Let pou Romin 9 - Nouvo Testaman Kreol Morisien Harmonisation NTPS KM

Bondie ek lepep ki li finn swazir

¹ Mo pe koz laverite dan Lekris; mo pa pe koz manti, mo konsians ki gide par Lespri Sin rann temwaniaz dan mo faver:

² ki mo ena enn gro sagrin dan mo leker ek enn soufrans ki pa fini.

³ Mo ti pou swete ki malediksion lor mwa, e ki mo separe ar Lekris, pou dibien mo bann frer, ki mem ras ki mwa.

⁴ Zot bann Izraelit. Bondie finn adopte zot; li finn donn zot so laglwar, bann lalians, ek bann promes;

⁵ zot desandan bann patriars, e Zezi, kouma enn imin, sorti dan zot ras, limem ki lao tou. Nou beni Bondie pou leternite! Amen.

⁶ Sa pa vedir ki Parol Bondie pa finn reisi; parski, pa tou desandan Izrael ki vre Izraelit.

⁷ Parey, pa tou desandan Abraam ki zanfan Abraam. Bondie ti dir Abraam, “Zis bann desandan Izaak ki pou konte kouma to bann zanfan.”

⁸ Savedir pa bann zanfan par nesans natir imin ki zanfan Bondie, me bann zanfan ki finn ne dapre promes Bondie ki pou konsidere kouma vre desandan.

⁹ Ala seki promes-la ti dir, “Dan letan ki finn fixe mo pou retourne, e Sara pou gagn enn garson.”

¹⁰ E pa zis sa, toule-de garson Rebeka ti ena mem papa, setadir, nou anset Izaak.

¹¹ E pourtan avan nesans bann zimo-la, avan mem ki enn ou lot ti fer kiksoz bon ou move, e pou ki Bondie so plan eleksion kontigne existe lor baz enn swa ki li fer

¹² pa dapre zefor travay me dapre so lapel, Bondie ti dir Rebeka, “Lene pou servi seki pli tipti.”

¹³ Parey kouma finn ekrir, “Mo ti kontan Zakob, me mo ti rezet Ezai.”

¹⁴ Ki nou kapav dir, alor? Ki Bondie inzis? Zame!

¹⁵ Parski li dir Moiz, “Mo pou fer mizerikord pou seki mo ena mizerikord, mo pou montre konpasion pou seki mo ena konpasion.”

¹⁶ Alor sa pa depann lor volonte dimounn ni lor so zefor me zis lor mizerikord Bondie.

¹⁷ Dan Lekritir, Bondie dir Faraon, “Mo finn etablir twa lerwa pou ki atraver twa mo montre mo pouvwar e ki mo nom proklame partou lor later.”

¹⁸ Bondie fer mizerikord pou seki li oule, e seki li oule li les li vinn teti.

Koler e mizerikord Bondie

¹⁹ Kitfwa ena pou dir mwa, “Si sa koumsa, kifer Bondie blam nou alor? Kisann-la kapav reziste so volonte?”

²⁰ Me kisann-la to ete, twa ki imin, pou diskit ar Bondie? Enn po ki finn fer ar later kapav dir potie-la, “Kifer to finn fer mwa koumsa?”

²¹ Eski enn potie pa kapav servi mem lapat later pou fer enn lobze ki ena gran valer, e servi mem lapat pou fer enn lot ki ordiner?

²² Bondie ti anvi montre so koler e fer konn so pwisans. Li ti siport avek enn gran pasians bann lobze ki merit so koler, seki ti pe al ver destriksion.

²³ E li finn fer sa pou montre rises so laglwar pou bann ki finn gagn so mizerikord, bann ki li finn prepare davans pou resevwar so laglwar.

²⁴ Nou lepep ki li finn apele, pa selman parmi Zwif, me osi parmi non-Zwif,

²⁵ parey kouma ti ekrir dan liv Oze: “Lepep ki pa pou mwa mo pou apel li ‘Mo pep.’ Nasion ki mo pa ti kontan mo pou apel li, ‘Mo Bieneme.’ ”

²⁶ “E dan sa mem plas kot Bondie ti dir, ‘To pa mo pep,’ lamem pou apel zot, ‘Zanfan Bondie vivan.’ ”

²⁷ Konsernan Izrael, Izai ti kriye: “Mem si kantite ki Izrael ete li kouma lagrin disab lor laplaz, pourtan zis enn tigit mem parmi zot pou sove,

²⁸ parski Bondie pou realiz so Parol lor later, konpletman e avek rapidite.”

²⁹ E parey kouma Izai ti dir bien avan, “Si Lesegner Toupwisan pa ti les de-trwa desandan pou nou, nou ti pou fini kouma Sodom, nou ti pou parey kouma Gomor.”

Lapriyer Pol pou pep Izrael

³⁰ Ki nou kapav dir alor? Bann non-Zwif ki pa ti pe rod rann zot drwat devan Bondie, finn vinn drwat par lafwa;

³¹ me Izrael ki ti pe rod rann limem drwat devan Bondie par lalwa, pa finn gagn li.

³² Kifer? Parski zot pa ti depann lor lafwa me lor zot prop zefor ki zot ti pe fer. Zot finn kogn kont ros ki fer tonbe,

³³ kouma finn ekrir: “Gete, mo finn plas enn ros dan Sion ki pou fer dimounn kogne, enn ros ki pou fer zot tonbe. Me ninport kisann-la ki krwar dan li pa pou tom dan laont.”