Lk 15 - Nouvo Testaman Kreol Morisien Harmonisation NTPS KM

Parabol brebi perdi

¹ Boukou komi tax ek bann peser koste pre ar Zezi pou ekout li.

² Bann Farizien ek bann dokter lalwa mirmire e zot dir, “Li frekant bann peser, li manze-bwar ar zot.”

³ Lerla Zezi rakont sa parabol-la,

⁴ “Kisann-la parmi zot, si li ena san mouton, e ki li perdi enn ladan, li pa pou kit katrovin-diznef-la dan dezer, pou al rod sa sel mouton ki finn perdi-la, ziska ki li retrouv li?

⁵ E kan li finn trouv li, li met li lor so zepol avek enn gran kontantman.

⁶ E letan li rant lakaz li apel tou so bann kamarad e so bann vwazin, li dir zot, ‘Vinn partaz mo lazwa parski mo finn retrouv mo mouton ki ti perdi.’

⁷ Mo dir zot, pou ena boukou plis lazwa dan lesiel pou enn sel peser ki finn repanti, ki pou katrovin-diznef dimounn ki zis, ki pa bizin repanti.”

Pies larzan perdi

⁸ “Si enn madam ki ena dis pies larzan perdi enn, eski li pa pou alim enn lalanp, balie lakaz e rode, rode mem, ziska ki li retrouv sa pies-la?

⁹ Kan li finn retrouv li, li apel so bann kamarad ek bann vwazin, e li dir zot, ‘Vinn partaz mo lazwa parski mo finn retrouv pies ki mo ti finn perdi.’

¹⁰ Li pou parey pou bann anz Bondie ki pou dan lazwa akoz enn peser ki finn repanti.”

Enn papa ar so de garson

¹¹ Zezi dir, “Enn papa ti ena de garson.

¹² Pli zenn-la dir ar so papa, ‘Papa, donn mwa mo par leritaz.’ Li partaz so dibien ant zot de.

¹³ Pli zenn-la pa perdi letan. Li ramas tou so bann zafer e li al bien-bien lwin dan enn lot pei. Laba li amenn enn lavi dezord e gaspiy tou so dibien.

¹⁴ Letan li finn fini depans tou so kas, enn gran lafaminn tom lor pei-la antie. Lerla li koumans santi lamizer.

¹⁵ Li al rod travay kot enn abitan landrwa, ki ti avoy li nouri koson dan park.

¹⁶ Li ti anvi manz gous ki bann koson ti pe manze, me sa osi personn pa ti donn li.

¹⁷ Li koumans reflesi e li dir, ‘Ki kantite manze anplis bann travayer mo papa ena, e mwa mo pe mordefin isi!

¹⁸ Mo pou leve, mo pou al kot mo papa, mo pou dir li, ‘Papa, mo finn fer pese kont lesiel e kont twa;

¹⁹ mo nepli dign ki to apel mwa to garson; tret mwa kouma enn to bann travayer.’

²⁰ Li leve, li al kot so papa. Me letan li ti ankor bien lwin so papa trouv li pe vini. So leker fermal. Li galoupe, li ser so garson dan so lebra e li anbras li.

²¹ Garson-la dir li, ‘Papa, mo finn fer pese kont lesiel e kont twa; mo nepli dign ki to apel mwa to garson.’

²² Me papa-la dir ar so bann serviter, ‘Degaze, amenn pli bon kostim, abiy li, met enn bag dan so ledwa, met soulie dan so lipie.

²³ Amenn enn ti toro bien gra, touy li; anou manze, anou fer fet,

²⁴ parski mo garson ki ti mor finn regagn lavi; li ti perdi, mo finn retrouv li.’ Fet koumanse.

²⁵ Pli gran garson-la ti dan karo. Letan li pe retourne e ki li finn ariv pre ar lakaz, li tann lamizik ek danse.

²⁶ Li apel enn serviter pou kone ki pe arive.

²⁷ Serviter-la reponn, ‘To frer finn retourne e to papa finn touy sa vo bien gra la, parski li finn retourne an-bonn-sante.’

²⁸ Garson-la pik enn koler e li refiz rantre. So papa sorti vinn get li, e sipliy li,

²⁹ me li reponn so papa, ‘Get sa, komie banane mo finn servi twa, zame mo finn dezobeir to lord; e zame to finn donn mwa enn ti kabri pou mo fer fet ar mo bann kamarad.

³⁰ Me ler to garson retourne, apre ki li finn manz tou to dibien ar bann fam move lavi, to trouv mwayin touy sa vo bien gra la pou li.’

³¹ Alor papa-la dir li, ‘Mo piti, twa, to touzour la ar mwa, e tou seki pou mwa, pou twa;

³² me nou ti bizin fer fet ek amize, parski to frer ki ti finn mor, li finn regagn lavi; li ti perdi, ala nou finn retrouv li.’ ”