Mk 9 - Nouvo Testaman Kreol Morisien Harmonisation NTPS KM

¹ Zezi dir zot ankor, “Laverite, laverite mo dir zot, ena de-trwa isi ki pa pou konn lamor tanki zot pa trouv Rwayom Bondie desann avek pwisans.”

Transfigirasion Zezi

² Sis zour apre, Zezi pran zis Pier, Zak ek Zan tousel avek li e li amenn zot lao lor montagn. Li transfigire devan zot.

³ So linz vinn blan-blan-blan, enn kalite blan ki okenn dobi lor later pankor kapav reisi arive fer.

⁴ Zot trouv Eli ek Moiz paret devan zot. Bann-la ti pe koz ar Zezi.

⁵ Alor Pier rant dan konversasion, li dir ar Zezi, “Rabi, li bien bon ki nou isi avek twa; anou ranz trwa latant, enn pou twa, enn pou Moiz ek enn pou Eli.”

⁶ Li pa ti kone ki pou dir telman zot ti finn sezi.

⁷ Lerla enn niaz rekouver zot e enn lavwa dan niaz dir, “Samem mo Garson ki mo bien kontan, ekout li.”

⁸ Enn ti moman apre, kan zot get kat kote, zot pa trouv personn, res zis Zezi tousel.

⁹ Ler zot pe desann lor montagn, Zezi rekomann zot pa rakont personn seki zot finn trouve tanki Garson Limanite pa ankor resisite parmi bann mor.

¹⁰ Zot gard sa parol-la dan zot leker, mem si zot ti pe dimann zotmem, “Ki savedir ‘Resisite parmi bann mor’?”

¹¹ Apre bann disip dimann li, “Kifer bann dokter lalwa dir fode Eli revini avan?”

¹² Li reponn zot, “Premie dabor, Eli pe vini pou dres tou e met tou dan lord; alor kifer finn ekrir ki Garson Limanite pou soufer boukou e pou gagn maltrete?”

¹³ Li kontigne, “Eli finn vini, zot finn fer tou seki zot ti anvi avek li, dapre seki ti finn ekrir lor li.”

Zezi geri enn ti garson

¹⁴ Kan zot rezwenn lezot disip, zot trouv enn gro lafoul pe antour bann-la; bann dokter lalwa ti pe diskit ar zot.

¹⁵ Kouma lafoul trouv Zezi, zot exsite. Zot galoupe pou akeyir li.

¹⁶ Li dimann zot, “Ki zot pe diskite ar bann-la?”

¹⁷ Enn boug dan lafoul reponn li, “Met, mo finn amenn mo garson ar ou, li posede par enn lespri ki anpes li koze.

¹⁸ Sak fwa lespri-la trap li, li fwet li anba, zanfan-la kime, li grins so ledan, li redi. Mo finn dimann ou disip pous sa lespri-la, selman zot pa ase for.”

¹⁹ Zezi reponn zot, “Sa zenerasion-la, enn zenerasion ki pena lafwa; ziska kan mo pou res ar zot? Ziska kan mo pou siport zot? Amenn li ar mwa.”

²⁰ Zot amenn li ar Zezi; kouma lespri-la trouv li, li fer zanfan-la rant antrans, li tom anba, li fer li roule, li kime.

²¹ Zezi dimann so papa, “Depi komie letan li gagn sa?” Li reponn, “Depi li zanfan.

²² Plizir fwa, lespri-la finn zet li dan dife ek dan dilo pou fini li; si ou kapav fer kiksoz pou nou, sap nou, pran par dan nou maler.”

²³ Zezi dir li, “To pe dir si ou kapav? Be tou kiksoz posib pou dimounn ki ena lafwa.”

²⁴ Deswit papa garson-la kriye, “Mo krwar; ed mwa, mo lafwa pa ase gran.”

