Mt 14 - Nouvo Testaman Kreol Morisien Harmonisation NTPS KM

Lamor Zan Batis

¹ Sa mem lepok-la Erod Tetrark ti tann koz Zezi.

² Li dir so bann serviter, “Sa Zan Batis sa; li finn leve parmi bann mor e samem li ena pouvwar pou fer bann mirak.”

³ Parski Erod ti finn fer aret Zan, li ti fer atas li e met li dan prizon akoz Erodiad fam so frer, Filip.

⁴ Ofet, Zan ti dir li, “Li pa korek ki to pran Erodiad pou fam.”

⁵ Erod ti anvi touy li, me li ti per lafoul ki ti finn pran li pou enn profet.

⁶ Alor, pou laniverser nesans Erod, tifi Erodiad ti dans omilie bann invite e li ti sitan pler Erod

⁷ ki li ti pran langazman solanel pou donn li seki li dimande.

⁸ Lor konsey so mama, li ti fer sa demann-la: “Donn mwa, aster-la mem latet Zan Batis lor enn plato.”

⁹ Lerwa, ki ti finn fer serman devan tou bann invite, ti bien sagrin me li ti donn lord pou akord so demann.

¹⁰ Li donn lord koup latet Zan dan prizon.

¹¹ Zot amenn so latet lor enn plato, zot donn tifi-la e li donn li so mama.

¹² Bann disip Zan ti pran so lekor e zot anter li. Apre sa zot al anons nouvel-la Zezi.

Zezi nouri sink mil zom

¹³ Ler Zezi tann sa nouvel-la, li pran enn bato, li al dan enn landrwa retire li tousel. Me ler lafoul aprann sa, zot kit lavil e swiv li apie.

¹⁴ Ler li debark ater, li trouv enn gran lafoul; li pitie zot e li geri tou zot bann maladi.

¹⁵ Ler koumans fer nwar, bann disip vinn dir Zezi, “Sa landrwa-la li dezer e li deza tar, ranvway sa lafoul-la pou zot kapav al aste manze pou zotmem dan vilaz.”

¹⁶ Me Zezi reponn zot, “Kifer zot bizin ale? Donn zot manze zotmem.”

¹⁷ Zot dir li, “Nou ena la zis sink dipin ek de pwason.”

¹⁸ Li dir zot, “Amenn zot kot mwa”

¹⁹ Li ordonn lafoul pou instal zotmem lor lerb, li pran sa sink dipin ek sa de pwason-la, li lev so lizie ver lesiel e li beni zot. Apre sa li kas bann dipin-la, li donn bann disip pou distribie avek lafoul.

²⁰ Tou dimounn manze vant plin e zot amenn douz panie bann bout ki finn reste.

²¹ Bann ki ti manze ti anviron sink-mil zom san kont bann fam ek bann zanfan.

Zezi mars lor dilo

²² Zis apre sa, Zezi fer bann disip mont dan pirog ale pou ki zot ariv avan li lot kote lak, letan sa li fer lafoul al zot lakaz.

²³ Apre ki li finn fini fer lafoul ale, li mont lor enn montagn li tousel pou priye. Ler ariv aswar, li ti la li tousel,

²⁴ me pirog ti finn ariv omilie lamer. Bann gro vag ti pe fwet ar pirog parski ti ena enn divan kontrer.

²⁵ Boner gramatin, Zezi mars lor lamer vinn ar zot.

²⁶ Me ler bann disip trouv li pe mars lor dilo, zot panike e zot dir, “Enn fantom sa!” E zot kriye, zot tranble kouma fey.

²⁷ Me Zezi rasir zot toutswit e li dir, “Kouraz, mwa sa; pa bizin per.”

²⁸ Pier reponn, “Segner, si tomem sa, donn lord ki mo mars lor dilo pou vinn kot twa.”

²⁹ Zezi reponn, “Vini.” Alor Pier desann dan pirog e li koumans mars lor dilo dan direksion Zezi.

³⁰ Me letan li remark lafors divan, li gagn per e li koumans koule; li kriye “Segner, sov mwa!”

³¹ Zezi nek avoy lame, trap li, tir li e dir li, “To lafwa feb, kifer to finn doute?”

³² Ler zot rant dan pirog, divan-la tonbe.

³³ Bann ki ti dan pirog, zot tom azenou, zot loue li, zot dir, “Vremem to Garson Bondie.”

Zezi geri bann malad dan Zenezaret

³⁴ Ler zot finn fini travers lak, zot ariv dan rezion Zenezaret.

³⁵ Letan bann dimounn dan landrwa rekonet Zezi, zot avoy nouvel partou e zot amenn tou bann malad kot li.

³⁶ Zot sipliy li pou ki li les zot tous omwin rebor so linz. Tou seki ti reisi touse, li ti geri.