Lk 16 - Nouvo Testaman Kreol Morisien Harmonisation NTPS KM

Enn sef kontab bien malin

¹ Zezi dir ar so bann disip, “Enn boug ris ti anplway enn sef kontab. Li ti gagn bann informasion ki so sef kontab ti pe gaspiy so dibien.

² Li ti apel li e li ti dir li, ‘Ki mo pe tande lor twa? Fer mwa enn rapor lor to administrasion parski to nepli kapav kontign travay pou mwa.’

³ Sef-la dir ar limem, ‘Ki mo pou fer aster? Mo patron pe donn mwa demision. Pou piose mo pena lafors, dimann sarite mo onte.

⁴ Mo kone ki mo bizin fer pou ki dimounn kontign get mwa kan mo perdi mo travay.’

⁵ Enn par enn, li apel tou bann dimounn ki ti dwa so patron. Li dir ar premie-la, ‘Komie to dwa mo patron?’

⁶ Li reponn, ‘San drom delwil zoliv.’ Kontab la dir li, ‘Degaze pran to karne, asize, mark sinkant.’

⁷ Apre li dir ar enn lot, ‘Twa, komie to dwa?’ Li reponn, ‘San bal dible.’ Li dir ar sann-la, ‘Pran to karne, mark katrovin.’

⁸ Patron-la felisit sef kontab malonet la parski li ti debrouyar. Bann zanfan lemond pli debrouyar ki zanfan lalimier kan ena pou dres papie pou tras zot lavi.

⁹ Mo dir zot, fer kamarad ar dibien ki ena lor later, koumsa kan dibien-la pou nepli existe, zot pou gagn plas dan lakaz eternel.

¹⁰ Seki fidel dan ti kiksoz, pou fidel dan seki gran; e seki malonet dan ti kiksoz, pou malonet dan seki gran.

¹¹ Si to pa finn fidel ar dibien ki ena lor later, kisann-la pou konfie twa dibien ki dan lesiel?

¹² E si to pa finn fidel ar dibien ki pa pou twa, kisann-la pou konfie twa to prop dibien?

¹³ Enn serviter pa kapav servi de met; swa li ayir enn e li kontan lot-la, swa li devwe pou enn e li mepriz lot-la. To pa kapav servi Bondie ek dibien lor later.”

De-trwa parol Zezi

¹⁴ Letan bann Farizien ki ti bien kontan larzan tann sa, zot boufonn Zezi.

¹⁵ Zezi dir zot, “Zot fer krwar ki zot ena lazistis zis pou lizie dimounn, me Bondie konn zot leker. Seki ena valer pou dimounn, enn abominasion pou Bondie.

¹⁶ Lalwa ek profet finn fer lotorite ziska Zan; apre sa, pe proklam Bonn Nouvel Rwayom Bondie e sakenn pe fors limem pou rant ladan.

¹⁷ Me li pli fasil ki later ek lesiel disparet, ki enn ti pwin dan lalwa disparet.

¹⁸ Enn zom ki divors ar so fam e marye ar enn lot, komet adilter e seki marye ar enn fam ki finn kit so mari, komet adilter osi.

Parabol Lazar ek enn zom ris

¹⁹ Ti ena enn zom ris, ki ti met bel-bel kostim, bien-bien ser. Li ti pe viv dan lix e toulezour li ti pe fer gran-gran fet.

²⁰ Ti ena enn pov malere ki ti apel Lazar. Li ti pe asize devan laport ris-la, e so lekor ti kouver ar lagal.

²¹ Li ti pou bien kontan manz bann restan ki tom anba latab. Pli terib ankor, bann lisien ti vinn lis so lagal.

²² Arive ki pov malere-la mor e bann anz amenn li pre kot Abraam. Ris-la osi mor e zot anter li.

²³ Dan lemond bann mor letan li ti pe soufer, li lev so lizie, li trouv Abraam delwin e pre ar li, ti ena Lazar.

²⁴ Li kriye, ‘Papa Abraam, papa Abraam, pitie mwa. Avoy Lazar tranp so bout ledwa dan dilo pou rafresi mo lalang parski mo pe soufer lagoni dan sa laflam-la.’

²⁵ Me Abraam dir, ‘Mo garson, rapel bien ki dan to lavi lor later to ti dan bien, alor ki Lazar ti gagn boukou maler; me aster-la li dan bien isi, e twa to dan soufrans.

²⁶ Anplis, ant nou finn met enn gran separasion pou anpes zot vinn kot nou e nou al kot zot.’

²⁷ Ris-la dir li, ‘Mo sipliy twa, papa Abraam, avoy Lazar lakaz mo papa,

²⁸ parski mo ena sink frer laba. Averti zot pou ki zot osi, zot pa vinn dan sa dife-la.’

²⁹ Me Abraam reponn li, ‘Zot ena Moiz e bann profet, les zot ekout bann-la.’

³⁰ Li reponn, ‘Non, papa Abraam, me si enn parmi bann mor al get zot, zot pou repanti.’

³¹ Abraam dir li, ‘Si zot pa ekout Moiz e bann profet, zot pa pou sanze, mem si enn mor ki finn resisite al get zot.’ ”