²⁵ Kan Zezi trouv enn latroupman, li menas move lespri-la, li dir li, “Twa, lespri ki anpes koze, ki anpes tande, mo komann twa, sort dan sa zanfan-la, pa revinn ankor ar li.”

²⁶ Lespri-la kriye, li sakouy-sakouy zanfan-la, li sorti, li ale. Zanfan-la pa bouze, li ti parey kouma enn dimounn mor. Dimounn dir li finn fini mor.

²⁷ Zezi trap so lame, fer li leve, li deboute.

²⁸ Letan Zezi finn rant lakaz, bann disip ris li enn kote, zot dimann li, “Kifer nou pa finn kapav pous sa lespri-la, nou?”

²⁹ Li dir zot, “Zis ar lapriyer ki sa kalite lespri-la kapav sorti.”

Zezi koz ankor enn fwa lor so lamor ek so rezireksion

³⁰ Zot sorti landrwa kot zot ti ete, zot travers Galile. Zezi pa ti anvi ki dimounn konn sa.

³¹ Li ti pe kontigne ansegn so bann disip e li ti pe dir zot, “Zot pou trap Garson Limanite, zot pou livre li dan lame bann dimounn; zot pou touy li, me trwa zour apre so lamor, li pou resisite.”

³² Zot pa ti konpran seki li ti pe rod dir; zot ti gagn per poz li kestion.

Kisann-la pli gran?

³³ Zot ariv Kafarnaom; kouma zot rant lakaz, Zezi dimann zot, “Ki zot ti pe diskite lor sime?”

³⁴ Zot tou, zot res trankil parski lor sime, zot ti pe diskite for-for pou kone kisann-la pli gran.

³⁵ Li asize, li apel Ledouz, li dir zot, “Si kikenn anvi vinn premie, fode li vinn dernie e li bizin vinn serviter tou dimounn.”

³⁶ Lerla li pran enn ti zanfan, li met li dan milie, li pran li dan so lebra, apre li dir zot,

³⁷ “Dimounn ki akey enn sa bann ti zanfan-la, lor mo nom, li pe akeyir momem; e dimounn ki akeyir mwa, pa mwa li pe akeyir me seki finn avoy mwa la.”

Seki pa kont nou, ar nou

³⁸ Zan dir li, “Met, nou finn trouv kikenn servi to nom pou pous enn demon; nou finn sey anpes li parski li pa mars ar nou.”

³⁹ Zezi dir, “Pa anpes li; dimounn ki servi mo nom pou fer enn mirak, pa kapav mal parl mwa apre;

⁴⁰ Seki pa kont nou, ar nou.

⁴¹ Dimounn ki donn zot enn ver dilo, lor mo nom, parski zot krwar dan Lekris, laverite, laverite mo dir zot, li pa pou perdi so rekonpans.”

Fer atansion

⁴² “Dimounn ki fer enn sa bann ti zanfan ki krwar dan mwa la tonbe, ti ava preferab atas enn gro ros otour so likou e zet li dan lamer.

⁴³ Si to lame fer twa tonbe, koup li; preferab to mank enn lame kan to rant dan lavi, ki to ena de lame dan lanfer, la kot dife napa tengn.

⁴⁴ lever ki detrir lekor pa mor, ek dife pa tengn zame

⁴⁵ Si to lipie fer twa tonbe, koup li; preferab to mank enn lipie kan to rant dan lavi, ki to al avek to de lipie dan lanfer kot

⁴⁶ lever ki detrir lekor pa mor, ek dife pa tengn zame

⁴⁷ Si to lizie fer twa tonbe, aras li; preferab to mank enn lizie kan to rant dan Rwayom Bondie, ki to rant avek to de lizie dan lanfer,

⁴⁸ la, kot lever pa mor e kot dife pa tengn.

⁴⁹ Nou tou, nou pou sale ar dife.

⁵⁰ Disel enn bon zafer, sa, selman si disel finn perdi so gou, ki ou pou servi pou asezone? Met disel dan zot lavi, viv dan lape avek tou dimounn.”