Lk 3 - Nouvo Testaman Kreol Morisien Harmonisation NTPS KM

Predikasion Zan Batis

¹ Dan kinziem lane regn Tiber Sezar, letan Pons Pilat ti gouverner Zide, Erod ti sef Galile, so frer Filip ti sef rezion Itire ek Trakonitid, Lizias ti sef Abilenn;

² letan Ann ek Kaif ti gran pret, Zan, garson Zakari, ti tann Parol Bondie dan dezer.

³ Zan ti al anons dan tou bann rezion Zourdin enn batem pou ki dimounn sanz zot leker, pou ki zot pese pardone.

⁴ Kouma finn ekrir dan liv profet Izai, “Enn lavwa pe kriye dan dezer, prepar sime Lesegner, dres so santie drwat.

⁵ Tou vale pou konble, sak montagn ek kolinn pou aplati, seki traver pou vinn drwat, sime kabose pou vinn plat

⁶ ek Bondie pou sov tou dimounn.”

⁷ Alor li ti dir lafoul ki ti vini pou resevwar batem, “Bann espes serpan, kisann-la finn montre zot ki zot pou sape devan koler Bondie ki pe aprose?

⁸ Prodir bon fri ki montre ki zot finn sanz zot leker. Pa nek zis dir dan zotmem, ‘Abraam nou papa!’ Parski les mo dir zot, avek sa bann ros-la, Bondie kapav fer bann desandan Abraam leve.

⁹ Aster-la mem laserp finn fini pare pou koup bann pie depi zot rasinn. Tou bann pie ki pa raport bon fri pou koupe e pou zet dan dife.”

¹⁰ Lafoul dimann li, “Ki nou bizin fer alor?”

¹¹ Li reponn zot, “Dimounn ki ena de palto bizin partaz ar seki pena, seki ena manze bizin fer parey.”

¹² Bann komi tax ousi ti vini pou resevwar batem ek zot dir li, “Met, ki nou bizin fer?”

¹³ Li reponn zot, “Pa pran plis ki zot gagn drwa.”

¹⁴ Bann solda ousi dimann li, “Be nou, ki nou bizin fer?” Li reponn zot, “Pa kokin personn, pa fer fos akizasion; kontant zot ar zot lapey.”

¹⁵ Tou dimounn dan lepep ti pe atann kiksoz, ek tou dimounn ti pe poz kestion dan zot leker, sipa Zan mem ki Lemesi.

¹⁶ Zan reponn zot tou, “Mwa, mo batiz zot ar dilo; me ena enn ki pli for ki mwa ki pe vini; mwa, mo mem pa dign pou larg so lase soulie; li pou batiz zot ar Lespri Sin ek dife.

¹⁷ Li finn pran lapel dan so lame pou netway anba lor sali; li pou ramas lagrin dible dan so grenie, me li pou bril lapay dan enn dife ki zame pou tengn.”

¹⁸ Koumsa mem e avek lezot parol ankor, Zan ti sakouy zot e li ti pe anons zot Bonn Nouvel.

¹⁹ Me Zan ti repros Erod, gran sef Galile, parski li ti pran Erodiad, fam so frer, e parski li finn fer boukou move kiksoz ankor;

²⁰ pa fini, lor la li finn fer kiksoz pir ankor, li ferm Zan dan prizon.

Batem Zezi

²¹ Letan tou bann dimounn finn fini resevwar batem, e ki Zezi ousi finn fini batize, letan li pe priye,

²² lesiel ouver, e Lespri Sin desann lor li dan form enn vre kolonb, ek enn lavwa sorti dan lesiel, li dir, “Tomem mo Garson ki mo kontan, to fer mo boner.”

Zenealozi Zezi

²³ Letan Zezi ti koumans so minister li ti ena apepre trant-an. Dapre bann dimounn, li

²⁴ garson Zozef, ki ti garson Eli, garson Matat, garson Levi, garson Melki, garson Inai, garson Zozef,

²⁵ garson Matatias, garson Amos, garson Naoum, garson Esli, garson Nagai,

²⁶ garson Maat, garson Matatias, garson Semein, garson Zozek, garson Yoda,

²⁷ garson Yoanan, garson Reza, garson Zeroubabel, garson Sealtiel, garson Neri,

²⁸ garson Melki, garson Adi, garson Kosam, garson Elmadan, garson Er,

²⁹ garson Zezi, garson Eliezer, garson Yorim, garson Matat, garson Levi,

³⁰ garson Simeon, garson Zida, garson Zozef, garson Yonam, garson Eliakim,

³¹ garson Melea, garson Mena, garson Matata, garson Natan, garson David,

³² garson Zese, garson Obed, garson Boaz, garson Sala, garson Nason,

³³ garson Aminadab, garson Admin, garson Arni, garson Esron, garson Perez, garson Zida,

³⁴ garson Zakob, garson Izaak, garson Abraam, garson Tara, garson Naor,

³⁵ garson Serig, garson Reou, garson Peleg, garson Eber, garson Sela,

³⁶ garson Kenan, garson Arfakzad, garson Sem, garson Noe, garson Lamek,

³⁷ garson Matousalem, garson Enok, garson Yared, garson Malaleel, garson Kenan,

³⁸ garson Enos, garson Set, garson Adam, garson Bondie.