Mk 3 - Nouvo Testaman Kreol Morisien Harmonisation NTPS KM

Gerizon enn zour saba

¹ Ankor enn fwa, Zezi rant dan sinagog; enn boug ek lame monion ti la.

² Bann-la ti pe vey Zezi, pou gete si li ti pou geri sa boug-la zour saba; koumsa zot ti pou kapav met enn sarz lor li.

³ Li dir ar sa boug lame monion-la, “Leve, vinn devan.”

⁴ Lerla li dir bann-la, “Dapre lord, ki gagn drwa fer zour saba? Fer bon kiksoz, fer move kiksoz? Sov enn lavi, tir enn lavi?” Zot tou res trankil.

⁵ Li get zot ar lakoler, anmemtan, li sagrin ki zot leker dir. Li dir boug-la, “Dres to lame.” Monion-la dres so lame; so lame revinn normal.

⁶ Kouma bann Farizien tom deor, zot fer enn konplo avek bann Erodien pou touy Zezi.

Lafoul swiv Zezi

⁷ Zezi retir li dan bor lamer avek so bann disip. Enn pake dimounn ti pe swiv li. Zot sorti partou kote dan Galile, Zide,

⁸ Zerizalem, Idoume, lot kote larivier Zourdin, dan rezion Tir ek Sidon. Nouvel ti finn fane komie kiksoz li ti pe fer; akoz samem zot ti pe vinn get li.

⁹ Zezi ti bizin dir so bann disip pare enn pirog pou li, tansion lafoul kraz li.

¹⁰ Li ti finn geri boukou dimounn; tou seki ti malad, ti pe pouse pou tous li.

¹¹ Sak fwa bann move lespri trouv li, zot tonbe, zot kriye, “Tomem Garson Bondie.”

¹² Zezi menas zot pou ki zot pa fer dimounn kone ki li ete.

Zezi nom Ledouz

¹³ Li mont lor montagn. Li apel dimounn ki li ti oule. Bann-la vini.

¹⁴ Li swazir douz parmi zot, (li donn zot nom zapot), pou bann-la res avek li e pou ki li avoy zot proklame avek

¹⁵ lotorite sas demon.

¹⁶ Alors li nom Ledouz. Li donn Simon enn lot nom, li apel li Pier;

¹⁷ apre ti ena Zak ek so frer Zan, toule-de garson Zebede. Li sanz zot nom, li apel zot Boanerzes, savedir zanfan loraz ek zekler;

¹⁸ ti ena osi Andre, Filip, Bartelmi, Matie, Toma, Zak garson Alfe, Tade, Simon ki ti res Kana

¹⁹ ek Zida Iskaryot, limem ki ti vann Zezi.

Fami Zezi

²⁰ Apre sa Zezi rant dan lakaz. Lafoul rekoumans rasanble; telman dimounn ti pe ale-vini, ki zot pa ti kapav manz enn bout dipin.

²¹ Kan fami Zezi aprann sa, zot ale pou trap li. Zot ti pe dir li ti finn perdi latet.

Zezi ek Belzeboul

²² Bann dokter lalwa ki ti finn desann depi Zerizalem ti pe dir ki ena Belzeboul lor Zezi, ki li sas demon par lafors sef bann demon.

²³ Li apel zot, li koz ar zot an parabol. Li dir zot, “Ki manier Satan kapav sas Satan?

²⁴ Si enn Rwayom divize kont limem, Rwayom-la pa kapav tini dibout.

²⁵ Si enn fami divize kont limem, fami-la pa pou kapav tini dibout.

²⁶ Si Satan lev lager ar limem, savedir li divize, li pa pou kapav tini, li pou fini limem.

²⁷ Ou pa kapav rant dan lakaz enn dimounn for pou kokin so bann dibien san ki ou atas li avan; lerla ou pou kapav kokin kouma ou anvi.

²⁸ Mo dir zot enn zafer: laverite, laverite mo dir zot, tou pese, tou blasfem, ki dimounn fer pou pardone;

²⁹ enn sel blasfem pa pou pardone, blasfem kont Lespri Sin. Li enn pese ki zame pou efase.”

³⁰ Zezi ti pe koz koumsa parski bann-la ti pe dir ki li ena enn move lespri lor li.

Vre fami Zezi

³¹ So mama ek so bann frer vini. Zot res deor zot fer kriye li.

³² Enn kantite dimounn ti pe asize; zot tou ti pe antour li; zot dir li, “Gete, to mama ek to bann frer inn vinn rod twa.”

³³ Li reponn zot, “Kisann-la mo mama, kisann-la mo frer?”

³⁴ Li lev so latet, li promne so regar lor sak dimounn ki ti pe asize. “Ala mo mama, ala mo bann frer.

³⁵ Dimounn ki fer volonte Bondie, limem mo frer, limem mo ser, limem mo mama.”