Let pou Romin 16 - Nouvo Testaman Kreol Morisien Harmonisation NTPS KM

Konpliman personel

¹ Mo rekomann zot nou ser Febe ki enn diakones dan Legliz Sankre.

² Akeyir li dan nom Lesegner, kouma bann krwayan bizin fer, e asiste li dan ninport ki kiksoz ki li bizin, parski limem li finn enn gran led pou boukou dimounn, e pou mwa osi.

³ Donn Prisil ek Akila mo salitasion, zot kolabor ar mwa dan travay ki nou ti fer pou Zezi Kris.

⁴ Zot ti riske zot lavi pou mwa. Pa mo tousel ki dir zot mersi me tou Legliz dan lemond non-Zwif rekonesan anver zot.

⁵ Mo salie osi Legliz ki rasanble dan zot lakaz. Dir bonzour Epaynet, ki ti premie dan provins Lazi pou krwar dan Lekris.

⁶ Salie Marie ki finn travay boukou pou nou.

⁷ Salie Andronikos ek Zinias ki fami ar mwa e ki ti dan prizon ansam ar mwa. Dimounn bien estim zot parmi bann zapot, e zot ti krwayan avan mwa.

⁸ Salie Anpliatis ki mo bien kontan dan Lesegner.

⁹ Salie Irbin, nou konpagnon travay pou servi Lekris, e mo bon kamarad Stakis.

¹⁰ Salie Apeles, ki finn prouve ki so lafwa dan Lekris ferm.

¹¹ Salie Erodion, enn fami ar mwa. Salie tou krwayan dan lakaz Narsis.

¹² Donn mo salitasion Trifenn ek Trifoza, sa bann madam ki pe travay dir pou Lesegner la; e osi Persis, enn madam ki nou bien kontan, ki fer boukou pou Lesegner.

¹³ Salie Rifis, ki Lesegner finn swazir, e so mama ki osi enn mama pou mwa.

¹⁴ Salie Asinkrit, Flegon, Ermas, Patrobas, Ermas, e bann ser ek bann frer ki avek zot laba.

¹⁵ Salie Filolog e Zili, Nere ek so ser Olinpas, e tou bann krwayan ki avek zot.

¹⁶ Anbras zot kamarad avek enn lamour fraternel. Tou bann Legliz Lekris avoy zot salitasion.

Bann dernie instriksion

¹⁷ Mo sipliye zot, bann frer, bann ser, res lor zot gard kont bann dimounn ki diviz lezot pou fer bann klik, e egar zot par bann lansegnman ki kontrer ar seki zot ti aprann. Evit sa bann-la.

¹⁸ Sa kalite dimounn-la pa pe servi Lekris nou Segner, me zot prop vant. Par zot koze dimiel e zot diskour ki flate, zot tronp leker bann ki lespri inosan.

¹⁹ Tou dimounn kone komie zot obeisan, e sa donn mwa boukou lazwa; me mo oule ki zot saz konsernan seki bon, ek ki zot pa fer konpromi avek seki move.

²⁰ Biento Bondie lape pou kraz Satan anba zot lipie. Ki lagras Lesegner Zezi res avek zot.

²¹ Timote, ki travay ansam ar mwa, avoy zot so salitasion; Lisyis osi, ansam ar Zason e Sosipater, mo bann fami.

²² Mwa, Tertyis, ki finn ekrir sa let-la, mo salie zot dan Lesegner.

²³ Gais, ki bien resevwar mwa e tou Legliz kot li, avoy zot so salitasion. Erast, trezorye lavil, e nou frer Kartis avoy zot salitasion.

²⁴

Louanz final

²⁵ Anou loue Bondie! Li ena pouvwar fortifie zot dan lafwa, dapre Bonn Nouvel ki mo anonse letan mo proklam Zezi Kris, e dapre revelasion enn mister ki ti gard kasiet depi koumansman letan,

²⁶ me ki aster-la finn revele par seki bann profet ti ekrir par komannman Bondie, pou ki tou bann pep ki pe gagn konesans krwar e obeir Bondie.

²⁷ Nou rann glwar Bondie. Li tousel ena tou sazes; par Zezi Kris nou glorifie li pou touzour! Amen.