Let pou Romin 5 - Nouvo Testaman Kreol Morisien Harmonisation NTPS KM

Ki savedir lape avek Bondie

¹ Aster-la ki nou finn zistifie par lafwa, nou ena lape avek Bondie atraver nou Segner Zezi Kris.

² Akoz nou ena lafwa dan Lekris, li finn fer nou gagn akse ar lagras Bondie, e nou viv dan lexperyans sa lagras-la. Nou met nou fierte dan lesperans ki nou partaz laglwar Bondie.

³ Pa selman sa, nou met nou fierte dan nou soufrans, parski nou kone ki lasoufrans li amenn perseverans,

⁴ perseverans fer gagn fidelite solid, e fidelite solid donn lesperans.

⁵ Sa lesperans-la li pa desevwar nou, parski Bondie finn repann so lamour dan nou leker par Lespri Sin ki li finn donn nou.

⁶ Letan nou ti ankor feb, Lekris ti mor pou bann peser dan letan ki ti finn fixe.

⁷ Li difisil pou kikenn donn so lavi pou enn lot ki viv drwat. Kikfwa enn par la kapav oze mor pou enn bon dimounn.

⁸ Me ala ki manier Bondie prouve ki kantite lamour li ena pou nou: letan nou ti ankor peser, Lekris finn mor pou nou.

⁹ Aster ki nou zistifie par so disan, ena plis rezon ankor pou ki li sap nou devan lakoler Bondie.

¹⁰ Nou ti bann lennmi Bondie, me nou finn rekonsilie ar li par lamor so Garson; aster ki nou rekonsilie ar li, ena plis rezon ki nou pou sove par lavi so Garson.

¹¹ Ek ena plis ankor: nou met nou fierte dan Bondie par nou Segner Zezi Kris, par ki, aster, nou finn rekonsilie ar Bondie.

Adam e Lekris

¹² Par enn zom pese finn vinn dan lemond, e lamor finn rantre par pese, e lamor finn tous tou dimounn, parski tou finn fer pese.

¹³ Ti ena pese dan lemond avan ki ti donn Lalwa; me parski pa ti ena Lalwa, pese pa ti konte.

¹⁴ Pourtan depi lepok Adam ziska lepok Moiz lamor finn manifeste so pouvwar, mem lor bann dimounn ki pa finn komet pese kouma Adam ti fer; Adam ti enn model Sa-Enn ki ti pou vinn apre li la.

¹⁵ Me nou pa kapav konpar sa de la; parski don gratwi Bondie pa parey kouma fot ki Adam finn fer. Enn kantite finn mor akoz fot sa enn dimounn-la; panse aster ki kantite dimounn finn touse par don gratwi ki Bondie finn done par lagras enn sel dimounn, Zezi Kris.

¹⁶ Manier ki Bondie donn so don li pa parey kouma rezilta pese ki enn sel zom finn komet. Zizman ki ti swiv sa enn pese-la, ti amenn kondanasion; me don gratwi ki ti swiv boukou pese ti amenn zistifikasion.

¹⁷ Lamor finn manifeste so pouvwar par fot enn sel dimounn; mazine aster komie plis bann ki resevwar lagras Bondie dan labondans, ansam ar don lazistis, komie plis zot pou regne dan lavi akoz enn sel dimounn: Zezi Kris.

¹⁸ Alor, parey kouma fot enn sel finn amenn kondanasion tou dimounn, dan mem manier aksion zis enn sel dimounn, Zezi Kris, sap tou dimounn depi zizman, rann zot lib pou viv.

¹⁹ Par dezobeisans enn sel, boukou dimounn finn tom dan pese, dan mem manier, par lobeisans enn sel, boukou dimounn revinn zis devan Bondie.

²⁰ Ler Lalwa finn vini, bann pese finn ogmante. Me la kot pese ti ogmante, lagras dan so abondans ti ogmant ankor plis.

²¹ Parey kouma pese ti regne dan lamor, dan mem manier lagras regne par lazistis pou amenn lavi eternel atraver Zezi Kris, nou Segner.