Lk 12 - Nouvo Testaman Kreol Morisien Harmonisation NTPS KM

Enn avertisman kont ipokrizi

¹ Ti ena telman enn gran lafoul ki dimounn ti pe mars lor lipie zot kamarad. Lerla Zezi koumans dir ar so bann disip, “Fer atansion levin bann Farizien, setadir, zot ipokrizi.

² Tou seki kasiet pou vinn dan kler e tou seki sekre pou devwale.

³ Akoz samem tou seki zot dir dan nwar, dimounn pou tann li dan kler, seki zot mirmire dan zorey an-prive, dimounn pou kriye li for-for lao lor lakaz.

Pa gagn per dimounn

⁴ Ala mo dir zot, mo bann kamarad, pa per seki kapav detrir lekor, e pa kapav fer plis ki sa.

⁵ Mo pou montre zot kisann-la zot bizin per: gagn per Sa-Enn ki non selman kapav detrir zot me ena osi pouvwar pou zet zot dan lanfer. Wi, mo dir zot, Sa Enn-la ki zot bizin gagn per.

⁶ Eski pa vann sink mwano pou de sou? Pourtan, Bondie pa bliye enn sel ladan.

⁷ Me zot, tou brin seve lor zot latet inn konte. Pa per, zot ena plis valer ki tou mwano.

Pour ou kont Zezi

⁸ Mo dir zot, tou seki rekonet mwa devan dimounn, Garson Limanite pou rekonet li devan bann anz Bondie.

⁹ Me seki renie mwa devan dimounn, Garson Limanite pou renie li devan anz Bondie.

¹⁰ Seki dir enn parol kont Garson Limanite pou gagn pardon; me seki blasfem kont Lespri Sin, pa pou gagn pardon.

¹¹ Kan amenn zot dan sinagog devan bann dirizan ek bann lotorite, pa trakase kouma zot pou defann zot e kouma zot pou reponn,

¹² parski Lespri Sin pou montre zot dan sa ler-la ki pou dir.

Parabol enn dimounn ris me bet

¹³ Kikenn dan lafoul dir Zezi, “Met, dir mo frer donn mwa mo par leritaz.”

¹⁴ Me Zezi dir li, “Kamarad, kisann-la finn nom mwa pou zize ek pou partaz zot dibien?”

¹⁵ Lerla li dir zot, “Fer atansion! Pa galoup deryer bann dibien materyel, parski lavi enn dimounn pa depann lor so dibien, mem si li bien ris.”

¹⁶ Zezi rakont enn parabol. “Enn dimounn ris ti ena enn plantasion ki ti raport boukou.

¹⁷ Li dir ar limem, ‘Ki mo pou fer? Mo pena plas pou ramas mo rekolt.

¹⁸ Be, ala seki mo pou fer: mo pou demoli mo bann grenie, mo pou mont bann pli gran kot mo pou ramas tou mo rekolt e tou mo lezot dibien.

¹⁹ Lerla mo pou dir ar momem, Kamarad, to ena boukou dibien an rezerv pou boukou lane; repoz twa, manze, bwar, diverti.’

²⁰ Me Bondie dir li, ‘Kouma to bet koumsa! Zordi swar mem to pou perdi to lavi; kisann-la pou erit tou seki to finn ramase?’

²¹ Ala seki pou ariv dimounn ki ramas dibien zis pou li, me ki pa ramas rises kot Bondie.”

Met konfians dan Bondie

²² Li dir so bann disip, “Ala kifer mo dir zot, fode pa zot trakase ar seki bizin manze pou viv, oubien ar linz ki zot bizin pou zot lekor.

²³ Lavi pli inportan ki manze, e lekor pli inportan ki linz.

²⁴ Get bann korbo, zot pa seme e zot pa rekolte; zot pena ni stor ni grenie, e pourtan Bondie nouri zot. Zot, zot ena plis valer ki zwazo!

²⁵ Eski traka ki to pran ar to lavi, pou fer li vinn pli long?

²⁶ Si zot pena pouvwar lor enn ti kiksoz koumsa, kifer zot trakase pou tou leres?

²⁷ Get kouma bann fler dan karo pouse; zot pa travay, zot pa koud linz. Pourtan, mem Salomon dan tou so laglwar pa ti ena zoli linz kouma sa bann fler-la.

²⁸ Si Bondie abiy lerb ki zordi dan karo ek dime pe brile, kalkile komie li pou abiy zot. Zot lafwa vremem tipti.

²⁹ Pa kas latet pou rode ki pou manze, ki pou bwar.

