Mk 15 - Nouvo Testaman Kreol Morisien Harmonisation NTPS KM

Zezi paret devan Pilat

¹ Boner gramatin, bann sef pret fer enn gran renion avek bann ansien, bann dokter lalwa avek tou manb Sanedrin okonple. Zot atas Zezi, zot pran li e zot amenn li devan Pilat.

² Pilat dimann li, “Eski tomem lerwa Zwif?” Zezi reponn li, “Twa ki pe dir sa.”

³ Bann sef pret akiz li, zot met enn pake sarz lor li.

⁴ Pilat redimann li “To pena nanye pou reponn? Gete ki kantite sarz bann-la inn met lor twa.”

⁵ Zezi pa reponn nanye. Sa ti fer Pilat res bet.

Zezi kondane amor

⁶ Dapre koutim fet Pak, abitie larg enn prizonie ki dimounn demande.

⁷ Ti ena enn prizonie ki ti apel Barabas. Li ti dan prizon avek bann lezot rebel ki ti finn komet enn krim dan emet.

⁸ Lafoul monte pou dimann Pilat fer kouma li abitie fer.

⁹ Pilat dimann zot, “Eski zot oule mo larg lerwa Zwif pou zot?”

¹⁰ Li ti realize ki bann sef pret finn livre li parski zot zalou.

¹¹ Alors bann sef pret exsit lafoul pou ki zot dimann Pilat larg Barabas plito.

¹² Pilat redimann zot ankor enn fwa, “Be lerla, ki mo pou fer avek sa boug ki zot apel lerwa Zwif la?”

¹³ Zot kriye pli for, “Krisifie li!”

¹⁴ Pilat dir zot, “Ki li finn fer demal?” Zot kriye ankor pli for, “Krisifie li!”

¹⁵ Kouma Pilat ti anvi donn lafoul satisfaksion, li larg Barabas pou zot; letan zot finn fini fwet Zezi, Pilat livre li pou ki bann-la krisifie li.

Bann solda tourn Zezi an boufon

¹⁶ Bann solda sarye li dan lakour pale gouverner; lerla zot invit bann lezot gard vinn avek zot.

¹⁷ Zot met enn manto rouz fonse lor li e zot anfons enn kouronn trese ar pikan lor so latet.

¹⁸ Zot koumans salie li, “Bienveni, lerwa Zwif.”

¹⁹ Zot donn li enn kout zon lor so latet, zot kras lor li, zot azenou devan li e zot fer sanblan rann li omaz.

²⁰ Kan zot finn bien boufonn li, zot retir so manto rouz lor li e zot remet so linz; zot sarye li deor pou al koulout li lor lakrwa.

Bann-la koulout Zezi lor lakrwa

²¹ Simon, papa Alexand ek Rifis, ti enn abitan Sirenn. Letan li sorti lakanpagn, li ti pe pas par la, kan bann-la obliz li sarye lakrwa Zezi.

²² Zot amenn Zezi dan enn landrwa ki ti apel Golgota, seki vedir Landrwa Krann dimounn mor.

²³ Zot sey donn li bwar enn melanz divin ek lamir me li refize.

²⁴ Zot koulout li lor lakrwa; zot tir lakourtpay pou partaz so bann linz ant zot, pou gete ki sakenn pou gagne.

²⁵ Ti nef-er gramatin ler zot finn krisifie li.

²⁶ Ti ena enn plak ki explike pou ki rezon li finn kondane e lor la ti ekrir “Lerwa Zwif.”

²⁷ Ti ena de bandi ki ti krisifie avek li, enn ti dan so drwat, lot-la ti dan so gos.

²⁸ Koumsa ki Lekritir finn realize kot finn ekrir, “Li finn partaz sor bann kriminel.”

²⁹ Bann ki ti pe pase insilte li. Zot sakouy zot latet, zot dir, “Twa ki kraz Tanp e rekonstrir li dan trwa zour

³⁰ sov tomem, desann lor lakrwa!”

³¹ Bann sef pret ek bann dokter lalwa fer parey. Zot boufonn li ant zotmem e zot dir, “Li finn sov lezot me li pa kapav sov limem.

³² Si vremem to Lemesi, lerwa Izrael, desann lor lakrwa, aster-la mem, lerla nou pou krwar dan twa.” Bann ki ti krisifie ansam ar li, ti pe zour li zot osi.

Lamor Zezi

³³ Ler finn ariv midi, teneb kouver later antie ziska trwa-z-er tanto.

³⁴ Trwa-z-er, Zezi kriy bien-bien for, “Eli, Eli, la-ma sabaktani?” - savedir, “Bondie, Bondie, kifer to finn abandonn mwa?”

³⁵ Letan de-trwa dimounn ki ti la, tann li, zot dir, “Tande! Li pe apel Eli.”

³⁶ Enn parmi zot galoupe, inbib enn leponz ar vineg, met li dan bout enn banbou e donn Zezi sa pou bwar, e li dir, “Atann, anou gete si Eli pou vini, pou fer li desann.”

³⁷ Apre sa Zezi kriye bien for e li rann so dernie soupir.

³⁸ Rido Tanp desir an-de, depi lao ziska anba.

³⁹ Letan santiryon ki ti pe debout vizavi li, trouv manier li finn rann so dernie soupir, li dir, “Vremem, sa dimounn la ti Garson Bondie.”

⁴⁰ Delwin, ti ena bann fam ki ti pe asiste seki ti pe pase; parmi zot ti ena Marie-Madlenn, Marie, mama ti-Zak, Zoze ek Salome,

⁴¹ Zot ti pe swiv Zezi e zot ti pe servi li depi Galile; ti ena ankor boukou lezot fam ki ti finn mont avek li ziska Zerizalem.

Lanterman Zezi

⁴² Kan aswar vini, kouma ti zour preparasion, savedir lavey saba,

⁴³ Zozef ki sorti Arimate e ki ti enn konseye bien respekte, (li osi, li ti pe atann avek inpasians Rwayom Bondie), pran so kouraz, al get Pilat e dimann li lekor Zezi.

⁴⁴ Pilat ti etone ki li ti fini mor. Li ti fer apel santiryon e li dimann li si li ti finn mor depi lontan.

⁴⁵ Kan li ti finn gagn ransegnman avek santiryon, li donn Zozef permision pran so lekor.

⁴⁶ Zozef aste enn dra, desann Zezi anba, anvlop li dan dra-la e met li dan enn tonbo ki ti finn taye dan ros; apre sa li ti roul enn gro ros devan so lantre.

⁴⁷ Marie-Madlenn ek Marie, mama Zoze ti pe bien gete kot ti finn met so lekor.