Lk 24 - Nouvo Testaman Kreol Morisien Harmonisation NTPS KM

Zezi resisite

¹ Premie zour lasemenn, boner dimans gramatin, de-trwa fam vinn lor tonbo avek delwil parfime ki zot ti finn prepare.

² Me zot trouv ros lantre tonbo ti finn avanse.

³ Zot rantre me zot pa trouv lekor Segner Zezi.

⁴ Zot pa pe konpran seki finn arive e anmemtan de zom paret devan zot. Zot linz ti pe briye.

⁵ Kouma zot ti pe gagn per e zot ti pe bes zot latet anba, sa de zom-la dir zot, “Kifer zot pe rod enn dimounn vivan parmi bann mor;

⁶ li pa isi, li finn resisite. Rapel seki li ti dir zot kan li ti dan Galile.

⁷ ‘Fode ki Garson Limanite livre dan lame bann peser, ki li kouloute lor lakrwa avan ki li resisite lor so trwaziem zour.’ ”

⁸ Lerla zot rapel sa bann parol-la.

⁹ Zot kit tonbo pou rakont sa onz disip ek bann lezot.

¹⁰ Ti ena Marie Madlenn, Zann ek Marie, mama Zak ek de-trwa ankor ki ti avek zot. Zot rakont sa bann zapot.

¹¹ Me bann-la panse ki zot ti pe divage e zot pa ti krwar parol bann fam-la.

¹² Pier leve e galoupe, al dan tonbo. Li bese e li trouv zis bann bandaz an-lin; apre sa li retourn kot li. Li ti res bet par seki ti finn pase.

Disip Emais

¹³ Sa zour-la, de parmi zot, ti pe al dan zot vilaz Emais ki ti apepre de-z-er tan marse depi Zerizalem.

¹⁴ Zot ti pe koz lor tou seki ti finn deroule.

¹⁵ Kan zot ti pe koze ek diskite, Zezi koste ar zot e mars ar zot.

¹⁶ Zot trouv li me zot lizie pa rekonet li.

¹⁷ Li dir zot, “Ki zot pe dialoge letan zot pe marse?” Zot arete, figir tipti.

¹⁸ Seki ti apel Kleopas dir li, “To tousel dan Zerizalem pa kone seki finn arive sa de-trwa zour-la isi?”

¹⁹ E li dir zot, “Ki finn arive? “Zot reponn li, “Tou seki finn ariv Zezi Nazaret, sa profet ki ti pwisan par so aksion e par so parol devan Bondie e devan lepep;

²⁰ kouma bann sef pret ek nou bann dirizan finn livre li e finn kondann li amor e finn met li lor lakrwa.

²¹ Nou ti panse ki limem ki ti pou kapav delivre Izrael; e sa fer trwa zour depi ki tousala finn arive.

²² Me anplis, de-trwa fam dan nou group finn fer nou res bet parski kan zot ti finn al lor tonbo boner gramatin,

²³ zot pa ti trouv so lekor e zot finn retourne pou dir ki bann anz ti finn aparet devan zot dan enn vizion e bann-la ti finn dir ki li touzour vivan.

²⁴ De-trwa parmi zot finn al lor tonbo e zot finn trouv bann zafer parey kouma bann fam-la ti finn rakonte, me li, zot pa finn trouv li.”

²⁵ Lerla li dir zot, “Bann san konpran, kouma zot leker pran letan pou krwar tou seki bann profet finn rakonte.

²⁶ Eski Lekris pa ti bizin soufer avan li rant dan so laglwar?”

²⁷ Lerla li pran depi Moiz ek tou bann profet pou explik zot tou seki finn ekrir lor li dan Lekritir.

²⁸ Zot ti pre pou ariv dan vilaz kot zot ti pe ale e Zezi fer bann-la krwar ki li ti pe kontigne so larout.

²⁹ Bann-la pa anvi li ale, zot dir li, “Res ar nou parski soley pe al tonbe e lanwit pe aprose.” Lerla li al res kot zot.

³⁰ Letan li atab avek zot, li pran dipin, li beni li, li kas li e li donn zot.

³¹ Lerla zot lizie ouver e zot rekonet li me li disparet devan zot.

³² Sakenn dir so kamarad, “Eski nou leker pa ti pe brile andan kan li ti pe koz ar nou lor sime e kan li ti pe explik nou Lekritir?”

³³ Zot leve toutswit e zot retourn Zerizalem. Zot trouv bann onz disip ansam avek lezot kamarad

³⁴ Bann-la ti pe dir, “Vremem Lesegner finn resisite e li finn paret devan lizie Simon.”

³⁵ Lerla zotmem, zot rakont tou seki finn arive lor sime e kouma zot ti rekonet Zezi letan li ti finn kas dipin.

Zezi aparet devan so bann disip

³⁶ Zot ti ankor pe koze kan Zezi vinn omilie zot e li dir, “Shalom, Lape avek zot.”

³⁷ Laper sezi zot e zot tranble parski zot ti krwar enn fantom sa.

³⁸ Li dir zot ankor, “Kifer zot abat koumsa e kifer ena dout dan zot leker?

³⁹ Get mo lame, get mo lipie, momem sa. Tous mwa, gete, parski enn fantom pena laser ek lezo kouma mwa. Gete kouma mo ete.

⁴⁰ Letan li pe dir sa, li montre zot so lame ek so lipie.

⁴¹ Zot dan kontantman, zot emerveye e zot pa krwar seki zot pe trouve; alor Zezi dir zot, “Eski zot ena kiksoz isi pou manze?”

⁴² Zot donn li enn bout pwason griye;

⁴³ li pran li e li manz li devan zot.

⁴⁴ Li dir zot, “Samem parol ki mo ti dir zot kan mo ti avek zot parski tou seki finn ekrir lor mwa dan Lalwa Moiz, Liv bann Profet e bann Psom, ti bizin realize.”

⁴⁵ Lerla li ouver zot lintelizans pou ki zot konpran Lekritir.

⁴⁶ Li dir zot, “Ala seki finn ekrir: Lekris pou soufer e li pou resisite parmi bann mor lor trwaziem zour

⁴⁷ e bizin proklam Parol Bondie lor so nom, repantans e pardon bann pese devan tou bann nasion depi Zerizalem.

⁴⁸ Zotmem mo bann temwin.

⁴⁹ Aster-la mo avoy lor zot seki mo Papa finn promet. Res Zerizalem ziska ki zot resevwar pwisans ki sorti lao.”

Zezi mont dan lesiel

⁵⁰ Apre sa Zezi amenn zot ziska Betani; la, li lev so lame e li beni zot.

⁵¹ Letan li pe beni zot, li separe ar zot e li mont dan lesiel.

⁵² Zot ador li e zot retourn Zerizalem avek gran lazwa dan leker.

⁵³ Zot ti al souvan dan Tanp pou loue Bondie.