Lk 18 - Nouvo Testaman Kreol Morisien Harmonisation NTPS KM

Parabol enn vev ek enn move ziz

¹ Zezi rakont enn parabol pou montre ki bizin touletan priye san dekouraze.

² Li dir, “Dan enn lavil ti ena enn ziz ki pa ti per Bondie e ki pa ti ena respe pou personn.

³ Ti ena enn vev dan sa lavil-la ki ti vinn get ziz-la souvan pou dimann li, ‘Donn mwa enn zizman favorab kont mo adverser.’

⁴ Pandan enn bon letan ziz-la refize; me apre li dir ar limem, ‘Mem si mo pa per Bondie e mo pena respe pou personn,

⁵ mo pou donn sa vev-la rezon parski li fatig mo latet; sinon li pou minn mo lavi afors li vinn devan mo laport toulezour.’ ”

⁶ Lesegner dir, “Ekout bien ki sa move ziz-la finn dir.

⁷ Eski Bondie pa pou rann lazistis bann ki li finn swazir e ki pe sipliy li lanwit-lizour? Eski li pou tarde pou sekour zot?

⁸ Mo dir zot, li pou donn zot lazistis san tarde. Kan Garson Limanite vini, eski li pou trouv lafwa lor later?”

Parabol enn Farizien ek enn kolekter tax

⁹ Zezi ti rakont sa parabol-la pou dimounn ki krwar zot drwat e ki ena mepri pou lezot.

¹⁰ “De dimounn rant dan Tanp pou priye; enn ladan ti enn Farizien, lot-la ti enn komi tax.

¹¹ Farizien-la ti pe dibout enn kote, apar, e li ti pe priye dan so leker, ‘Bondie, mo remersie twa ki mo pa kouma bann lezot dimounn, voler, explwater, adilter, e sirtou pa kouma sa komi tax-la.

¹² Mo gard karem de fwa par semenn, mo donn enn diziem reveni ki mo gagne.’

¹³ Me komi tax-la, ti pe dibout net par deryer e li pa ti mem oze lev so lizie pou get lesiel. Li ti pe tap so pwatrinn e li ti pe dir, ‘Bondie, pitie mwa parski mo enn peser!’

¹⁴ Mo dir zot, kan sa dimounn-la rant so lakaz li pou gagn pardon Bondie, me pa lot-la. Seki rod grander pou abese, e seki abese pou gagn grander.”

Zezi beni bann ti zanfan

¹⁵ Dimounn ti pe amenn bann ti-baba pou ki Zezi beni zot. Kan bann disip trouv sa, zot koz brit ar sa bann dimounn-la.

¹⁶ Me Zezi apel zot e li dir, “Les bann zanfan vinn ar mwa. Pa anpes zot, parski Rwayom Bondie pou tou dimounn ki parey kouma zot.

¹⁷ Laverite, mo dir zot, seki pa resevwar Rwayom Bondie kouma enn zanfan pa pou kapav rant ladan.”

Enn zom ris

¹⁸ Enn sef Zwif dimann Zezi, “Bon Met, ki mo bizin fer pou gagn lavi eternel?”

¹⁹ Zezi dir li, “Kifer to apel mwa bon? Personn pa bon, zis Bondie tousel ki bon.

²⁰ To bien konn bann komannman: Pa komet ladilter, pa touye, pa kokin, pa fer fos temwaniaz, onor to papa ek to mama.”

²¹ Sef Zwif-la dir, “Depi mo zenes mo finn gard tousala.”

²² Letan Zezi tann sa, li dir li, “To mank enn kiksoz. Vann tou seki to ena, donn bann pov, e to pou ena enn trezor dan lesiel; apre sa vini, swiv mwa.”

²³ Me letan li tann sa, so figir sanze, parski li ti ena boukou rises.

²⁴ Zezi trouv li bien tris, alor li dir, “Pa fasil pou bann ris rant dan Rwayom Bondie!

²⁵ Li pli fasil pou enn samo pas par trou zegwi ki enn ris rant dan Rwayom Bondie.”

²⁶ Bann ki ti pe tann sa demande, “Abe kisann-la kapav sove?”

²⁷ Me li dir zot, “Seki inposib pou bann imin, li posib pou Bondie.”

²⁸ Lerla Pier dir li, “Nou finn kit tou seki nou posede pou swiv twa.”

²⁹ Zezi dir zot, “Laverite, laverite, mo dir zot, si pou Rwayom Bondie enn dimounn kit so lakaz, so fam, so bann frer, so fami, so zanfan,

³⁰ li pou gagn boukou plis dan sa lavi-la, dan lot lavi e li pou gagn lavi eternel.”

Zezi fer trwaziem lanons so lamor ek so rezireksion

³¹ Zezi pran Ledouz avek li e li dir zot, “Ekout mwa, nou pe al Zerizalem, e tou seki finn profetize lor Garson Limanite pou realize.

³² Pou livre li ar bann payin, dimounn pou boufonn li, pou insilte li ek pou kras lor li.

³³ Zot pou fwet li, ek touy li, e lor trwaziem zour li pou resisite.”

³⁴ Me bann disip pa konpran seki li ti pe dir. So parol ti enn mister pou zot; zot pa ti pe reisi kapte seki li ti pe dir.

Zezi geri enn aveg

³⁵ Letan li koste pre ar Zeriko, ti ena enn aveg ki ti pe asiz dan bor sime, ti pe dimann sarite.

³⁶ Letan li tann lafoul pe pase, li dimann ki pe arive.

³⁷ Zot dir li, “Zezi Nazaret pe pase.”

³⁸ Li kriye bien for, “Zezi, Garson David, pitie mwa!”

³⁹ Bann ki devan kriy ar li pou ki li res trankil, me li kriye ankor pli for, “Garson David, pitie mwa!”

⁴⁰ Zezi arete, li donn lord pou amenn aveg-la; kan li finn koste, Zezi dimann li,

⁴¹ “Ki to oule mo fer pou twa?” Li reponn, “Segner, fer mwa trouv kler.”

⁴² Zezi dir li, “Trouv kler. To lafwa finn sov twa.”

⁴³ Toutswit li trouv kler, li swiv Zezi, e li glorifie Bondie. Tou dimounn ki ti trouv sa, ti glorifie Bondie.