Mk 6 - Nouvo Testaman Kreol Morisien Harmonisation NTPS KM

Nazaret rezet Zezi

¹ Zezi kit sa landrwa-la, li retourn dan vilaz kot li ti grandi; so bann disip ti pe swiv li.

² Zour saba li koumans ansegne dan sinagog. Tou seki ti pe ekout li, ti inpresione. Zot dir, “Kot li finn aprann tou sa bann koze-la? Kot li finn gagn sa kalite sazes-la? Kot li finn gagn pouvwar pou fer sa kalite mirak-la ar so lame?

³ Pa limem sarpantie, garson Marie, frer Zak, Zoze, Zid ek Simon? Pa so bann ser mem ki res isi dan landrwa?” Zot ti skandalize par so manier.

⁴ Zezi dir zot, “Enn profet pou gagn rekonesans partou exsepte dan landrwa kot li finn ne, dan so fami ek dan so prop lakaz.”

⁵ Akoz samem, li pa ti kapav fer okenn mirak dan sa landrwa-la; li ti zis kapav poz so lame lor de-trwa malad, e li ti geri zot.

⁶ Zezi ti soke ki zot pa ti ena lafwa. Apre sa, li ti fer enn letour bann vilaz dan lezanviron, li ti kontigne ansegne.

Ledouz al an mision

⁷ Li apel Ledouz; li koumans avoy zot de par de. Li donn zot pouvwar lor bann move lespri.

⁸ Li ordonn zot pa sarye nanye kan zot ale, apar enn baton, pa pran dipin, ni sak, ni kas dan pos.

⁹ Met sandalet, me pa pran okenn linz resanz.

¹⁰ Li dir zot, “Kan zot rant dan enn lakaz, res laba mem ziska zot kit landrwa-la.

¹¹ Si dan enn landrwa dimounn refiz resevwar zot ek refiz ekout zot, sakouy bien lapousier anba zot lipie, kan zot kit bann-la, sa pou enn temwaniaz kont sa bann dimounn-la.”

¹² Bann disip ale, zot proklame ki dimounn bizin sanz zot leker.

¹³ Zot sas boukou demon, zot fer lonksion delwil lor bann malad e bann-la ti trouv zot gerizon.

Lamor Zan Batis

¹⁴ Lerwa Erod finn tann koz Zezi, parski so nom ti bien popiler, bann-la ti pe dir, limem Zan Batis ki finn resisite parmi bann mor, akoz samem li ena sa bann pouvwar-la.

¹⁵ Ena ti pe dir “Eli, sa.” Lezot ti pe dir, “Li enn profet kouma bann profet letan lontan.”

¹⁶ Letan Erod finn tann sa, li dir, “Mo finn sot likou Zan, ala li finn resisite.”

¹⁷ An-realite, Erod limem finn avoy dimounn trap Zan; zot atas li, zot met li dan prizon. Sa ti arive parski Erod ti finn marye avek Erodiad ki ti fam so frer Filip.

¹⁸ Zan ti dir Erod, “To pa gagn drwa pran fam to frer.”

¹⁹ Akoz samem Erodiad ti deteste Zan e li ti anvi touy li. Selman li pa ti gagn lokazion,

²⁰ parski Erod ti per Zan. Li ti kone Zan ti enn dimounn drwat e sin. Erod ti pe protez li; sak fwa kan Erod ti tann li koze, li ti anbarase me selman li ti kontan ekout li.

²¹ Enn zour, enn bon lokazion prezante. Zour so laniverser, Erod ti donn enn gran festin pou so bann konseye, so bann sef militer ek bann gran misie dan Galile.

²² Tifi Erodiad rantre, danse. Erod ek tou so bann invite ti bien kontan. Lerwa dir tifi-la, “Demann mwa seki to anvi, mo pou donn twa.”

²³ Li fer enn serman ar tifi-la, “Tou seki to demande, mo pou donn twa, mem ziska lamwatie mo rwayom.”

²⁴ Tifi-la ale, li dir ar so mama, “Ki mo pou demande?” So mama reponn, “Latet Zan Batis.”

²⁵ Li galoupe, li al get lerwa, li dir li, “Mo anvi to donn mwa aster-la mem, latet Zan Batis lor enn plato.”

²⁶ Lerwa bien sagrin. Akoz serman li finn fer devan so bann invite, li pa ti anvi perdi fas.

