Lk 13 - Nouvo Testaman Kreol Morisien Harmonisation NTPS KM

Sanz zot leker

¹ De-trwa dimounn vinn rakont Zezi kouma Pilat finn masakre bann Galileen ki ti pe ofer sakrifis.

² Zezi reponn zot, “Eski zot panse ki sa bann Galileen-la pli gran peser ki tou lezot Galileen parski zot finn soufer koumsa?

³ Mo dir zot, pa ditou! Me si zot pa repanti, zot pou mor parey.

⁴ Ki zot panse lor latour Siloe ki finn kraz lor dizwit dimounn e finn touy zot tou? Eski zot krwar ki bann-la ti pli koupab ki tou lezot abitan Zerizalem?

⁵ Mo dir zot, pa ditou! Me si zot pa repanti, zot pou mor parey.

Parabol pie fig san fig

⁶ Zezi rakont enn parabol, “Enn dimounn ti plant enn pie fig dan enn karo rezin. Li vinn rod fri lor so pie fig me li pa gagn nanye.

⁷ Li dir ar planter rezin-la, ‘Get sa, sa fer trwa-z-an ki mo finn rod fri lor sa pie fig-la me mo pa gagn nanye. Koup li. Kifer li bar plas pou nanye?’

⁸ Me li reponn proprieter-la, ‘Misie, donn li enn sans sa lane-la ankor. Mo pou bim later-la e mo pou met fimie ar li.

⁹ Lerla li pou raporte lane prosenn. Sinon nou ava koup li.’ ”

Zezi geri enn fam bosi zour saba

¹⁰ Zezi ti pe ansegne dan sinagog enn zour saba.

¹¹ Ti ena la, enn madam ki ti ena enn infirmite pandan dizwit an akoz enn move lespri. Li ti kourbe e li pa ti kapav dres drwat.

¹² Letan Zezi trouv li, li apel madam-la e li dir li, “Fam, to finn delivre depi to maladi.”

¹³ Zezi poz lame lor li, e toutswit madam-la redrese e li glorifie Bondie.

¹⁴ Me sef sinagog ti ankoler parski Zezi ti fer sa gerizon-la enn zour saba. Alors li dir, “Ena sis zour pou travay; vinn rod gerizon dan sa bann zour-la, me pa zour saba.”

¹⁵ Alor Zezi dir li, “Ipokrit! Eski zour saba, zot pa larg zot toro oubien zot bourik depi dan lekiri pou amenn li bwar dilo deor?

¹⁶ Eski zour saba, pa ti bizin liber sa madam-la, ki enn tifi Abraam, e ki Satan finn atase pandan dizwit an?”

¹⁷ Letan li dir sa, tou so bann adverser perdi lafas. Tou bann dimounn ti dan lazwa akoz bann mervey ki Zezi ti pe fer.

Parabol lagrin moutard

¹⁸ Zezi dir, “Kouma Rwayom Bondie ete, ek ar ki mo kapav konpar li?

¹⁹ Li parey kouma enn lagrin moutard ki enn dimounn finn pran pou plant dan so zardin. Li grandi e li vinn gran kouma enn pie. Lerla bann zwazo dan lesiel vinn fer zot nik dan so brans.”

Parabol levin

²⁰ Zezi rakont ankor, “Ar ki mo pou konpar Rwayom Bondie?

²¹ Li parey kouma levin ki enn fam inn pran e finn azout avek trwa goble lafarinn pou fer lapat-la monte.”

Laport sere

²² Zezi ti pe travers lavil ek vilaz e li ti pe al dan direksion Zerizalem. Lor larout li ti pe ansegne.

²³ Enn dimounn dimann li, “Segner eski pou ena enn tigit dimounn mem ki pou sove?” Li reponn zot,

²⁴ “Fer tou zot posib pou rant par ti laport parski boukou pou rod rantre me zot pa pou kapav.

²⁵ Kan proprieter lakaz leve e ferm laport, zot pou deor. Zot ava bon tape e zot ava bon dir, ‘Segner, ouver laport pou nou,’ li pou reponn zot, ‘Mo pa kone kot zot sorti.’

²⁶ Alors, zot pou dir li, ‘Nou finn manze-bwar ar twa; to finn ansegn nou lor laplas piblik.’

²⁷ Li pou re-dir zot, ‘Zot tou ki komet lemal, mo pa kone kot zot sorti. Sorti devan mwa ale.’

²⁸ Laba pou ena plore, kriye, e ledan pou grinse, letan zot pou trouv Abraam, Izaak, Zakob ek tou bann profet dan Rwayom Bondie alor ki zot, pou zet zot deor.

²⁹ Dimounn pou sorti depi les ek lwes, depi lenor ek Lesid, e zot pou asiz atab dan Rwayom Bondie.

³⁰ Marke garde, ena dernie pou vinn premie, ena premie pou vinn dernie.”

Zezi ek Zerizalem

³¹ Sa moman-la, de-trwa Farizien vinn get Zezi pou dir li, “Ale pa res la, parski Erod pe rod touy twa.”

³² Zezi dir zot, “Al dir sa renar-la, ‘Gete, mo pe pous demon e mo pe fer gerizon zordi ek dime, me lor trwaziem zour, mo ava finn fini mo mision.

³³ Selman mo bizin kontign mo sime zordi, dime ek apre dime, parski li pa posib ki enn profet mor andeor Zerizalem.’

³⁴ Zerizalem, Zerizalem, twa ki touy bann profet e twa ki touy kout ros seki Bondie finn avoy ar twa, komie fwa mo ti anvi rasanble to bann zanfan kouma enn mama poul ramas so ti-pousin anba so lezel, me zot pa finn oule!

³⁵ Krwar mwa, zot lakaz pou vid e mo pe dir zot, zot pa pou trouv mwa ankor ziska ler vini kot zot pou dir, ‘Sa-Enn ki vinn lor nom Lesegner la finn beni.’ ”