Let Zak 2 - Nouvo Testaman Kreol Morisien Harmonisation NTPS KM

Kontan to prosin kouma tomem

¹ Mo bann frer ek ser, kouma bann dimounn ki met zot lafwa dan Zezi Kris, nou Segner glorie, fode pa ki zot azir avek parsialite.

² Sipoze enn dimounn ris avek bel-bel bizou ek zoli linz rant dan lasanble, e enn lot dimounn pov sal-sal osi rantre,

³ si zot pran plis kont seki bien abiye-la e dir li, “Ala enn plas doner pou twa,” me zot dir lot-la, “Debout dan kwin laba,” oubien “Asiz anba kot mo lipie,”

⁴ la, zot pe fer enn diskriminasion ant zot, e zot zizman finn baze lor move rezonnman.

⁵ Mo bann frer ek ser bieneme, ekout mwa: Bondie finn swazir bann ki pov dapre lemond pou ki zot vinn ris dan lafwa e posed rwayom ki finn promet bann ki kontan li.

⁶ Me zot finn dezonor bann pov. Kisann-la ki kraz zot e trenn zot devan tribinal? Pa bann ris?

⁷ Pa bann-la mem ki finn insilte e sali sa zoli nom ki finn donn zot la?

⁸ Bien sir, zot fer bien si zot vremem obeir lalwa rwayom dapre Lekritir, “To bizin kontan to prosin kouma tomem.”

⁹ Me si zot montre diskriminasion, zot komet enn pese e lalwa pou kondann zot kouma enn kaser lalwa.

¹⁰ Parski dimounn ki obzerv lalwa me fel lor enn sinp ti detay, li pou koupab fel tou lalwa.

¹¹ Dimounn ki dir, “To pa komet adilter,” dir osi, “To pa fer krim.” Aster-la si to pa komet adilter me fer krim, to finn kas lalwa.

¹² Zot bizin koze ek azir kouma dimounn ki lalwa pou zize, lalwa ki rann lib.

¹³ Bondie pou san pitie letan li ziz dimounn ki pa finn montre pitie; pitie gagn laviktwar lor zizman.

Lafwa san okenn aksion li mor

¹⁴ Mo bann frer ek ser, ki sa servi zot si kikenn pe dir, “Mo ena lafwa,” si li pa prouv li par bann aksion? Eski sa kalite lafwa-la kapav sov twa?

¹⁵ Sipoze enn frer ou enn ser pena nanye pou met lor li ou nanye pou manze toulezour.

¹⁶ Ki sa servi si to dir zot: “Orevwar, port zot bien; abiy zot bien e manze vant plin!” me to pa donn zot seki neseser pou zot viv?

¹⁷ Li parey avek lafwa: si li pena okenn bon aksion, li enn lafwa mor.

¹⁸ Kikenn kapav dir; “Enn dimounn ena lafwa e enn lot ena aksion.” Mo pou reponn li: “Montre mwa to lafwa san bann aksion! Abe mwa, mo pou prouv twa mo lafwa par mo bann aksion.”

¹⁹ Zot krwar ki ena enn sel Bondie; zot fer bien. Mem bann demon osi krwar sa, e zot tranble avek laper.

²⁰ Zokris! To anvi kone si lafwa san bann aksion li initil?

²¹ Get Abraam, par so bann aksion ki Bondie finn deklar li zis letan li ti ofer so garson Izaak lor lotel.

²² To trouve, so lafwa ek so aksion mars ansam; so aksion prouv so lafwa dan Bondie.

²³ La, nou trouv realizasion pasaz Lekritir ki dir: “Abraam finn krwar dan Bondie ki finn rekonet li kouma zis,” e zot finn apel li kamarad Bondie.

²⁴ To trouve, enn dimounn li zistifie par bann aksion e pa zis par lafwa.

²⁵ Li parey dan ka prostitie Raab ki li osi ti zistifie par so aksion letan li ti akey bann mesaze e ti ranvway zot par enn lot sime.

²⁶ Parey kouma enn lekor san lespri li mor, nou lafwa osi san bann aksion, li mor.