Let pou Romin 6 - Nouvo Testaman Kreol Morisien Harmonisation NTPS KM

Lavi avek Zezi Kris

¹ Ki nou pou dir alor? Eski nou pou kontign fer pese pou ki lagras Bondie vinn pli abondan?

² Pena sime! Pou seki konsern pese, nou finn mor, li pena pouvwar lor nou; kouma nou kapav kontign viv ladan?

³ Zot pa kone ki nou tou ki finn batize dan Lekris nou finn batize dan so lamor?

⁴ Par nou batem nou finn antere avek li e nou finn partaz so lamor, pou ki nou viv enn nouvo lavi parey kouma Lekris finn resisite depi lamor par laglwar so Papa.

⁵ Si nou finn ini avek li dan enn lamor parey kouma so lamor, nou pou ini avek li dan so rezireksion.

⁶ Nou kone ki nou vie natir finn krisifie ansam ar li, pou ki sa lekor pese la perdi tou so pouvwar, e ki nou nepli pou esklav pese.

⁷ Pou dimounn ki finn mor, pese pena okenn pouvwar lor li.

⁸ Si nou finn mor avek Lekris, nou krwar avek konviksion ki nou pou viv avek li.

⁹ Parski nou kone ki depi ki li finn resisite, Lekris pa pou mor ankor; lamor nepli ena pouvwar lor li.

¹⁰ Akoz li finn mor, pese finn perdi tou pouvwar lor li. Pou samem pese li finn mor enn fwa pou tou; aster-la ki li vivan, li viv so lavi pou Bondie.

¹¹ Dan mem fason konsider zotmem mor par rapor ar zot pese, me vivan pou Bondie dan linion avek Zezi Kris.

¹² Alor, pa les pese dominn zot lekor mortel pou fer zot obeir so bann move dezir.

¹³ Pa livre diferan parti zot lekor pou ki pese fer zot vinn instriman move kiksoz; okontrer ofer zotmem Bondie kouma bann dimounn vivan ki finn sorti depi dan lamor, e ofer zotmem an antie kouma instriman pou enn lavi drwat devan Bondie.

¹⁴ An-efe, pese pou nepli dominn zot parski zot nepli anba lalwa, me zot pe viv dan lagras Bondie.

Esklav enn lavi drwat

¹⁵ Abe ki nou pou dir? Eski nou pou fer pese parski nou nepli anba lalwa, me dan lagras Bondie? Pena sime!

¹⁶ Eski zot pa kone kan zot livre zotmem kouma enn esklav pou obeir enn dimounn, zot esklav sa dimounn ki zot pe obeir la? Swa zot esklav pese ki ena pou rezilta lamor ou esklav lobeisans ki ena pou rezilta lavi drwat devan Bondie.

¹⁷ Granmersi Bondie! Zot ki ti esklav pese, zordi avek tou zot leker zot obeir laverite ki dan lansegnman ki zot ti resevwar.

¹⁸ Bondie finn liber zot depi zot pese e zot finn vinn esklav lazistis.

¹⁹ Mo pe explik sa dan langaz sinp parski zot natir feb. Parey kouma zot ti abitie livre zot lekor pou esklavaz inpirte ek lemal ki deplizanpli pe grandi, aster-la ofer zotmem kouma esklav lavi drwat devan Bondie ki pou amenn zot ver enn lavi sin.

²⁰ Kan zot ti ankor esklav pese, zot pa ti pran kont lazistis.

²¹ Ki profi zot ti gagne dan enn lavi ki ti pe kondir zot ver lamor e ki zordi fer zot gagn onte? Sa bann louvraz-la amenn lamor!

²² Aster-la zot finn lib par rapor ar pese e zot finn vinn esklav Bondie, zot ena sanktifikasion pou fri, ek so rezilta li lavi eternel.

²³ Saler pese, li lamor, me don Bondie li lavi eternel dan Zezi Kris nou Segner.