³⁰ Se bann ki pa krwar dan Bondie ki rod sa bann kiksoz-la; me zot, zot Papa kone ki zot bizin.

³¹ Rod plito Rwayom Bondie, e zot pou resevwar tou leres.

Rises ki sorti depi dan lesiel

³² Pa gagn per, ti troupo, parski Bondie kontan pou donn zot so Rwayom.

³³ Vann zot dibien e donn bann pov; ranpli zot kof ar rises ki pa pou fini; ramas rises ki dan lesiel e ki pa pou disparet; parski kot sa ete, voler pa kapav koste e karya pa kapav manze.

³⁴ La kot leker ete, lamem zot rises pou ete.

Bann serviter bizin touzour pare

³⁵ Pare e gard zot lalanp alime.

³⁶ Zot bizin kouma bann dimounn ki pe atann zot met retourne apre enn maryaz; kouma li tap laport, zot fini pare pou ouver.

³⁷ Bienere bann serviter ki zot met pou trouv dibout kan li rantre. Laverite mo dir zot, li pou tir so palto, fer zot asiz atab, e li pou servi zot.

³⁸ Si li vini omilie lanwit, oubien boner gramatin e li trouv zot lamem, bienere sa bann serviter-la!

³⁹ Ala seki zot bizin kone: si proprieter lakaz ti kone ki ler voler ti pou vini, li pa ti pou les li rant dan so lakaz.

⁴⁰ Zot osi zot bizin pare, parski ler ki Garson Limanite pou vini personn pa pou atann.”

Serviter serye ek pa serye

⁴¹ Pier dir, “Segner, to pe rakont sa parabol-la pou nou tousel oubien pou tou dimounn?”

⁴² Lesegner reponn, “Ki sa administrater fidel ek bien serye ki finn gagn responsabilite ar so met pou vey lor so bann serviter e gete si zot gagn zot par manze dan ler?

⁴³ Bienere serviter ki ankor pe travay ler so met retourne.

⁴⁴ Laverite mo dir zot, li pou donn li responsabilite lor tou so dibien.

⁴⁵ Me si serviter-la dir, ‘Mo met pe tarde pou retourne,’ e li koumans bat bann servant ek bann serviter, li manze, li bwar e li sou, ki pou arive!

⁴⁶ So met pou retourne zour ki li pa pe atann, ler ki li pa kone, pou koup-koup li e pou konsider li kouma enn dane.

⁴⁷ Serviter ki ti konn volonte so met, me ki pa finn prepar li, ni mem fer dapre volonte met-la, pou gagn enn move bate.

⁴⁸ Me, seki pa ti kone, e finn fer kiksoz ki merit enn pinision, pou gagn enn ti pinision mem. Tou seki finn resevwar boukou, pou dimann li boukou; seki finn gagn boukou responsabilite, pou reklam li ankor plis.

Zezi fer divizion

⁴⁹ Mo finn vini pou aport enn dife lor later; mo ti'a voudre ki li finn deza alime.

⁵⁰ Mo bizin plonz dan enn batem e mo resanti enn gran soufrans avan ki sa arive.

⁵¹ Eski zot panse mo finn vinn lor later pou amenn lape? Non, mo dir zot; pa lape, me divizion.

⁵² Depi aster-la, dan enn lakaz kot ena sink dimounn zot pou ena divizion, trwa kont de e de kont trwa,

⁵³ papa kont garson, garson kont papa; mama kont tifi, tifi kont mama; belmer kont belfi, belfi kont belmer.

Konpran bann sign

⁵⁴ Zezi dir lafoul, “Kan zot trouv niaz leve dan lwes, deswit zot dir, ‘Lapli pou tonbe’; samem ki arive.

⁵⁵ Kan divan Lesid soufle zot dir, ‘Pou fer so,’ samem ki arive.

⁵⁶ Ipokrit! Zot konpran ki pase lor later ek dan lesiel e zot konn dir ki letan pou fer me kifer zot pa konn interpret seki pe pase zordi?

Tom enn laranzman

⁵⁷ Kifer zot pa servi zot prop lespri pou fer enn zizman lor meyer fason azir?

⁵⁸ Letan to pe al kot mazistra avek dimounn ki pe akiz twa la, fer manier tom enn laranzman ar li lor sime mem; sinon li pou trenn twa devan ziz, ziz pou met twa dan lame lapolis, e lapolis pou zet twa dan prizon.

⁵⁹ Ala mo dir twa, to pa pou sorti ladan tanki to pa fini pey tou to det ziska dernie sou.