Let Zak 4 - Nouvo Testaman Kreol Morisien Harmonisation NTPS KM

Kamarad lemond, lennmi Bondie

¹ Tou sa bann dispit ek konfli ant zot la, ki kote li sorti sa? Eski li pa sorti depi zot lanvi plezir ki pe lager dan zotmem?

² Zot anvi enn kiksoz, me zot pa kapav gagn li, alor zot fer krim; zot ena enn gran lanvi pou enn kiksoz e zot pa kapav gagn li, alor zot lager, zot fer dezord. Zot pena parski zot pa demande.

³ Zot demande me zot pa resevwar, parski zot mal demande, zot demande zis pou zot prop plezir.

⁴ Bann infidel! Eski zot pa kone ki lamitie pou lemond vedir zot lennmi Bondie? Dimounn ki swazir kontan lemond li fer limem vinn lennmi Bondie.

⁵ Eski zot panse ki pou nanye Lekritir dir, “Bondie dezir avek zalouzi lespri ki li finn met dan nou”?

⁶ Me Bondie donn tou dimounn boukou plis lagras, samem Lekritir dir osi, “Bondie kont bann orgeye e li donn lagras bann ki ena limilite.”

⁷ Soumet zot ar Bondie. Reziste diab e li pou sove, al lwin ar zot.

⁸ Apros zot ar Bondie e li pou vinn pros ar zot. Zot, bann peser, netway zot lame ek pirifie zot leker ipokrit.

⁹ Zot bizin pran konsians zot mizer. Plore. Lamante. Ki zot riye sanze vinn plore; ki zot lazwa vinn tristes.

¹⁰ Abes zot devan Lesegner e li pou elev zot.

Pa port zizman lor to kamarad

¹¹ Frer ek ser, pa koz dimal lor lezot. Ninport ki koz dimal kont enn lot ou port zizman lor li, li pe koz kont lalwa e pe ziz lalwa Bondie. Si zot ziz lalwa, zot pa enn dimounn ki obeir li me zot enn ziz lor li.

¹² Bondie tousel ki donn lalwa e ki zize; li tousel kapav sove e detrir. Ki zot krwar zot ete, pou zot ziz enn lot dimounn?

Pa fer vantar

¹³ Aster-la, ekout mwa, zot ki dir, “Zordi ek dime nou pou al dan tel-tel lavil, pas enn lane laba, fer biznes ek fer boukou larzan.”

¹⁴ Pourtan, zot pa mem kone ki dime rezerv zot. Zot parey kouma enn brouyar ki paret zis pou enn ti moman, apre li disparet.

¹⁵ Zot ti bizin plito dir, “Si Lesegner oule, nou pou viv e fer sa ek sa.”

¹⁶ Kouma li ete la, zot pe fer vantar, e sa kalite vantar-la, li move.

¹⁷ Alor si kikenn konn seki bizin fer dapre lalwa e li pa fer li, li komet enn pese.