Let pou Tit 1 - Nouvo Testaman Kreol Morisien Harmonisation NTPS KM

Salitasion

¹ Mwa Pol, serviter Bondie, mo enn zapot Zezi Kris ki finn swazir pou amenn bann krwayan dan lafwa ek gid zot dan laverite.

² Zot pou gagn lesperans lavi eternel ki Bondie finn promet depi lontan. E Bondie zame koz manti.

³ Kan finn ariv lemoman, Bondie nou Sover finn manifeste so parol par enn proklamasion ki finn konfie mwa par so lord.

⁴ Mo adres sa let-la pou twa Tit, mo vre zanfan dan lafwa. Mo priye Bondie nou Papa ek Lekris Zezi nou Sover: ki li amenn lagras ek lape lor twa.

Travay Tit dan Kret

⁵ Mo finn les twa dan Kret, pou terminn lorganizasion Legliz ek etablir bann ansien dan sak lavil. Pa bliye seki mo finn dir twa:

⁶ enn pret bizin ireprosab, mari enn sel fam. So zanfan bizin krwayan ek ena bon repitasion ek bon kondwit.

⁷ Enn levek, antan ki enn zeran Bondie, bizin ireprosab: fode pa ki li arogan, fer koler, biver, batayer, kontan kas.

⁸ Okontrer, li bizin akeyan, fer dibien, ekilibre, enn dimounn zis, devwe, ki konn kontrol limem.

⁹ Li bizin tini ferm dan mesaz ki vre, parey kouma ti finn ansegne, pou ki so lansegnman ed dimounn ek koriz bann ki opoz zot.

¹⁰ Wi, ena boukou, sirtou parmi bann sirkonsi, ki ena lespri rebel ek tronp lezot par bann bel-bel diskour kot zot koz ninport.

¹¹ To bizin ferm zot labous. Sa bann dimounn-la amenn boulversman dan bann fami ek zot pran kas.

¹² Ena enn parmi, enn zot profet, ki finn dir, “Bann Kretwa enn bann manter; zot gourman ek pares kouma bebet!”

¹³ Sa temwaniaz-la, li vre. Sa kalite dimounn-la fode pa tolere. Bizin fer zot grandi dan lafwa.

¹⁴ Pa pret atansion ar tou sort kalite zistwar ki bann Zwif pe rakonte ek bann komannman imin ki fer dimounn tourn ledo ar laverite.

¹⁵ Tou kiksoz pir pou dimounn ki gard zot pir. Me pou bann ki inpir e ki pena lafwa, nanye pa pir. Zot lespri mem e zot konsians pa prop.

¹⁶ Zot dir ki zot konn Bondie, me par zot bann aksion, zot renie li. Zot enn bann rebel ki Bondie deteste ek zot pa vo nanye pou enn sou.