²⁷ Deswit, lerwa avoy enn gard. Li donn li lord amenn latet Zan Batis. Gard-la ale, li sot latet Zan Batis dan kaso,

²⁸ e li amenn latet la lor enn plato; li donn li tifi la; tifi la donn latet la so mama.

²⁹ Kan so bann disip tann sa, zot vini, zot pran so lekor, zot met li dan tonbo.

Zezi miltipliye dipin pou sink mil dimounn

³⁰ Bann zapot rasanble otour Zezi. Zot rakont li tou seki zot finn fer e tou seki zot finn ansegne.

³¹ Li dir zot, “Vinn avek mwa dan enn landrwa trankil kot nou pou tousel; repoz zot inpe.” Anfet, ti ena boukou dimounn ti pe ale-vini; zot pa ti mem gagn letan pou manz enn bouse manze.

³² Zot pran bato pou al dan enn landrwa retire kot zot pou tousel.

³³ Boukou dimounn ki ti trouv zot ale, ti rekonet zot; depi boukou lavil, dimounn galoupe pou al bar zot avan zot arive.

³⁴ Letan Zezi debarke, li trouv enn gran lafoul; so leker kase parski zot ti kouma bann mouton san berze. Li koumans ansegn zot boukou kiksoz.

³⁵ Letan ti pe pase, bann disip koste pre ar Zezi, zot dir li, “Nou dan enn landrwa retire e li deza bien tar.

³⁶ Les zot ale, koumsa zot ava kapav al dan bann vilaz lakanpagn pou aste kiksoz pou manze.”

³⁷ Li reponn zot, “Donn bann-la manze, zotmem.” Zot dir li, “Kot nou pou al gagn dipin valer de-san zourne travay pou donn zot manze?”

³⁸ Li dir zot, “Komie dipin zot ena? Al gete.” Bann-la pran linformasion, zot reponn li, zis sink dipin ek de pwason.

³⁹ Apre sa li donn zot lord fer bann dimounn-la asiz an group lor gazon.

⁴⁰ Zot asiz anba par group san ek sinkant.

⁴¹ Zezi pran sink dipin ek de pwason-la; li lev so lizie ver lesiel, li fer enn benediksion, li kas dipin-la, li donn so bann disip pou ki bann-la fer distribision dan lafoul; li partaz de pwason-la osi ar zot tou.

⁴² Tou dimounn finn rasazie ar manze.

⁴³ Ar bout dipin ek pwason ki finn reste, zot ranpli douz panie.

⁴⁴ Antou sink-mil zom ti manze.

Zezi mars lor dilo

⁴⁵ Apre sa, Zezi obliz bann disip pran bato pou al lot kote dan Betsaida; letan sa, li pou fer lafoul ale.

⁴⁶ Kan li finn fini fer zot tou ale, li mont lor montagn, li al priye.

⁴⁷ Aswar vini, bato ti omilie lamer, Zezi ti tousel ater.

⁴⁸ Letan li trouv zot pe rame avek boukou difikilte parski divan ti kontrer, ver kat-r-er sink-er dimatin, li mars lor lamer, li vini. Li ti anvi pas devan zot.

⁴⁹ Ler bann-la trouv li pe mars lor lamer, zot ti krwar enn fantom; zot koumans kriye.

⁵⁰ Zot tou ti trouv li; enn lafreyer pran zot. Lerla li pran laparol, li dir zot, “Pa traka, momem sa, pa gagn per.”

⁵¹ Kouma li mont dan bato avek zot, divan tonbe; zot res bet.

⁵² Avredir, zot pa ti finn konpran nanye lor mirak dipin; zot leker ti kouma ros.

Gerizon bann malad

⁵³ Kan zot finn fini traverse, zot ariv pre lor rivaz Zenezaret, zot amar zot bato.

⁵⁴ Kouma zot sorti dan bato, deswit dimounn fini rekonet Zezi.

⁵⁵ Zot sorti partou kote, zot galoupe, zot koumans sarye bann malad lor brankar; zot al zwenn Zezi kot zot ti tann dir li ete.

⁵⁶ Partou kot li ale, dan vilaz, dan lavil, dan lakanpagn, zot ti amenn bann malad lor laplas piblik; zot sipliy li pou ki zot kapav tous zis bout so linz; tou dimounn ki ti tous li, ti gagn zot gerizon.