dir, “Segner, pitie mo garson ki gagn kriz epilepsi e li soufer boukou. Souvan li gagn kriz e li tom dan dilo ek dan dife.

¹⁶ Mo finn amenn li ar to bann disip me zot pa finn kapav geri li.”

¹⁷ Zezi reponn, “Zenerasion san lafwa ranpli ar mesanste. Komie letan ankor mo pou res ar zot? Ziska kan mo bizin siport zot? Amenn li ar mwa.”

¹⁸ Zezi menas demon-la, li sorti dan garson-la e enn sel kou li geri.

¹⁹ Apre sa bann disip al get Zezi an prive, zot dir li, “Kifer nou pa finn kapav sas sa demon-la?”

²⁰ Zezi reponn zot, “Parski zot lafwa tro feb. Laverite mo dir zot, si zot ena lafwa groser enn lagrin moutard e ki zot dir montagn, ‘Bouze al laba,’ li pou bouze; nanye pa inposib pou zot.

²¹ Zis ar lapriyer ki sa kalite lespri-la kapav sorti.”

Zezi koz lor so lamor ek so rezireksion

²² Letan Zezi ek so bann disip ti ansam dan Galile, li dir zot, “Zot pre pou livre Garson Limanite dan lame bann dimounn,

²³ zot pou touy li e li pou resisite lor trwaziem zour.” Bann disip ti bien sagrin kan zot tann sa parol-la.

Tax Tanp

²⁴ Ler zot ariv Kafarnaom, bann komi tax Tanp vinn ar Pier e zot dir li, “Zot met, pa pey tax li?”

²⁵ Pier reponn, “Wi, li peye.” E ler li rant lakaz, Zezi koz avek Pier e li dimann li, “Ki to panse Simon, bann lerwa lor later, kisann-la zot fer pey tax? Bann sitwayen oubien bann etranze?”

²⁶ Letan Pier reponn “Bann etranze,” Zezi dir li, “Savedir bann sitwayen lib, pena pou peye.

²⁷ Me pou nou pa ofans zot, al lamer zet lamson e premie pwason ki morde, get dan so lagel e to pou trouv enn pies larzan; pran li e pey tax pou twa ek pou mwa.”