Mk 16 - Nouvo Testaman Kreol Morisien Harmonisation NTPS KM

Rezireksion Zezi

¹ Letan saba finn fini pase, Marie-Madlenn, Marie, mama Zak ek Salome aste bann aromat pou vinn anbom lekor Zezi.

² Gramatin boner, premie zour lasemenn, zis apre ki soley finn leve, zot vinn lor tom.

³ Zot ti pe dir ant zotmem, “Kisann-la pou roul sa ros ki devan lantre tom-la?”

⁴ Kouma zot lev latet, zot gete, zot trouv sa gro ros la finn fini roule.

⁵ Letan zot rant dan tonbo, zot trouv enn zennom ki ti pe asize adrwat. Li ti ena enn linz blan lor li. Zot gagn enn sok.

⁶ Li dir zot, “Pa gagn per, zot pe rod Zezi Nazaret ki ti finn krisifie; li finn fini resisite, li pa isi. Get landrwa kot bann-la ti met li.

⁷ Aster, ale, al dir so bann disip ek Pier ki li pe atann zot Galile, parey kouma li ti dir zot. Zot pou trouv li laba.”

⁸ Zot sorti dan tonbo, zot sove. Zot tranble, zot boulverse e zot pa ti dir personn nanye parski zot ti gagn per.

Zezi aparet devan so bann disip

⁹ Letan li finn resisite boner gramatin, premie zour lasemenn, Zezi ti aparet dabor devan Marie-Madlenn; lor limem Zezi ti pous set demon.

¹⁰ Marie-Madlenn ti al anons tou seki ti finn ariv li, ar bann dimounn ki ti avek Zezi; bann-la ti andey e zot ti pe plore.

¹¹ Me letan zot finn aprann ki Zezi ti vivan e ki li ti finn aparet devan li, zot pa ti oule krwar.

Zezi aparet devan de disip

¹² Apre sa, li finn aparet, dan enn lot manier, devan de parmi zot, letan zot ti pe marse dan lakanpagn.

¹³ Zot ti retourne pou rakont lezot; me bann-la pa ti oule krwar zot osi.

Zezi aparet devan onz disip

¹⁴ Plitar, li ti aparet devan Leonz, letan zot ti atab; li repros bann-la ki zot pena lafwa e ki zot leker dir parski zot pa ti krwar dimounn ki ti finn trouv li apre so rezireksion.

¹⁵ Li dir zot, “Al dan lemond antie, al proklam Bonn Nouvel partou kote.

¹⁶ Dimounn ki krwar ek resevwar batem pou sove, me dimounn ki pa krwar pou kondane.

¹⁷ Ala bann sign ki pou fer dimounn rekonet bann ki krwar dan mwa: zot pou sas demon lor mo nom, zot pou koz bann nouvo langaz,

¹⁸ zot pou trap serpan dan zot lame e si zot arive bwar pwazon, zot pa pou gagn nanye; zot pou inpoz lame lor bann malad, bann-la pou geri.”

Lasansion Zezi

¹⁹ Apre sa, Lesegner Zezi, letan li finn fini koz ar zot, li finn mont dan lesiel e li finn asiz kote drwat Bondie.

²⁰ So bann disip sorti e zot al proklam Bonn Nouvel partou kote; Lesegner ti pe travay avek zot e bann mirak ki ti pe arive ti pe montre ki zot predikasion ti vre.