Let Zak 3 - Nouvo Testaman Kreol Morisien Harmonisation NTPS KM

Kontrol zot langaz

¹ Mo bann frer ek ser, fode pa ki zot tou rod vinn ansegnan. Zot kone, nou, bann ansegnan, pou ziz nou pli severman ki lezot.

² Nou tou fer fot. Kikenn ki pa fer fot kan li koze, li enn dimounn parfe ki kapav kontrol tou so lekor.

³ Si nou met labrid dan labous seval pou fer li obeir nou, nou pe osi kontrol so lekor an-antie.

⁴ Sinon, get bann bato, mem si zot larz e bizin gro-gro divan pou pous zot, pourtan zot dirize par enn ti gouvernay, e kot kapitenn-la anvi fer zot ale, zot ale.

⁵ Li parey avek lalang ki enn ti parti nou lekor, me li kapav fer vantar gran-gran explwa. Panse kouma enn gran lafore kapav pran dife avek zis enn ti laflam.

⁶ Lalang li parey enn dife. Li reprezant dan nou lekor enn sours lemal, e li polie tou nou lekor.

⁷ Bann imin kapav dont tou kalite zanimo sovaz ek zwazo, reptil ek pwason, e zot finn vinn dous.

⁸ Me personn pa kapav dont lalang, li kouma enn demon inkontrolab, li enn pwazon mortel.

⁹ Nou servi li pou loue Lesegner, nou Papa, e avek samem lalang nou donn malediksion dimounn ki Bondie finn kree parey kouma li.

¹⁰ Parol louanz ou malediksion sorti dan mem labous. Sa pa sipoze koumsa, mo bann frer, mo bann ser!

¹¹ Pena okenn lasours kot dilo dous ek somat sorti!

¹² Mo bann frer ek ser, eski enn pie fig kapav donn zoliv, oubien enn pie rezin donn fig? Li parey, dan enn lasours dilo sale pa kapav ena dilo dous.

De kalite sazes

¹³ Eski ena kikenn parmi zot ki panse li saz ek intelizan? Ki li prouv li par so bon kondwit, par so bann aksion ki li akonplir avek sazes ek limilite.

¹⁴ Me si zot leker li ranpli ar zalouzi, move lanvi ek lanbision, fode pa ki zot fos laverite par zot vantardiz.

¹⁵ Enn lasazes parey pa sort dan lesiel; li sorti depi later, li imin ek mem diabolik.

¹⁶ La kot ena zalouzi, lanvi ek lanbision, pou ena osi dezord ek tout sort kalite mesanste.

¹⁷ Me lasazes ki sorti depi lao, avan tou li pir; li osi pasifik, dou, amikal; li ranpli ar konpasion e li prodir boukou bon aksion san okenn tras partipri ou ipokrizi.

¹⁸ Dimounn ki sem lape otour zot, rekolte lazistis.